டி20 உலகக் கிண்ணத் தொடரில் அயர்லாந்து அணிக்கு எதிரான போட்டியில் கனடா அணி வெற்றியீட்டியது. அமெரிக்கா, நியூயார்க்கில் இன்று(07.06) நடைபெற்ற இந்த போட்டியின் நாணய சுழற்சியில் வெற்றி பெற்ற அயர்லாந்து அணி களத்தடுப்பை தெரிவு செய்தது.
அதன்படி, முதலில் துடுப்பெடுத்தாடிய கனடா 20 ஓவர்களில் 7 விக்கெட் இழப்பிற்கு 137 ஓட்டங்களை பெற்றுக்கொண்டது. கனடா அணி சார்பில் நிக்கோலஸ் கிர்டன் 49 ஓட்டங்களையும், ஸ்ரேயாஸ் மொவ்வா 37 ஓட்டங்களையும் பெற்றுக் கொண்டனர். அயர்லாந்து அணி சார்பில் பந்து வீச்சில் கிரேக் யங், பாரி மெக்கார்த்தி ஆகியோர் தலா 2 விக்கெட்டுக்களை கைப்பற்றினர்.
138 ஓட்டங்களை வெற்றி இலக்காக கொண்டு பதிலுக்கு துடுப்பெடுத்தாடிய அயர்லாந்து அணி 20 ஓவர்களில் 7 விக்கெட்டுக்களை இழந்து 125 ஓட்டங்களை பெற்று தோல்வியடைந்தது. அயர்லாந்து அணி சார்பில் மார்க் அடேர் 34 ஓட்டங்களையும், ஜார்ஜ் டோக்ரெல் ஆட்டமிழக்காமல் 30 ஓட்டங்களையும் பெற்றுக்கொண்டனர். கனடா அணி சார்பில் பந்து வீச்சில் ஜெர்மி கோர்டன், டில்லோன் ஹெய்லிகர் ஆகியோர் தலா 2 விக்கெட்டுகளை கைப்பற்றினர்.
இதன்படி, இந்த போட்டியில் கனடா அணி 12 ஓட்டங்களினால் வெற்றியீட்டியதுடன், போட்டியின் ஆட்ட நாயகனாக கனடா அணியின் நிக்கோலஸ் கிர்டன் தெரிவு செய்யப்பட்டார். டி20 உலகக் கிண்ணத் தொடர் வரலாற்றில் கனடா அணி பதிவு செய்த முதல் வெற்றி இதுவாகும்.