மூன்று போட்டிகள் கொண்ட டெஸ்ட் தொடருக்காக இங்கிலாந்து சென்றுள்ள இலங்கை அணி பங்கேற்கும் பயிற்சிப் போட்டி நேற்று(14.08) ஆரம்பமாகியது.
இங்கிலாந்து லயன்ஸ் அணிக்கு எதிரான இந்த போட்டி இங்கிலாந்து, வொர்செஸ்டரில் இலங்கை நேரப்படி பிற்பகல் 3.30 மணிக்கு ஆரம்பமாகியது. போட்டியின் நாணய சுழற்சியில் வெற்றி பெற்ற இங்கிலாந்து லயன்ஸ் அணி களத்தடுப்பை தெரிவு செய்தது.
அதன்படி, முதலாவது இன்னிங்ஸிற்காக துடுப்பெடுத்தாட ஆரம்பித்த இலங்கை அணி 43.5 ஓவர்களில் சகல விக்கெட்டுக்களையும் இழந்து 139 ஓட்டங்களை மாத்திரம் பெற்றுக்கொண்டது. இலங்கை அணி சார்பில் திமுத் கருணாரத்ன 26(38) ஓட்டங்களையும், பிரபாத் ஜயசூரிய 20(45) ஓட்டங்களையும் பெற்றுக்கொண்டனர். ஏனைய வீரர்கள் 20 விட குறைவான ஓட்டங்களையே பெற்றுக்கொண்டனர்.
இங்கிலாந்து லயன்ஸ் அணி சார்பில் பந்துவீச்சில் சமன் அக்தர் 5 விக்கெட்டுக்களையும், ஜோஷ் ஹல் 3 விக்கெட்டுக்களையும் கைப்பற்றினர்.
பின்னர், முதலாவது இன்னிங்ஸிற்காக துடுப்பெடுத்தாட ஆரம்பித்த இங்கிலாந்து லயன்ஸ் அணி முதலாவது நாள் ஆட்டநேர முடிவின் போது 4 விக்கெட் இழப்பிற்கு 145 ஓட்டங்களைப் பெற்றுள்ளது. இங்கிலாந்து லயன்ஸ் அணி சார்பில் பென் மெக்கின்னி 46(40) ஓட்டங்களைப் பெற்றுக்கொண்டார்.
இலங்கை அணி சார்பில் பந்து வீச்சில் பிரபாத் ஜயசூரிய 3 விக்கெட்டுக்களை கைப்பற்றியுள்ளார்.
போட்டியின் முதலாவது நாள் ஆட்ட நேர முடிவில் இங்கிலாந்து லயன்ஸ் அணி 6 ஓட்டங்களினால் முன்னிலையிலுள்ளது. போட்டியின் இரண்டாம் நாள் ஆட்டம் இன்று(15.08) இலங்கை நேரப்படி பிற்பகல் 3.30 மணிக்கு ஆரம்பமாகவுள்ளது.
இலங்கை அணி: நிசன் மதுஷ்க, திமுத் கருணாரத்ன, குசல் மென்டிஸ், அஞ்சலோ மெத்தியூஸ், தினேஷ் சந்திமல், தனஞ்சய டி சில்வா(அணித் தலைவர்), சதீர சமரவிக்ரம, பிரபாத் ஜயசூரிய, மிலன் ரத்நாயக்க, கசுன் ராஜித, லஹிரு குமார