ஒலிம்பிக்: இலங்கையின் கைல் அபேசிங்க, வீரேன் நெட்டசிங்க இருவரும் தோல்வி 

பிரான்ஸ், பாரிஸில் நடைபெற்று வரும் ஒலிம்பிக் போட்டிகளில் இலங்கையை பிரதிநிதித்துவப்படுத்தும் கைல் அபேசிங்க நீச்சல் போட்டிகளில் ஆடவருக்கான 100 மீற்றர்  பிரீஸ்டைல்(Freestyle) பிரிவின் ஆரம்பகட்ட போட்டியில்(Heat 4) இறுதி இடத்தை பெற்றுள்ளார். 

இன்று(30.07) நடைபெற்ற நீச்சல் போட்டியை 51:42 வினாடிகளில் நிறைவு செய்த கைல் அபேசிங்கவினால் 8ம் இடமான இறுதி இடத்தினையே பெற்றுக்கொள்ள முடிந்தது. 

இதேவேளை, இலங்கையின் இளம் பூப்பந்தாட்ட வீரர் வீரேன் நெட்டசிங்க பங்கேற்ற ஆரம்பகட்ட போட்டிகளில் இரண்டாவது போட்டியிலும் தோல்வியடைந்துள்ளார். 

இன்று(30.07) நடைபெற்ற இந்த போட்டியில் ஸ்பெயின் நாட்டின் பி. அபியனிடம் இலங்கையின் வீரேன் நெட்டசிங்க தோல்வியுற்றார். போட்டியின் முதல் இரண்டு செட்களையும் பி. அபியன் 21-09, 21-19 என்ற ரீதியில் கைப்பற்றி போட்டியில் வெற்றி பெற்றார். 

வீரேன் நெட்டசிங்க, ஆரம்பகட்ட போட்டிகளில் முதல் போட்டியிலும் உலகத் தரவரிசையில் 7ம் இடத்திலுள்ள மலேசியாவின் Zii Jia Lee யிடம் தோல்வியடைந்திருந்ததுடன், அடுத்த சுற்றுக்கு முன்னேறும் வாய்ப்பை இழந்தார்.  

ஒலிம்பிக் போட்டிகளில் தற்போதைய நிலவரப்படி, பதக்கப் பட்டியலில் ஜப்பான் 7 தங்கம், 2 வெள்ளி, 4 வெண்கலம் உள்ளடங்களாக 13 பதக்கங்களுடன் முதலிடத்திலுள்ளது.

சீனா 6 தங்கம், 6 வெள்ளி, 2 வெண்கலப் பதக்கங்களுடன் இரண்டாம் இடத்திலும், பிரான்ஸ் 5 தங்கம், 8 வெள்ளி, 4 வெண்கலப் பதக்கங்களுடன் மூன்றாம் இடத்திலும் உள்ளது. 

இந்தியா 2 வெண்கலப் பதக்கங்களுடன் 31ம் இடத்திலுள்ளது.