இங்கிலாந்துக்கு சுற்றுப்பயணம் மேற்கொண்டுள்ள 19 வயதுக்குட்பட்ட இலங்கை அணி எதிர் 19 வயதுக்குட்பட்ட இங்கிலாந்து அணிக்கு இடையிலான டெஸ்ட் தொடரின் இரண்டாவதும் இறுதியுமான போட்டியில் இன்னிங்ஸ் தோல்வியை தவிர்க்க இலங்கை அணி போராடி வருகின்றது.
போட்டியின் மூன்றாம் நாளான நேற்று(18.07) 2வது இன்னிங்ஸிற்காக துடுப்பெடுத்தாடி வரும் இலங்கை அணி 7 விக்கெட்டுக்களை இழந்துள்ள நிலையில் 78 ஒட்டங்களினால் பின்தங்கியுள்ளது.
போட்டியின் நேற்றைய நாள் ஆட்டநேர முடிவில் இலங்கை அணி 74 ஓவர்களில் 7 விக்கெட் இழப்பிற்கு 246 ஓட்டங்களை பெற்றிருந்தது. இலங்கை அணி சார்பில் 2வது இன்னிங்ஸிற்காக மஹித் பெரேரா 61(74) ஓட்டங்களையும், அணித் தலைவர் தினுர கலுப்பஹான 40(75) ஓட்டங்களையும், திசர ஏக்கநாயக்க 39(127) ஓட்டங்களையும் பெற்றுக்கொண்டனர்.
இங்கிலாந்து அணி சார்பில் பந்து வீச்சில் பர்ஹான் அஹமட், ஹரி மூர் ஆகியோர் தலா 2 விக்கெட்டுக்களை கைப்பற்றியுள்ளனர். இலங்கை அணியின் விஹாஸ் தெவ்மிக 13(25) ஓட்டங்களுடனும், பிரவீன் மனிஷ ஓட்டங்கள் எதனையும் பெறாமலும் களத்திலுள்ளனர்.
இலங்கை அணி 78 ஓட்டங்களால் பின்தங்கியுள்ள நிலையில், இங்கிலாந்து அணிக்கு வெற்றிப் பெறுவதற்கு 3 விக்கெட்டுக்கள் மாத்திரமே தேவைப்படுகின்றது. இந்நிலையில், போட்டியின் தீர்மானமிக்க இறுதி நாள் ஆட்டம் இன்று(19.07) நடைபெறவுள்ளது.
இரு அணிகளுக்கும் இடையிலான தொடரின் முதலாவது போட்டி சமநிலையில் நிறைவடைந்திருந்த நிலையில், இன்றைய தினம் தொடரை கைப்பற்றும் நோக்கில் இங்கிலாந்து அணி களமிறங்கவுள்ளது.
போட்டியின் முதலாவது இன்னிங்ஸ் விபரம்,
19 வயதுக்குட்பட்ட இலங்கை மற்றும் இங்கிலாந்து அணிகளுக்கு இடையிலான டெஸ்ட் தொடரின் இரண்டாவதும், இறுதியுமான நாள் டெஸ்ட் போட்டி இங்கிலாந்து, செல்டென்ஹாமில் கடந்த 16ம் திகதி ஆரம்பமாகியது.
போட்டியின் நாணய சுழற்சியில் வெற்றி பெற்ற இங்கிலாந்து இளையோர் அணி களத்தடுப்பை தெரிவு செய்தது. அதன்படி, முதல் இன்னிங்ஸிற்காக துடுப்பெடுத்தாடிய இலங்கை அணி 45.2 ஓவர்களில் சகல விக்கெட்டுக்களையும் இழந்து 153 ஓட்டங்களை மாத்திரம் பெற்றுக்கொண்டது.
இலங்கை அணி சார்பில் கயான் வீரசிங்க 77(111) ஓட்டங்களைப் பெற்றுக்கொண்டார். இங்கிலாந்து அணி சார்பில் பந்து வீச்சில் நவ்யா சர்மா 5 விக்கெட்டுக்களையும், ஹரி மூர், சார்லி ஆகியோர் தலா 2 விக்கெட்டுக்களையும் கைப்பற்றினர்.
பின்னர், 1வது இன்னிங்ஸிற்காக துடுப்பெடுத்தாட ஆரம்பித்த இங்கிலாந்து அணி 138.1 ஓவர்களில் சகல விக்கெட்டுக்களையும் இழந்து 477 ஓட்டங்களைப் பெற்றுக்கொண்டது. இங்கிலாந்து அணி சார்பில் அணித் தலைவர் ஹம்சா ஷேக் 107(211) ஓட்டங்களையும், ராக்கி பின்டோப் 106(181) ஓட்டங்களையும், ஜேடன் டென்லி 91(120) ஓட்டங்களையும், கேஷன பொன்சேகா 76(120) ஓட்டங்களையும் பெற்றுக்கொண்டனர்.
இலங்கை அணி சார்பில் பந்து வீச்சில் விஹாஸ் தெவ்மிக, பிரவீன் மனிஷ ஆகியோர் தலா 3 விக்கெட்டுக்களையும், மனுஜ சன்துக்க 2 விக்கெட்டுக்களையும் கைப்பற்றினர்.
இலங்கை அணியின் சாருஜன் சண்முகநாதன் முதல் இன்னிங்ஸிற்காக 10(10) ஓட்டங்களையும், 2வது இன்னிங்ஸிற்காக 16(32) ஓட்டங்களையும் பெற்றுக்கொண்டார்.