கஸ் அட்கின்சன் அதிரடி. இங்கிலாந்தின் துடுப்பாட்டம் நிறைவு

இலங்கை மற்றும் இங்கிலாந்து அணிகளுக்கு இடையிலான டெஸ்ட் தொடரின் இரண்டாவது போட்டியின் இரண்டாம் நாளில் இங்கிலாந்து அணி சகல விக்கெட்களையும் இழந்துள்ளது.

இங்கிலாந்து லோட்ஸ் மைதானத்தில் நேற்று(29.08) ஆரம்பமாகிய இந்த போட்டியின் நாணய சுழற்சியில் வெற்றி பெற்ற இலங்கை அணி களத்தடுப்பை தெரிவு செய்தது.

முதலாவது இன்னிங்சில் துடுப்பாடிய இங்கிலாந்து அணி 102 ஓவர்களில் சகல விக்கெட்களையும் இழந்து 427 ஓட்டங்களை பெற்றுள்ளது. இதில் ஆரம்ப துடுப்பாட்ட வீரர் டான் லோரன்ஸ் 9 ஓட்டங்களுக்கும், அணித் தலைவர் ஒலி பொப் 1 ஓட்டங்களுக்கு ஆட்டமிழந்தனர். மறுபுறம் பென் டக்கெட் 40 ஓட்டங்களுக்கும், ஹரி ப்ரூக் 33 ஓட்டங்களுக்கும், ஜமி ஸ்மித் 21 ஓட்டங்களுக்கும், க்றிஸ் வோக்ஸ் 6 ஓட்டங்களுக்கும் ஆட்டமிழந்தனர். அபாரமாக துடுப்பெடுத்தாடிய ஜோ ரூட் 143 ஓட்டங்களைப் பெற்றிருந்த போது ஆட்டமிழந்தார். இது அவரின் 33 ஆவது சதமாகும். இறுதி நேரத்தில் இங்கிலாந்து அணிக்காக கஸ் அட்கின்சன் அதிரடியாக துடுப்பாடி 118 ஓட்டங்களை பெற்று அவரது முதலாவது டெஸ்ட் சதத்தையும் முதலாவது முதல் தரப்போட்டி சதத்தையும் பூர்த்தி செய்துள்ளார். மத்தியூ பொட்ஸ் 21 ஓட்டங்களையும், ஒலி ஸ்டோன் 15 ஓட்டங்களையும், ஷொயிப் பஷீர் 7 ஓட்டங்களையும் பெற்றனர்.

இலங்கை அணி சார்பில் பந்துவீச்சில் அசித்த பெர்னாண்டோ 5 விக்கெட்களையும், மிலன் ரத்நாயக்க, லஹிரு குமார ஆகியோர் தலா 2 விக்கெட்டுக்களையும், பிரபாத் ஜயசூரிய ஒரு விக்கெட்டினையும் கைப்பற்றினர்.

இலங்கை அணி – தனஞ்சய டி சில்வா(அணித் தலைவர்), திமுத் கருணாரத்ன, நிசன் மதுஷ்க, பத்தும் நிசங்க, அஞ்சலோ மெத்தியூஸ், தினேஷ் சந்திமல், கமிந்து மென்டிஸ், அசித்த பெர்னாண்டோ, லஹிரு குமார, மிலன் ரத்நாயக்க, பிரபாத் ஜயசூரிய

இங்கிலாந்து அணி – ஒலி பொப்(அணித் தலைவர்), ஹரி ப்ரூக், பென் டக்கெட், டான் லோரன்ஸ், ஜோ ரூட், ஜமி ஸ்மித், க்றிஸ் வோக்ஸ், கஸ் அட்கின்சன், மத்தியூ பொட்ஸ், ஷொயீப் பஷீர், ஒலி ஸ்டோன்