கொழும்பு அணியை வீழ்த்திய யாழ் அணி

ஜபப்னா கிங்ஸ் மற்றும் கொழும்பு ஸ்டார்ஸ் அணிகளுக்கிடையிலான லங்கா பிரீமியர் லீக் கிரிக்கெட் தொடரின் இன்றைய போட்டியில் ஜப்னா கிங்ஸ் அணி வெற்றியினை பெற்றுக்கொண்டது.

இறுதி நேரத்தில் கடும் விறு விறுப்பாக நடைபெற்ற போட்டியில் 06 ஓட்டங்களினால் யாழ் அணி வெற்றி பெற்றது.

கண்டி பல்லேகல சர்வதேச கிரிக்கெட் மைதானத்தில் நடைபெற்ற இந்தப் போட்டியில் நாணய சுழற்சியில் வெற்றி பெற்ற கொழும்பு அணி களத்தடுப்பை தெரிவு செய்தது.

துடுப்படிய யாழ் அணி 20 ஓவர்களில் 05 விக்கெட்களை இழந்து 178 ஓட்டங்களை பெற்றது. 179 ஓட்டங்கள் என்ற வெற்றியிலக்குடன் துடுப்பாடிய கொழும்பு அணி 20 ஓவர்களில் 08 விக்கெட்களை இழந்து 172 ஓட்டங்களை பெற்றது.

கொழும்பு அணியின் துடுப்பாட்டம் ஆரம்பித்தது முதல் விக்கெட்கள் தொடர்ந்து வீழந்தன. யாழ் அணியின் சகல பந்துவீச்சாளர்களும் சிறப்பாக பந்துவீசினார்கள். விஜயகாந்த் விஜயஸ்காந் சிறப்பாக பந்துவீசி இரண்டு விக்கெட்களை கைப்பற்றினார்.

ஆரம்ப துடுப்பாட்ட வீரராக கடந்த போட்டிகளில் சொதப்பி வந்த அஞ்சலோ மத்தியூஸ் இன்று மத்தியவரிசையில் களமிறங்கி அதிரடியாக அடித்தாடி ஓட்டங்களை குவித்தார். ஆனாலும் அது வெற்றிக்கு போதுமானதாக அமையவில்லை.

பென்னி ஹோவல், அஞ்சலோ மத்தியூஸ் ஆகியோர் அதிரடியாக துடுப்பாடி 90 ஓட்டங்களை பகிர்ந்தனர்.

யாழ் அணி இந்த வெற்றியின் மூலமாக அடுத்த சுற்றுக்கு தெரிவாகும் வாய்ப்பினை இலகுபடுத்தியுள்ளது.

முன்னதாக யாழ் அணி சிறப்பான துடுப்பாட்டத்தை வெளிப்படுத்தியது.

சகல துடுப்பாட்ட வீரர்களும் சராசரியான ஓட்டங்களை பெற்றுக் கொடுத்தனர். காலி அணியுடன் அதிரடி நிகழ்த்திய குர்பாஸ் இன்று வேகமாக ஆட்டமிழந்தமை யாழ் அணிக்கு பின்னடைவை வழங்கியது. இருப்பினும் அவிஷ்க பெர்னாண்டோ இன்றும் நல்ல ஆரம்பத்தை வழங்கினார். சதீர சமரவிக்ரம, சொஹைப் மலிக் ஆகியோரது இணைப்பாட்டம் மத்திய வரிசையில் ஓட்டங்களை உயர்த்த உதவியது. அஷான் ரண்டிக்க அதிரடியாக துடுப்பாடிய போதும் நீண்ட நேரம் நிலைக்கவில்லை.

பந்துவீச்சில் நவீன் உல் ஹக் சிறப்பாக பந்துவீசி ஆரம்ப விக்கெட்களை தகர்க்க உதவினார்.

அணி விபரம்

திசர பெரேரா, அவிஷ்க பெர்னாண்டோ, ரஹ்மனுள்ள குர்பாஸ், அஷான் ரந்திக, சதீர சமரவிக்ரம சொஹைப் மலிக், ஜேம்ஸ் புல்லர், டுனித் வெல்லாளகே, மஹீஸ் தீக்ஷண, விஜயகாந்த விஜயஸ்காந், அசித்த பெர்னாண்டோ

கொழும்பு ஸ்டார்ஸ்
அஞ்சலோ மத்தியூஸ், நிரோஷன் டிக்வெல்ல, நவோட் பரணவித்தாரன, சரித் அசலங்க, நிஷான் மதுஷ்க, டினேஷ் சந்திமால், பென்னி ஹோவல், டொமினிக் ட்ரேக்ஸ், சீக்குகே பிரசன்ன, கஸூன் ரஜித, நவீன் உல் ஹக்