இலங்கை மற்றும் இங்கிலாந்து அணிகளுக்கிடையிலான முதலாவது டெஸ்ட் போட்டியின் இரண்டாம் நாள் நிறைவில் இங்கிலாந்து அணி 23 ஓட்டங்களினால் முன்னிலை பெற்றுள்ளது. நேற்று (21.08) இரு அணிகளுக்குமிடையிலான முதலாவது டெஸ்ட் போட்டி இங்கிலாந்திலுள்ள மஞ்செஸ்டர் ஓல்ட் டிரபோர்ட் மைதானத்தில் ஆரம்பித்து நடைபெற்று வருகிறது. நாணய சுழற்சியில் வெற்றி பெற்ற இலங்கை அணி துடுப்பாட்டத்தை தெரிவு செய்தது.
இரண்டாம் நாள் ஆட்ட நேரமுடிவில் இங்கிலாந்து அணி 61 ஓவர்களில் 6 விக்கெட்களை இழந்து 259 ஓட்டங்களை பெற்றுள்ளது. இதில் ஹரி ப்ரூக் 56 ஓட்டங்களையும், ஜோ ரூட் 42 ஓட்டங்களையும், டான் லோரன்ஸ் 30 ஓட்டங்களையும், ஜேமி ஸ்மித் 72 ஓட்டங்களையும், கஸ் அட்கின்சன் 4 ஓட்டங்களையும் பெற்றுள்ளனர்.
இலங்கை அணிக்காக பந்துவீச்சில் அசித்த பெர்னாண்டோ 3 விக்கெட்களையும், பிரபாத் ஜயசூரிய 2 விக்கெட்களையும், விஷ்வ பெர்னாண்டோ ஒரு விக்கெட்ட்டினையும் கைப்பற்றியுள்ளனர்.
முதல் இன்னிங்சில் துடுப்பாடிய இலங்கை அணி 74 ஓவர்களில் சகல விக்கெட்களையும் இழந்து 236 ஓட்டங்களை பெற்றது. இதில் தனஞ்ஜய டி சில்வா 74 ஓட்டங்களையும், தனது அறிமுக்கத்தை மேற்கொண்ட மிலான் ரத்நாயக்க 72 ஓட்டங்களை பெற்று அவரது முதலாவது அரைச்சதத்தை பூர்த்தி செய்துள்ளார். 8 ஆவது விக்கெட் இணைப்பாட்டத்திற்காக ஜோடி சேர்ந்த தனஞ்சய டி சில்வா மற்றும் மிலான் ரத்நாயக்க ஆகியோர் 63 ஓட்டங்களை இணைப்பாட்டமாக பகிர்ந்து இலங்கை அணியை மீட்டெடுத்தனர். தனஞ்சய டி சில்வா ஆட்டமிழந்ததுடன் 9 ஆவது விக்கெட்டிற்காக ஜோடி சேர்ந்த மிலான் ரத்நாயக்க மற்றும் விஷ்வ பெர்னாண்டோ ஆகியோர் 50 ஓட்டங்களை இணைப்பாட்டமாக பகிர்ந்தனர்.
ஆரம்பம் சரியாக அமையாத காரணத்தினாலேயே இலங்கை அணி தடுமாற வேண்டிய நிலை ஏற்பட்டது. நிஷான் மதுஷ்க 4 ஓட்டங்களையும், திமுத் கருணாரத்ன 2 ஓட்டங்களையும் பெற்றனர். அஞ்சலோ மத்தியூஸ் ஓட்டங்களை எதுவும் பெறாமல் ஆட்டமிழந்தார். குசல் மென்டிஸ் 24 ஓட்டங்களையும், தினேஷ் சந்திமால் 17 ஓட்டங்களையும், கமிண்டு மென்டிஸ் 12 ஓட்டங்களையும், பிரபாத் ஜயசூரிய 10 ஓட்டங்களையும், விஷ்வ பெர்னாண்டோ 13 ஓட்டங்களையும் பெற்றனர்.
இங்கிலாந்து அணிக்காக பந்துவீச்சில் க்றிஸ் வோக்ஸ், ஷொயீப் பஷீர் ஆகியோர் தலா 3 விக்கெட்களையும், கஸ் அட்கின்சன் 2 விக்கெட்களையும் கைப்பற்றினர்.
அணி விபரம்
இலங்கை அணி – தனஞ்சய டி சில்வா(அணித் தலைவர்), திமுத் கருணாரத்ன, நிசன் மதுஷ்க, குசல் மென்டிஸ், அஞ்சலோ மெத்தியூஸ், தினேஷ் சந்திமல், கமிந்து மென்டிஸ், அசித்த பெர்னாண்டோ, விஷ்வ பெர்னாண்டோ, மிலன் ரத்நாயக்க, பிரபாத் ஜயசூரிய
இங்கிலாந்து அணி – ஒலி பொப்(அணித் தலைவர்), ஹரி ப்ரூக், பென் டக்கெட், டான் லோரன்ஸ், ஜோ ரூட், ஜமி ஸ்மித், க்றிஸ் வோக்ஸ், கஸ் அட்கின்சன், மத்தியூ பொட்ஸ், ஷொயீப் பஷீர், மார்க் வூட்
