2024ம் ஆண்டிற்கான மகளிர் டி20 உலகக் கிண்ணத் தொடரில் பங்களாதேஷ்க்கு எதிரான போட்டியில் மேற்கிந்திய தீவுகள் வெற்றி பெற்றுள்ளது. இந்த போட்டி ஷார்ஜா கிரிக்கெட் மைதானத்தில் இன்றிரவு(10.10) நடைபெற்றது.
போட்டியின் நாணய சுழற்சியில் வெற்றி பெற்ற மேற்கிந்திய தீவுகள் மகளிர் அணி களத்தடுப்பை தெரிவு செய்தது. அதன்படி முதலில் துடுப்பெடுத்தாடிய பங்களாதேஷ் 20 ஓவர்கள் நிறைவில் 8 விக்கெட் இழப்பிற்கு 103 ஓட்டங்களை மாத்திரம் பெற்றுக்கொண்டது. பங்களாதேஷ் சார்பில் அணித் தலைவி நிகர் சுல்தானா 39(44) ஓட்டங்களைப் பெற்றுக் கொள்ள ஏனைய வீரர்கள் குறைந்தளவு ஓட்டங்களுக்கு ஆட்டமிழந்தனர்.
மேற்கிந்திய தீவுகள் சார்பில் பந்து வீச்சில் கரிஷ்மா ராம்ஹரக் 4 விக்கெட்டுக்களையும், அபி பிளெட்சர் 2 விக்கெட்டுக்களையும் கைப்பற்றினர்.
104 ஓட்டங்களை வெற்றியிலக்காக கொண்டு பதிலுக்கு துடுப்பெடுத்தாடிய மேற்கிந்திய தீவுகள் மகளிர் அணி 12.5 ஓவர்களில் 2 விக்கெட்டுக்களை இழந்து வெற்றியிலக்கை கடந்தது.
மேற்கிந்திய தீவுகள் சார்பில் ஹேய்லி மெத்யூஸ் 34(22 )ஓட்டங்களையும், ஸ்டபனி டெய்லர் 27(27) ஓட்டங்களையும் பெற்றுக்கொண்டனர்.
இதன்படி, மேற்கிந்திய தீவுகள் மகளிர் அணி 8 விக்கெட்டுக்களினால் அபார வெற்றியீட்டியது. போட்டியின் ஆட்ட நாயகியாக மேற்கிந்திய தீவுகளின் கரிஷ்மா ராம்ஹரக் தெரிவு செய்யப்பட்டார்.
குழு Bயில் உள்ள மேற்கிந்திய தீவுகள் மகளிர் அணி பங்கேற்ற மூன்று போட்டிகளில் இரண்டில் வெற்றியீட்டி புள்ளிப்பட்டியலில் முதல் இடத்திற்கு முன்னேறியது.
