ஆசிய கிண்ணம் – இலங்கை அணிக்கு வெற்றி.

இலங்கை, பங்காளதேஷ் அணிகளுக்கிடையில் கொழும்பு ஆர்.பிரேமதாசா கிரிக்கெட் மைதானத்தில் நடைபெற்ற ஆசிய கிண்ண கிரிக்கெட் போட்டி தொடரின் சுப்பர் 04 லீக் தொடரின் இரண்டாம் போட்டியில் இலங்கை அணி 21 ஓட்டங்களினால் வெற்றி பெற்றுள்ளது. இது இலங்கை அணியின் 13 ஆவது தொடர்ச்சியான வெற்றியாகும். தொடர்ச்சியான 13 வெற்றிகளை ஒரு நாள் சர்வதேசப் போட்டிகளில் பெற்றுள்ள இரண்டாவது அணி இலங்கை அணியாகும்.

258 ஓட்டங்கள் என்ற வெற்றியிலக்குடன் துடுப்பாடிய பங்களாதேஷ் அணியின் ஆரம்பம் சிறப்பாக அமைந்தது. இந்த ஆரம்பத்தோடு சென்றிருந்தால் வெற்றி பெற்றிருக்க வேண்டும். ஆனால் தஸூன் சாணக்க வழமைக்கு மாறாக தொடர்ச்சியாக ஐந்தாவது ஓவரை வீசி இணைப்பாட்டத்தை முறியடித்தார். அத்தோடு ஓட்டங்களை வழங்காமல் இறுக்கமாக பந்துவீசி பங்களாதேஷ் அணிக்கு அழுத்தத்தை வழங்கினர். இதன் காரணமாக சிறிய இடைவேளையில் இரண்டாம் ஆரம்ப துடுப்பாட்ட வீரரையும் ஆட்டமிழக்க செய்ய முடிந்தது. அத்தோடு இலங்கை அணி பக்கமாக வெற்றி வாய்ப்பு மாறியது.

15 ஓட்டங்களுக்குள் மூன்றாவது விக்கெட்டாக பங்களாதேஷ் அணியின் தலைவர் ஷகிப் அல் ஹசன் ஆட்டமிழக்க பங்களாதேஷ் அணியின் தடுமாற்றம் ஆரம்பமானது.

பங்களாதேஷ் அணியின் நான்காவது விக்கெட்டை டுனித் வெல்லாளகே கைப்பற்றி இந்தப் போட்டியின் முதல் சுழற்பந்து வீச்சாளரின் விக்கெட்டாக கைப்பற்றினார்.

ஐந்தாவது விக்கெட்டுக்காக ஜோடி சேர்ந்த முஸ்பிகியூர் ரஹீம், டௌஹித் ரிதோய் ஆகியோர் இணைந்து அரைச்சத இணைப்பாட்டத்தை பகிர்ந்து அணியை மீட்டனர். இலங்கை அணியின் துடுப்பாட்ட வேளையின் போதனா சமான நிலைக்கு கொண்டு வந்தனர். மீண்டும் பந்துவீச வந்த தஸூன் சாணக்க தனது மூன்றாது விக்கெட்டை கைப்பற்றி இணைப்பாட்டத்தை முறியடித்தார். தௌஹித் ரிதோய் சிறப்பாக துடுப்பாடினார். அவரின் ஓட்டங்கள் மூலமாகவே பங்களாதேஷ் அணி ஓரளவு தானும் போராடக்கூடிய நிலை ஏற்பட்டது.

இறுதி நேரத்தில் மஹீஸ் தீக்ஷண இறுக்கமாக பந்துவீசி விக்கெட்களை கைப்பற்ற, அவரின் பந்துவீச்சில் சிறப்பாக துடுப்பாடிய தௌஹித் ரிதோய் ஆட்டமிழக்க இலங்கை அணியின் வெற்றி உறுதியானது.

இறுதி விக்கெட் இணைப்பாட்டம் அதிரடியாக அமைய பங்களாதேஷ் வெற்றி பெற்று விடுமோ என்ற நிலை உருவானது. 22 ஓட்டங்கள் தேவையாக இருக்க மதீஷ பத்திரன 20 ஓட்ட இணைப்பாட்டத்தை முறியடித்தார்.

டுனித் வெல்லாலகே மிக இறுக்கமாக பந்துவீசி ஓட்டங்களை வழங்காமல் எதிரணிக்கு அழுத்தம் வழங்கினார். இன்று இலங்கை அணியின் பந்துவீச்சு மாற்றங்கள் மிக சிறப்பாக அமைந்தன.

நாணய சுழற்சியில் வெற்றி பெற்ற பங்களாதேஷ் அணி களத்தடுப்பை தெரிவு செய்தது. பொதுவாக இந்த மைதானத்தில் நாணய சுழற்சியில் வெற்றி பெறுபவர்கள் துடுப்பாடுவது வழமை. மழை வாய்ப்பு காரணமாக பங்களாதேஷ் இந்த முடிவை எடுத்திருக்கலாம். அதுவும் அவர்களின் தோல்விக்கு முடக்கியமான காரணமாக அமைந்தது.

முதலில் துடுப்பாடிய இலங்கை அணி 50 ஓவர்களில் 06 விக்கெட்களை இழந்து ஓட்டங்களை பெற்றுள்ளது.

இலங்கை அணியின் ஆரம்பம் சிறப்பாக அமைந்தது. இருப்பினும் டிமுத் கருணாரட்ண அணியின் ஓட்ட எண்ணிக்கை 34 ஆக காணப்படும் போது ஆட்டமிழந்தார். அதன் பின்னர் பத்தும், நிஸ்ஸங்க குஷல் மென்டிஸ் ஆகியோர் நிதானமாக ஓட்டங்களை பெற்று அணியை பலப்படுத்தினார். 74 ஓட்டங்களை இருவரும் பகிர்ந்த நிலையில் இரண்டாம் விக்கெட் வீழ்த்தப்பட்டது. இணைப்பாட்டங்கள் முறியடிக்கப்பட்டால் அடுத்தடுத்து விக்கெட்கள் வீழ்த்தப்படும் இலங்கையின் வழமை இன்றும் நடைபெற்றது. குஷல் மென்டிஸ் 50 ஓட்டங்களை பெற்ற நிலையில் களத்தடுப்பாளரை சரியாக கணிக்காத துடுப்பாட்டம் மூலம் ஆட்டமிழந்தார்.

கடந்த இரு போட்டிகளிலும் ஓரளவு சிறப்பாக துடுப்பாடிய சரித் அஸலங்க குறைந்த ஓட்டங்களுடன் ஆட்டமிழக்க இலங்கை அணி தடுமாற தொடங்கியது. மத்திய வரிசை தொடர்ச்சியாக பிரகாசிக்காமை இலங்கை அணிக்கு சிக்கலே. 50 ஓவர்கள் போட்டியில் ஓட்டங்களை அதிகரிப்பது விக்கெட்டை பாதுகாப்பது என்பன மத்திய வரிசையின் முக்கிய பணியாகும். இரண்டுமில்லாவிட்டால் இலக்குகளை அதிகரிப்பது கடினமாகும்.

தனஞ்சய டி சில்வாவும் வேகமாகவே ஆட்டமிழக்க மேலும் இலங்கை அணியின் நிலைமை தடுமாற்றத்துக்கு சென்றது. தனஞ்சய இந்த தொடர் முழுவதுமே தடுமாறி வருகின்றார்.

இலங்கை அணியின் மத்திய வரிசையின் நம்பகரமான துடுப்பாட்ட வீரராக மாறி வரும் சதீர சமரவிக்ரம இன்றும் நிதானம் காத்து துடுப்பாடி அணியை காப்பாற்றினார். இன்றைய அவரின் துடுப்பாட்டமே இலங்கை அணியின் வெற்றிக்கு கைகொடுத்தது. இன்று அவர் பெற்றுக் கொண்ட ஓட்டங்களே அவரின் அதிக பட்ச ஓட்டங்கள் ஆகும்.

தடுமாறி வந்த அணியின் தலைவர் தஸூன் சாணக்க இன்று பெற்றுக் கொடுத்த ஓட்டங்கள் அவருக்கும், அணிக்கும் ரசிகர்களுக்கும் நம்பிக்கையினை வரவைத்துள்ளது. சதீர-சாணக்க ஜோடி அரைச்சத இணைப்பாட்டத்தை பூர்த்தி செய்து பலமான நிலைக்கு அணியை கொண்டு சென்றனர். 8 இன்னிங்சின் பின்னர் சாணக்க 20 ஓட்டங்களை தொட்டுள்ளார். தேவையற்ற துடுப்பாட்ட பிரயோகத்தை மூலம் ஆட்டமிழந்தார்.

பங்களாதேஷ் அணியின் பந்துவீச்சு சிறப்பாக அமைந்தது. குறிப்பாக வேகப்பந்து வீச்சாளர்கள் இலங்கை அணிக்கு அழுத்தம் வழங்கினார்கள். ஆரம்ப 06 விக்கெட்களையும் அவர்களே கைப்பற்றினார்கள். ஹசன் மஹ்மூட்டின் பந்துவீச்சு சிறப்பாக அமைந்தது. வேகப்பந்து வீச்சாளர்கள் சிறப்பாக பந்துவீசிய நிலையிலும் அவர்களே விக்கெட்களை கைப்பற்றிய நிலையிலும் மூன்று ஓவர்கள் பாவிக்கப்படாமல் சுழற் பந்துவீச்சாளர்கள் அந்த மூன்று ஓவர்களையும் வீசி நிறைவு செய்தனர்.

ஏற்கனவே முதல் சுற்றில் இரு அணிகளுக்குமிடையில் நடைபெற்ற போட்டியில் இலங்கை அணி வெற்றி பெற்ற நிலையில் இரண்டாவது போட்டியிலும் இலங்கை அணி வெற்றி பெற்றுள்ளது. இன்றைய போட்டியில் பங்களாதேஷ் அணி தோல்வியடைந்த நிலையில் இறுதிப் போட்டி வாய்பை பங்களாதேஷ் அணி இழந்துள்ளது. ஏற்கனவே சுப்பர் 04 சுற்றில் பாகிஸ்தான் அணியிடம் பங்களாதேஷ் அணி தோல்வியை சந்தித்துள்ளது.

நாளைய தினம் இதே மைதானத்தில் இந்தியா, பாகிஸ்தான் அணிகளுக்கிடையிலான போட்டி நடைபெறவுள்ளது .

அணி விபரம்

1 டிமுத் கருணாரட்ன, 2 பத்தும் நிஸ்ஸங்க, 3 குஷல் மென்டிஸ், 4 தனஞ்சய டி சில்வா, 5 சதீர சமரவிக்ரம, 6 தஸூன் சாணக்க, 7 டுனித் வெல்லாளகே, 8 மஹீஸ் தீக்ஷண, 9 மதீஷ பத்திரனே, 10 கஸூன் ரஜித, 11 சரித் அசலங்க

1 நைம் ஷேக், 2 மெஹதி ஹசன் மிராஸ், 3 ஷகிப் அல் ஹசன் (தலைவர்), 4 லிட்டன் டாஸ் 5 முஷ்பிகுர் ரஹீம், 6 தௌஹித் ரிதோய், 7 நசும் அஹமட் 8 ஷமீம் ஹொசைன் 9 ஷொரிபுள் இஸ்லாம் 10 ரஸ்கின் அஹமட், 11 ஹசன் மஹ்முட்