அயர்லாந்துக்கு எதிரான தொடரில் இலங்கை மகளிர் அணி முன்னிலை 

அயர்லாந்துக்கு சுற்றுப்பயணம் மேற்கொண்டுள்ள இலங்கை மகளிர் அணிக்கும், அயர்லாந்து மகளிர் அணிக்கு இடையிலான டி20 தொடரின் முதலாவது போட்டியில் இலங்கை அணி வெற்றி பெற்றுள்ளது. 

அயர்லாந்து, டப்ளினில் நேற்று(11.08) நடைபெற்ற இந்த போட்டியின் நாணய சுழற்சியில் வெற்றி பெற்ற இலங்கை அணி களத்தடுப்பை தெரிவு செய்தது. 

அதன்படி, முதலில் துடுப்பெடுத்தாடிய அயர்லாந்து அணி 20 ஓவர்களில் 6 விக்கெட் இழப்பிற்கு 145 ஓட்டங்களைப் பெற்றுக்கொண்டது. அயர்லாந்து அணி சார்பில் கேபி லூயிஸ் 39(33) ஓட்டங்களையும், ஓர்லா பிரெண்டர்காஸ்ட் 29(27) ஓட்டங்களையும் பெற்றுக்கொண்டனர். 

இலங்கை அணி சார்பில் பந்துவீச்சில் இனோஷி பிரியதர்ஷினி 2 விக்கெட்டுக்களையும், உதேஷிகா பிரபோதனி, சுகந்திகா குமாரி ஆகியோர் தலா ஒரு விக்கெட்டினையும் பெற்றுக்கொண்டனர். 

146 ஓட்டங்களை வெற்றியிலக்காக கொண்டு பதிலுக்கு துடுப்பெடுத்தாடிய இலங்கை அணி 16.4 ஓவர்களில் 3 விக்கெட்டுக்களை மாத்திரம் இழந்து வெற்றியிலக்கை கடந்தது. இலங்கை அணி சார்பில் ஹர்ஷிதா சமரவிக்ரம 86(45) ஓட்டங்களையும், விஷ்மி குணரத்ன 30(34) ஓட்டங்களையும் பெற்றுக்கொண்டனர்.

இதன்படி, இலங்கை மகளிர் அணி 7 விக்கெட்டுக்கள் வித்தியாசத்தில் இந்த போட்டியில் வெற்றியீட்டியதுடன், 2 போட்டிகள் கொண்ட தொடரில் 1-0 என்ற ரீதியில் முன்னிலைப் பெற்றது. போட்டியின் ஆட்ட நாயகியாக இலங்கை அணியின் ஹர்ஷிதா சமரவிக்ரம தெரிவு செய்யப்பட்டார்.