இலங்கை கிரிக்கெட் அணியின் கமிந்து மென்டிஸ், 2024ம் ஆண்டில் இரு முறை ஐசிசியின் மாதத்திற்கான சிறந்த வீரராகத் தேர்ந்தெடுக்கப்பட்ட முதலாவது கிரிக்கெட் வீரராகப் பதிவானார்.
இதற்கு முன்னர் மார்ச் மாதம் ஐசிசியின் சிறந்த வீரராகத் தெரிவு செய்யப்பட்ட கமிந்து மென்டிஸ், தற்பொழுது செப்டெம்பர் மாதத்திற்கான சிறந்த வீரராகவும் தெரிவு செய்யப்பட்டுள்ளார்.
இம்முறை ஐசிசியின் சிறந்த வீரருக்கான பரிந்துரை பட்டியலில் இலங்கையின் சுழற்பந்து வீச்சாளர் பிரபாத் ஜயசூரிய, அவுஸ்ரேலியாவின் துடுப்பாட்ட வீரரான டிராவிஸ் ஹெட் ஆகியோரும் உள்ளடக்கப்பட்டிருந்தனர். இருப்பினும், அண்மைக்காலமாகச் சிறப்பான துடுப்பாட்டத்தை வெளிப்படுத்தி வரும் கமிந்து மென்டிஸ் பரிந்துரையிலிருந்த ஏனைய இரு வீரர்களை பின் தள்ளி விருதைத் தன்வசப் படுத்திக் கொண்டார்.
செப்டெம்பர் மாதத்தில் இலங்கைக்காக 4 டெஸ்ட் போட்டிகளில் விளையாடிய கமிந்து மென்டிஸ், 451 ஓட்டங்களைப் பெற்றுள்ளார். இங்கிலாந்துக்கு எதிரான தொடரில் ஆறுதல் வெற்றியைப் பெற்றுக் கொள்ளவும், நியூசிலாந்து தொடரை இலங்கை கைப்பற்றவும் அவருடைய துடுப்பாட்டம் பெரும் பங்காற்றியிருந்தது.