LPL – யாழ்ப்பாண ஆதிக்கம் தொடர்கிறது.

கோல் க்ளாடியேட்டர்ஸ் மற்றும் ஜப்னா கிங்ஸ் அணிகளுக்கிடையில் இன்று (06.12) ஹம்பாந்தோட்டையில் நடைபெற்ற போட்டியில் ஜப்னா கிங்ஸ் அணி 24 ஓட்டங்களினால் வெற்றி பெற்றுள்ளது.

விறு விறுப்பாக நடைபெற்ற போட்டியில் காலி கிளாடியேட்டர்ஸ் அணி சிறப்பான ஆரம்பத்தை பெற்றது. இலகுவாக காலி அணி வெற்றி பெறுமென்ற நிலை ஏற்பட்டது. ஆனால் யாழ் அணியின் இளம் சுழற் பந்துவீச்சாளர்கள் டுனித் வெல்லாளகே, விஜயகாந்த் விஜஸ்காந்த் ஆகியோரின் சிறந்த பந்து வீச்சு காலி அணியினை ஆட்டம் காண வைத்தது. விஜயஸ்காந்த் 02 விக்கெட்களை கைப்பற்றினார். அவர் முழுமையாக போட்டிகளில் விளையாட கூடிய நிலை ஏற்பட்டுள்ளது. காலி அணி சார்பாக குஷல் மென்டிஸ் அரைச்சதம் அடித்து கொடுத்த போதும், வெற்றியினை பெறமுடியவில்லை.

காலி அணி 20 ஓவர்களில் 10 விக்கெட்களை இழந்து 113 ஓட்டங்களை பெற்றது.

நாணய சுழற்சியில் வெற்றி பெற்ற காலி அணி களத்தடுப்பை தெரிவு செய்தது.

முதலில் துடுப்பாடிய யாழ் அணி 19.5 ஓவர்களில் சகல விக்கெட்களையும் இழந்து 137 ஓட்டங்களை பெற்றது.

யாழ் அணி ஆரம்பம் முதலே விக்கெட்களை இழந்து தடுமாறி வந்தது. தனஞ்சய டி சில்வா ஓட்ட எணிக்கையினை ஓரளவிற்கு அதிகரித்துக் கொடுத்து ஆட்டமிழந்தார். பின் வரிசையில் சொஹைப் மலிக், டுனித் வெல்லாளகே ஆகியோர் ஓரளவு அணிக்கான ஓட்டங்களை உயர்த்தி கொடுத்தனர். மீண்டும் இலங்கை அணிக்குள் அவிஷ்க பெர்னாண்டோ சேர்த்துக்கொள்ளப்பட இந்த தொடர் முக்கியமானதாக அமையும் என எதிர்பார்க்கப்பட்ட நிலையில் அவர் இந்த போட்டியில் 09 ஓட்டங்களை பெற்று ஆட்டமிழந்தார்.

பந்துவீச்சில் அனைவரும் சிறப்பாக பந்துவீசியிருந்தனர். இமாட் வசீம் மிகவும் சிறப்பாக பந்துவீசி இரண்டு விக்கெட்களை கைப்பற்றினார். இப்திகார் அஹமட் ஒரு ஓவரில் 2 விக்கெட்களை கைப்பற்றினார். கடந்த வருடம் யாழ் அணிக்கு விளையாடிய வஹாப் ரியாஸ் இன்று காலி அணிக்காக சிறப்பாக பந்து வீசி 2 விக்கெட்களை கைப்பற்றினார். நுவான் பிரதீப்பும் இரண்டு விக்கெட்களை கைப்பற்றினார்.