சில நாட்களுக்கு முன் வவுனியாவில் கோழிப் பண்ணையாளர்களுக்கு ஒரு பயிற்சி வகுப்பைச் செய்து கொண்டிருந்த போது அவர்களிடம் ஒரு கேள்வியைக் கேட்டேன்.” புரொய்லர் கோழி இறைச்சியை சாப்பிடுவது நல்லதா ? கெட்டதா?”. பெரும்பாலானவர்கள் சொன்ன பதில் கூடாது என்பதுதான். அதற்குக் காரணமாக அவர்கள் சொன்ன பதில்கள் இவைதான்.

” நீரிழிவு , மாரடைப்பு, கொலஸ்ரோல், இரத்தக் கொதிப்பு,புற்றுநோய் போன்ற பல நோய்கள் வரும்.”

” அந்த கோழிகள் மனிதனுக்குத் தீங்கான உணவுகளை உண்டே வளர்கின்றன”

“நாட்டுக் கோழிகள் இயற்கையான உணவுகளை உண்டே வளர்கின்றன.ஆரோக்கியமானவை”

” முன்பு ஆறு மாதங்களில் எடுக்கும் வளர்ச்சியை தற்போதய கோழிகள் 40 -50 நாட்களில் அடைவது அவற்றை உண்ணும் மனிதர்களுக்கு தீங்கானது”

” அவை வேகமாக வளர்வதைப் போல அதை உண்ணும் நாங்களும் விரைவாக வளர்ந்து இறந்து போவம்”

” அவை வேகமாக வளர ஊசி போடுகிறார்கள். அதுவும் ஓமோன் ஊசி”

” அவற்றை உண்பதால் தான் எங்கட பெண் பிள்ளைகள் வேகமாக சாமத்தியப் படுதுகள். இது கூடாதுதானே? “

கடைசியா அவர்கள் கூறிய விடயத்தை மேலும் விளக்கச் சொன்னேன்.(அங்கு கலந்து கொண்டவர்களில் பெரும்பாலானவர்கள் நடுத்தர வயதுடைய பெண்கள்.)

“முந்தியெல்லாம் எங்கட பெண் பிள்ளைகள் 14-15 வயசிலதான் சாமத்தியப்படுங்கள்.நாங்களெல்லாம் அப்பிடித்தான்.இப்ப 10 வயசிலையும் சாமத்தியப்படுதுகள்.அதுக்கு காரணமே இந்த புரொயிலர் கோழிதான்”

“யார் சொன்னது? “

“டொக்டர்மார்”

“எந்த டொக்டர்மார்?”

“இந்த பேஸ்புக்கிலயும் யூரியூப்பிலயும் வார ஆக்களும் டொக்டர் மாரும்”.

நான் கேட்டேன் ” நீங்கள் கிழமையில் எத்தனை நாள் கோழி இறைச்சி சாப்பிடுவீங்க?”

பலர் ஒருதடவை என்றார்கள்.சிலர் இரண்டு தடவை.சிலர் பத்து நாட்களுக்கு ஒரு தடவை என்றார்கள்.

“உங்கள் பிள்ளைகள் கிழமையில் எத்தனை தடவை இனிப்புகள், சொக்லேட்,கேக்,கோதுமை உணவுகள்,ஐஸ்கிறீம்,சோடா வகை குடிப்பார்கள் “எனக் கேட்டேன்.

“அது கணக்கு வழக்கு இல்லை “என சிரித்தார்கள்.

எத்தனை தடவை பிரைட் ரைஸ்,கொத்து,பீட்சா,பேர்கர் சாப்பிடுவார்கள்.?

“அடிக்கடி அது நடக்கும்.”

“அடிக்கடி எண்ணையில் பொரித்த உணவுகள் சாப்பிடுவார்களா? “

“ஓம் சாப்பிடுவார்கள். “

“விரைவு உணவுக்கடைகளில சாப்பிடுகிறார்களா?”

‘ ஓம்.அடிக்கடி நாங்களும் போவம்.குடும்பத்தோட நேரத்தை போக்க வேறு என்ன வழி?”

“நல்லாச் சீனி போட்டு பால், யூஸ் என குடிப்பார்களா? “

“அது இல்லாம எப்பிடி. ? “

“இதெல்லாம் உங்கட பிள்ளையள்ட வளர்ச்சியை கூட்டும் தெரியாதா? “

முழித்தார்கள்.

“சரி ! அடுத்த விசயத்துக்கு வாறன்.முந்தி நீங்க வீட்டில நல்லா வேலை செய்வீங்க. உரலில அரிசி இடிப்பீங்க.அம்மி ஆட்டுக் கல் பாவிப்பீங்க.கிணற்றில் தண்ணி அள்ளுவீங்க.வீட்ட கூட்டுவீங்க.தேங்காய் உரிப்பீங்க.பல கிலோமீட்டர் நடப்பீங்க.சைக்கிள் ஓடுவீங்க.இப்ப உங்கட பிள்ளையல் இதில ஏதாவது செய்யுதுகளா? இல்லையே.அதுகள ஒரு வேலை செய்ய விடுறீங்களா? கொஞ்சத் தூரம் நடக்குதுகளா? வியர்க்க விறுவிறுக்க விளையாடுதுகளா? சாப்பிடுற சாப்பாட்டுக்கு வேலை செய்தாத்தானே உடம்பு செரிக்கும்.இல்லாட்டி உடம்பில கொழுப்பா படியும் தானே.பிள்ளைகளின் பருமன் பெரிதாகும்.விரைவாக சகலதும் நடக்கும்.சாமத்தியமும் படும். இதில புரொய்லர் கோழியை மட்டும் குறை சொல்லி இலகுவாக தப்புறம். மச்சம் சாப்பிடாத ஐயர் வீட்டு பிள்ளையளும் இப்ப விரைவாக சாமத்தியப் படுதே? அதுகள் எங்க புரொய்லர் சாப்பிட்டது?”

“அத்துடன் , உங்கள் பிள்ளைகள் இரவு பகலாக கைபேசி பாவிப்பதும் கணணி டீவி பார்க்கதும் பிரச்சனைதான். தேவையற்ற அழுத்தத்தை தருவதோடு அவற்றிலிருந்து வரும் ஒளி கண் வழியாக மூளையை சென்றடைந்து பல வளர்ச்சி ஓமோன்களை தூண்டுகின்றன. முன்பெல்லாம் காலை 6 மணிக்கும் இரவு 7 மணிக்கும் இடையில் தான் வெளிச்சமே. இப்ப அப்படியா. இல்லையே.. மனித மூளை செயற்கை ஒளியை இயற்கை ஒளியாகத்தான் கருதும்.அப்போதும் உடல் வளர்ச்சி நிகழும். இந்த நுட்பத்தை பயன் படுத்தியே கோழிகள் அதிக முட் டையிட செயற்கை ஒளி வழங்குவோம்.

“நீங்கள் சொல்லும் நஞ்சுத் தீவனம் ஓமோன் கதை எல்லாம் கற்பனை. உலகெங்கிலும் தரமான கோழிகள் நீண்ட ஆய்வுகளின் அடிப்படையில் தேர்ந்தெடுக்கப்பட்டு அவை தொடர்ச்சியாக பயன்படுத்தப் படுகின்றன. அவற்றுக்கு தரமான தகுந்த ஊட்டச் சத்துகள் சரியாக கணிக்கப்பட்டு வழங்கப் படுகின்றன. நோய் வர முடியாத கட்டுப்பாடான கொட்டகைகளில் வளர்கப்படுகின்றன. பல பண்ணைகளுக்கு வெளியாட்கள் , வேறு விலங்குகள் போகவே முடியாது. ஏன் பூச்சிகள் கூட நுழைய முடியாது. பொருத்தமான வெப்பனிலை, சாரீரப்பதன் என சகலதும் வழங்கப்படுகின்றன. சுத்தமான தண்ணீர் கொடுக்கப்படுகிறது. நோய்த் தடுப்பூசிகள் வழங்கப்படுகின்றன. அதைத்தான் ஓமோன் என தவறாக கருதுகிறீர்கள் போல. மனிதர்களுக்கும் நோய் வராமல் இருக்க பல தடுப்பூசிகள் சிறு வயது முதல் வழங்கப் படுகின்றதைப் போலத்தன் இதுவும். இது புரொயிலருக்கு மட்டுமல்ல நீங்கள் சொல்லும் நாட்டுக் கோழிக்கும் கொடுக்கப் படுகிறது.”

“மேலும் ஓமோன் போன்றவற்றின் விலை அதிகம். அவற்றை வழங்கினால் ஒரு கிலோ கோழியிறைச்சி 20000 வரை போகும்.அவற்றை இலட்சக் கணக்கில் உள்ள கோழிகளுக்கு வழங்குவது சாத்தியற்றது.அதுவும் குறைந்த நேரத்தில்.ஓமோன்கள் அதிக வெப்பத்துக்கு செயலிழக்கும் தன்மையுடையன. பெரும்பாலான ஓமோன்கள் குளிர்ப்பதன நிலையில் பேணப்பட வேண்டியவை.வெளியே எடுத்த ஒரு சில மணி நேரத்தில் குளிர் குறைந்தால் செயலிழந்து போகக் கூடியன.குறித்த ஒரு ஓமோன் போத்தலை உடைத்து ஒவ்வொரு கோழியாக எப்படி உடனடியாக வழங்குவது? மேலும் நன்றாக அதிக வெப்பத்தில் சமைக்கும்போது ஓமோன்கள் செயலிழந்து விடும். “

“மனிதர்களுக்கு இலகுவாக கிடைக்கத்தக்க அவசியமான குறைந்த விலைப் புரதம் இந்த புரொய்லர் கோழியிறைச்சி.அதை பொய்யான தகவல்களைச் சொல்லி தடுப்பது பிழையானது. “

“ஆனால், நுண்ணுயிர் கொல்லி மருந்து அதிகளவில் பாவிக்கப்பட்ட கோழி இறைச்சி கேடானது.மனித சுகாதாரத்தை பாதிக்கக் கூடியது. கண்டபடி தீவனக் கடைகளில் வைத்திய அறிவுறுத்தல் இல்லாது வாங்கிப் பயன்படுத்தும் நுண்ணுயிர் கொல்லிகள் மிக ஆபத்தானவை. அது புரொய்லரோ நாட்டுக் கோழியோ என்று இல்லை.அதை உறுதிப்படுத்துங்கள். நன்றாக வளர்க்கப்பட்ட நன்றாக சமைக்கப்பட்ட புரொய்லர் இறைச்சி பாதுகாப்பானதே” என்று சொல்லி முடித்தேன்.

வைத்தியர் கிருபானந்தன்

The post புரொய்லர் கோழியும் பெரிய பிள்ளையாகுதலும்… appeared first on V MEDIA.

சீனாவில் உள்ள விஞ்ஞானிகள் முதல் முறையாக மனித இதயத்தில் மைக்ரோபிளாஸ்டிக்ஸைக் கண்டறிந்துள்ளனர்.

அமெரிக்க கெமிக்கல் சொசைட்டி வெளியிட்டுள்ள சமீபத்திய ஆய்வில் இந்த தகவல் சுட்டிக்காட்டப்பட்டுள்ளது.

சீனாவில் உள்ள பெய்ஜிங் அன்சென் மருத்துவமனையைச் சேர்ந்த விஞ்ஞானிகள், இருதய அறுவை சிகிச்சைக்கு உட்படுத்தப்பட்ட 15 நோயாளிகளின் இதய திசுக்களை ஆய்வு செய்தபோது இது கண்டுப்பிடிக்கப்பட்டதாக தெரிவித்துள்ளனர்.

அத்துடன்  “பெரும்பாலான திசு மாதிரிகளில் பல்லாயிரக்கணக்கான தனிப்பட்ட மைக்ரோபிளாஸ்டிக் துண்டுகளைக் விஞ்ஞானிகள் கண்டறிந்துள்ளதாக நியூயார்க் போஸ்ட்  அறிக்கை வெளியிட்டுள்ளது.

மேலும் அனைத்து இரத்த மாதிரிகளிலும் பிளாஸ்டிக் மாதிரிகளைக் கண்டறிந்துள்ளனர். “விவோ எம்.பி.களில் [மைக்ரோபிளாஸ்டிக்ஸ்] கண்டறிதல் ஆபத்தானது என வைத்தியர்கள் தெரிவித்துள்ளனர்.

அதேபோல் ஆடை மற்றும் உணவுப் பாத்திரங்களில் பயன்படுத்தப்படும் பொலிதீன்கள்,  டெரெப்தாலேட் மற்றும் ஜன்னல் பிரேம்கள், வடிகால் குழாய்கள், பெயிண்ட் மற்றும் பலவற்றில் பரவலாகக் காணப்படும் பாலிவினைல் குளோரைடு (PVC) ஆகியவற்றையும் விஞ்ஞானிகள் கண்டறிந்துள்ளனர்.

மைக்ரோபிளாஸ்டிக்ஸ் 5 மில்லிமீட்டருக்கும் குறைவான அகலத்தைக் கொண்டிருக்கலாம் எனவும்,  வாய், மூக்கு மற்றும் உடலில் உள்ள பிற துவாரங்கள் வழியாக மனித உடலுக்குள் செல்லும் எனவும் விஞ்ஞானிகள் தெரிவித்துள்ளனர்.

இதேவேளை உடல் பருமன், நீரிழிவு மற்றும் நாற்பட்ட கல்லீரல் நோய் போன்ற நோய்களுக்கு மைக்ரோபிளாஸ்டிக்ஸ் மறைமுகமாக காரணம் என்றும்  கூறப்படுகிறது.

ஆகவே பிளாஸ்டிக் பொருட்களை பயன்படுத்தி நீர் அருந்துவது, உணவு உண்பதை தவிர்த்துக்கொள்ள வேண்டும். அதேநேரம் அன்றாடம் நாம் பயன்படுத்தும் பொருட்களில் பிளாஸ்டிக்கின் பயன்பாட்டை குறைத்துக்கொள்வது அவசியமாகும்.

The post மனித இதயத்தில் மைக்ரோபிளாஸ்டிக் கண்டுப்பிடிப்பு! appeared first on V MEDIA.

கிராம்பு சமையலறைகளில் பொதுவாக பயன்படுத்தப்படும் மசாலா வகைகளில் ஒன்று.

நாம் நறுமணப் பொருளாக பயன்படுத்தப்படும் கிராம்பு அடிப்படையில் ஒரு மருத்துவ மூலிகையாகும்.

இதை வெறும் வாயில் மென்று சாப்பிடும்போது உடலுக்கு பல நன்மைகள் கிடைக்கும்.

கிராம்பை வெறும் வாயில் சாப்பிட்டால் என்னென்ன மாற்றங்கள் உடலில் உண்டாகும் என்பது குறித்து இனி பார்க்கலாம்.

01.சர்க்கரையின் அளவு சீராகும்

இரத்தத்திலுள்ள சர்க்கரையின் அளவைக் கட்டுப்படுத்த வேண்டுமெனில் அதற்கு அடிப்படையான விடயமே கணையத்தின் செயல்பாட்டை மேம்படுத்துவதுதான். அதில் கிராம்புக்கு மிக முக்கியப் பங்கு உண்டு. நீரிழிவு நோயாளிகள் கிராம்பை தினமும் உட்கொண்டு வந்தால் இரத்த சர்க்கரை அளவு சீராக்கப்பட்டு இன்சுலின் உற்பத்தியை அதிகரிக்கிறது.

02.பல் பிரச்சினைகளை தீர்க்கும்

கிராம்பு பற்களில் உண்டாகும் பிரச்சினைகளுக்கு சிறந்த தீர்வு. பற்களில் ஏற்படும் வலியை கிராம்பு குறைக்கும்.

பல் வலி, ஈறுகளில் வலி இருந்தால் அந்த இடத்தில் கிராம்பு வைப்பது சிறந்தது. அதேபோல் வாய் துர்நாற்றம் இருப்பவர்கள் கிராம்பை எடுத்துக் கொள்ளலாம்

03.வயிறு சம்மந்தப்பட்ட பிரச்சினையை தீர்க்கும்
கிராம்பை உட்கொள்வதால் செரிமான நொதிகளின் சுரப்பை அதிகரிக்கிறது. இதனால் வயிற்று போக்கு, குமட்டல், வாந்தி, சீரணமின்மை, வாயுத் தொல்லை, வயிற்று வலி, மலச்சிக்கல் போன்ற பிரச்சினைகளை குணப்படுத்துகின்றது.

04.எடை இழப்புக்கு உதவும்
கிராம்பில் உள்ள சாறு அதிக கொழுப்பின் காரணமாக உடல் பருமன் ஏற்படுவதை தடுக்க உதவுகிறது.

கிராம்பை உணவில் சேர்த்து கொள்வதன் மூலம் வயிற்றுப் பகுதியில் தேங்கும் கொழுப்பை குறைக்க முடியும்.

தினமும் கிராம்பை உணவில் சேர்த்து ஆரோக்கியமாக வாழ்வோம்!

The post தினம் ஒரு கிராம்பும் உடலில் நடக்கும் மாற்றமும்! appeared first on V MEDIA.

குளிர்காலம் தொடங்கிவிட்டாலே நோய் எதிர்ப்பு அமைப்பு பாதிப்புக்குள்ளாகிவிடும். சளி, காய்ச்சல், இருமல் போன்ற நோய்த் தொற்றுகள் தன் வேலையை காட்ட ஆரம்பித்துவிடும்.

குளிர்காலத்தில் உடல் சமநிலையை பேணுவதற்கு உட்கொள்ளும் உணவு விடயத்தில் நாம் கவனமாக இருக்க வேண்டும். அவை உடலின் நோய் எதிர்ப்பு சக்தியை அதிகரித்து எந்தவித நோய்களையும் தடுக்கும் அளவுக்கு வலுவாக இருப்பதை உறுதி செய்யக்கூடியதாக இருக்க வேண்டும்.

இஞ்சி : இது நோய் எதிர்ப்பு சக்தியை அதிகரிக்கும். அழற்சி எதிர்ப்பு பண்புகளை கொண்டது. இதனால் பாக்டீரியா மற்றும் வைரஸ்களை எளிதாக விரட்டலாம். குளிர்ந்த மாதங்களில் எத்தகைய நோயையும் சமாளிக்கும் ஆற்றல் கொண்டது. அதனால் இஞ்சியை தவறாமல் உணவில் சேர்த்துக்கொள்ள வேண்டும். இஞ்சி தேனீரை அடிக்கடி அருந்துவதும் சிறந்தது.

பாதாம் : பாதாமில் மெக்னீசியம், புரதம், மற்றும் துத்தநாகம் போன்ற சத்துக்கள் உள்ளன. விட்டமின் ஈ சத்தும் ஏராளமாக இருக்கிறது. இது நோய் எதிர்ப்பு செயல்பாட்டை மேம்படுத்தும். கிருமிகளால் நோய்த்தொற்றுகளில் இருந்து பாதுகாக்கும். பாதாம் உண்பதை வழக்கமாகிடுங்கள்.

மஞ்சள் :மஞ்சள் ஏராளமான மருத்துவ குணங்களைக் கொண்டது அழற்சி எதிர்ப்பு மற்றும் ஆக்ஸிஜனேற்ற பண்புகளையும் கொண்டது. குளிர்காலத்தில் ஆரோக்கியமாக இருப்பதற்கு தினசரி உணவில் மஞ்சள் இடம் பெறுவதை உறுதிப்படுத்திக் கொள்ளுங்கள். நோய் எதிர்ப்பு சக்தியை அதிகரிக்கச் செய்வதுடன், தொண்டைப்புண் போன்ற பிரச்சினைகளில் இருந்தும் நிவாரணம் அளிக்கும்.

துளசி : நோய் எதிர்ப்பு சக்தியை வலுப்படுத்துவது உள்ளிட்ட ஏராளமான நன்மைகள் துளசி இலையில் உள்ளது. சுவாச மண்டலத்துக்கு புத்துயிர் அளிக்கக்கூடியது. நுரையீரலையும் சுத்தப்படுத்தும் தன்மை கொண்டது. எனவே தினமும் தவறாமல் துளசி இலைகள் சிறிதளவு உட்கொள்வது சிறந்தது.

வெள்ளைப் பூண்டு :இது விட்டமின் சி, பி, மற்றும் துத்தநாகம் கொண்டது. மேலும் பூண்டில் கிருமி எதிர்ப்பு, அழற்சி எதிர்ப்பு மற்றும் பாக்டீரியா எதிர்ப்பு பண்புகள் உள்ளன. நோய் எதிர்ப்பு சக்தியை வலுப்படுத்துவதோடு மட்டுமல்லாமல் குளிர்கால நோய் பாதிப்புகளான சளி மற்றும் இருமல் ஆகியவற்றில் இருந்தும் பாதுகாக்கிறது.

சிறந்ததை உண்போம் ஆரோக்கியமாய் வாழ்வோம்.

The post குளிர்கால சிக்கல்களைத் தீர்க்கும் உணவுகள்! appeared first on V MEDIA.

நம் உடலில் அதிகப்படியான கவர்ச்சியை வெளிப்படுத்துவதில் கூந்தலுக்கே பிரதான இடமுண்டு. அதிலும் குறிப்பாக பெண்களுக்கு மிக முக்கியமான அழகுப்படுத்தல் விடயம் என்றாலே அது கூந்தல் பராமரிப்பு தான்.

ஆனாலும் இளம் வயதிலேயே பலரும் இளம் நரை, பொடுகு தொல்லை, முடி உதிர்தல், வழுக்கை, வறண்ட கூந்தல் போன்ற ஏராளமான பிரச்சினைகளுக்கு முகம் கொடுக்கின்றனர்.

இத்தகைய பிரச்சனைகளுக்கானத் தீர்வு பாரம்பரிய மருத்துவ முறைகளில் ஏராளமான முறைமைகள் சொல்லப்பட்டுள்ளன.

வீட்டிலிருந்தவாறே அவற்றை தவறாது செய்து வந்தோமெனில் கூந்தல் சம்பந்தப்பட்ட பல பிரச்சனைகளுக்கு எளிதில் தீர்வு கண்டு விடலாம்.

முதலில், முடி பளபளப்பு குறையும் போது எலுமிச்சை சாற்றில் முடியை அலசி எடுங்கள். பளபளப்பான கூந்தலை பெறுவதற்கு ஆப்பிள் சீடர் வினிகரை கலந்து குளிக்கலாம்.

முடி உதிர்தல் பிரச்சனை இருக்கும் போது தேங்காய்ப்பால் அல்லது தேங்காயெண்ணெய் மசாஜ் செய்வதன் மூலம் முடி உதிர்தலை கட்டுப்படுத்தலாம்.

கூந்தல் அதிகமாக வறண்டு இருந்தால் தேனுடன் ப்ரெஷ் ஃக்ரீம் கலந்து முடிக்கு மாஸ்க் போட்டு நீரில் அலசி எடுக்கலாம்.

கூந்தலை சுத்தம் செய்ய கெரட்டின். ரோஸ்மேரி, தாவர புரதங்கள் மற்றும் கடற்பாசி சாறு போன்ற மூலப்பொருள்களை கொண்ட இயற்கையான ஷாம்புகள் மற்றும் கண்டிஷனர்களை பயன்படுத்துங்கள்.

பொடுகு தொல்லை நீங்க இரவில் படுப்பதற்கு முன்னர் ஒரு டம்ளரில் தேவையானளவு வெந்தயத்தை இட்டு நீரூற்றி ஊரவிட்டு, காலையில் அதனை நன்றாக அரைத்து தலையில் தேய்த்து குளித்து வந்தால் பொடுகு வராமல் தடுக்க முடியும்.

இவற்றை வாரத்திற்கு ஒருமுறை செய்து வாருங்கள். கூந்தலில் ஏற்படும் நல்ல மாற்றங்களை நீங்களே உணர்வீர்கள்.

The post கூந்தல் பராமரிப்பின் இரகசியங்கள் appeared first on V MEDIA.

இலங்கையில் பரவலாகக் காணப்படும் இந்தக் காய்களைச் சிங்களத்தில்
ඇඹරැල්ලා (அம்பரெல்லா) என்று சொல்கிறார்கள்! அதனையே தமிழ்ப்படுத்தி
‘அம்பரலங்காய்’ என்று சொல்கிறோம்!
ஆங்கிலத்தில் Amberella என்றும்
Wild Mango என்றும் கூறுவதோடு
அதன் அறிவியல் பெயர் Spondias dulcis அல்லது Spondias cytherea என்றும் கூறுகிறார்கள்! சில பிரதேசங்களில் இதை
“சீமை மாங்காய்”என்றும் அழைக்கிறார்கள்!
அதிகமாக பேசப்படாத இந்த அம்பரலங்காய்
பற்றிய சில தகவல்களைப் பார்ப்போம்!

மருத்துவக் குணங்கள் மிகுந்த அம்பரலங்காய் புளிப்பு, இனிப்பு, கார்ப்புச்
சுவைகள் கலந்தது! இம் மரத்தின் இலை, காய், பழம்,பட்டை, பிசின் அனைத்தும் நோய்களுக்கு நிவாரணமளிக்கப் பயன்படுவதாக மருத்துவக் குறிப்புகள் கூறுகின்றன!

அம்பரலங்காய் பச்சையாக உஷ்ண சுபாவமும், பழுத்தால் சீதள குணமும்
கொண்டது! காயில் Calcium, Phosphorus
அதிகமாக இருப்பதால் எலும்புகளையும்
பற்களையும் உறுதிப்படுத்துகிறது! இதயத்தின் செயற்பாடுகள் சீராக உதவுகிறது! உயிர்ச்சத்து A இருப்பதால்
கண்பார்வையைத் தெளிவாக்குகிறது;
உயிர்ச்சத்து C இருப்பதால் நோயெதிர்ப்புச்
சக்தியை மேம்படுத்துகிறது! இரத்த சோகையைப் போக்குவதோடு Cholesterolஐ
கட்டுப்படுத்தி பசியையும் தூண்டுகிறது
அம்பரலங்காய்! அதன் பழம் அஜீரணத்துக்கு
நிவாரணமளிக்கிறது! இவற்றை எல்லாம் விட அம்பரலங்காய் இரத்த அழுத்தத்தைக்
குறைக்கிறது! நீரிழிவு நோயாளிகளுக்கும்
சிறந்தது! இந்த அம்பரலங்காயை வெட்டிப் பார்த்தால் அதன் வித்து நம் உடம்பில் ஓடும்
நரம்புகள் போல் இருக்கும்.. அதனால்
இக்காய் நரம்புகளை உறுதிப்படுத்தும் தன்மை கொண்டிருப்பதாக சித்த வைத்தியம்
கூறுகிறது!

அம்பரெல்லா மரம் 5மீட்டர் உயரத்துக்கு
வளரக்கூடியது; ஆனால் இதன் ஒரு வகை
கையால் காய் பறிக்கக்கூடியதாகக் குட்டையாக இருக்கிறது! வீட்டுத் தோட்டத்தில் அலங்காரத்துக்கும் வளர்க்கப்படுகிறது!

அம்பரெல்லா தளிர்களை சம்பல் செய்து
சாப்பிடலாம்.. அம்பரலங்காய் மூலம்
சுவையான கறி சமைக்கலாம்; அச்சாறு,
சட்னி எல்லாம் செய்யலாம்; அதனால் செய்யப்படும் දෝසි ( தோஷி) பாரம்பரிய திருமண விழாக்களில் அதிகமாகப் பரிமாறப்படும் ஒன்று! அம்பரலங்காய் Juice
சுவையான ஓர் ஆரோக்கிய பானம்!

The post அம்பரலங்காய் appeared first on V MEDIA.