டி20 உலகக் கிண்ணத் தொடரில் சூப்பர் 8 சுற்றுக்கு ஆப்கானிஸ்தான் அணி தகுதி பெற்றுக்கொண்டது. பாபுவா நியூ கினியா அணிக்கு எதிரான போட்டியில் வெற்றியீட்டியதன் ஊடாக ஆப்கானிஸ்தான் அணி சூப்பர் 8 வாய்ப்பை உறுதி செய்து கொண்டது. மேற்கிந்திய தீவுகள், டிரினிடாட்டில் இன்று(14.06) நடைபெற்ற இந்த போட்டியின் நாணய சுழற்சியில் வெற்றி பெற்ற ஆப்கானிஸ்தான் அணி களத்தடுப்பை தெரிவு செய்தது.
அதன்படி, முதலில் துடுப்பெடுத்தாடிய பாபுவா நியூ கினியா அணி 19.5 ஓவர்களில் சகல விக்கெட்டுக்களையும் இழந்து 95 ஓட்டங்களை மாத்திரம் பெற்றுக்கொண்டது. பாபுவா நியூ கினியா அணி சார்பில் கிப்ளின் டோரிகா 27 ஓட்டங்களை பெற்றுக் கொண்டார். ஆப்கானிஸ்தான் அணி சார்பில் பந்து வீச்சில் பாரூக்கி 3 விக்கெட்டுக்களையும், நவீன் உல் ஹக் 2 விக்கெட்டுக்களையும் கைப்பற்றினர்.
96 ஓட்டங்களை வெற்றி இலக்காக கொண்டு பதிலுக்கு துடுப்பெடுத்தாடிய ஆப்கானிஸ்தான் அணி 15.1 ஓவர்களில் 3 விக்கெட்டுக்களை இழந்து வெற்றியிலக்கை கடந்தது. ஆப்கானிஸ்தான் அணி சார்பில் குல்பதின் நைப் 49 ஓட்டங்களை பெற்றுக்கொண்டார்.
இதன்படி, இந்த போட்டியில் ஆப்கானிஸ்தான் அணி 7 விக்கெட்டுகளினால் வெற்றியீட்டியதுடன், டி20 உலகக் கிண்ணத் தொடரில் சூப்பர் 8 சுற்றுக்கு தகுதி பெற்றுக்கொண்டது. இதன் காரணமாக ‘C’ குழாமில் இடம்பெற்றுள்ள நியூசிலாந்து அணி சூப்பர் 8 வாய்ப்பை இழந்தது.நியூசிலாந்து அணி, தொடரில் இதுவரை பங்குபற்றிய இரண்டு போட்டிகளிலும் தோல்வியடைந்து ‘C’ குழாமின் தரவரிசையில் இறுதி இடத்திலுள்ளது.
இந்நிலையில், ‘C’ குழாமில் இடம்பெற்றுள்ள மேற்கிந்திய தீவுகள் மற்றும் ஆப்கானிஸ்தான் அணிகள் பங்குபற்றிய 3 போட்டிகளிலும் வெற்றியீட்டி சூப்பர் 8 சுற்றுக்கு தகுதி பெற்றுக்கொண்டன.