டி20 உலகக் கிண்ணத் தொடரின் சூப்பர் 8 சுற்றில் மேற்கிந்திய தீவுகள் அணிக்கு எதிரான போட்டியில் இங்கிலாந்து அணி வெற்றியீட்டியது. மேற்கிந்திய தீவுகள், சென்ட் லூசியாவில் இன்று(20.06) நடைபெற்ற இந்த போட்டியின் நாணய சுழற்சியில் வெற்றி பெற்று இங்கிலாந்து அணி களத்தடுப்பை தெரிவு செய்தது
அதன்படி, முதலில் துடுப்பெடுத்தாடிய மேற்கிந்திய தீவுகள் அணி 20 ஓவர்களில் 4 விக்கெட் இழப்பிற்கு 180 ஓட்டங்களைப் பெற்றுக்கொண்டது. மேற்கிந்திய தீவுகள் அணி சார்பில் ஜோன்சன் சார்ள்ஸ் 38 ஓட்டங்களையும், நிக்கலோஸ் பூரன், ரோவ்மன் பவுல் ஆகியோர் தலா 36 ஓட்டங்களையும் பெற்றுக் கொண்டனர்.
181 ஓட்டங்களை வெற்றியிலக்காக கொண்டு பதிலுக்கு துடுப்பெடுத்தாடிய இங்கிலாந்து அணி 17.3 ஓவர்களில் 2 விக்கெட்டுகளை மாத்திரம் இழந்து வெற்றியிலக்கை கடந்தது. இங்கிலாந்து அணி சார்பில் பில் சால்ட் 87 ஓட்டங்களையும், ஜோனி பெய்ஸ்ட்ரோ 48 ஓட்டங்களையும் பெற்றுக்கொண்டனர்.
இதன்படி, இந்த போட்டியில் இங்கிலாந்து அணி 8 விக்கெட்டுகளினால் வெற்றியீட்டியதுடன், போட்டியின் ஆட்ட நாயகனாக இங்கிலாந்து அணியின் பில் சால்ட் தெரிவு செய்யப்பட்டார்.