இலங்கை மற்றும் நியூசிலாந்து அணிகளுக்கிடையிலான இரண்டாவது 20-20 போட்டி தம்புள்ளை ரங்கிரி சர்வதேசக் கிரிக்கெட் மைதானத்தில் நிறைவுக்கு வந்துள்ளது. கடுமையான போட்டிக்கு மத்தியில் நியூசிலாந்து அணி 05 ஓட்டங்களினால் வெற்றி பெற்று தொடரை 1-1 என வெற்றி சமன் செய்துள்ளது.
முதலில் துடுப்பாடிய நியூசிலாந்து அணி 19.3 ஓவர்களில் சகல விக்கெட்களையும் இழந்து 108 ஓட்டங்களை பெற்றது. வில் ஜங் 30 ஓட்டங்களையும், ஜோஷ் கிளர்க்சன் 24 ஓட்டங்களையும் பெற்றனர். இலங்கை அணியின் பந்துவீச்சில் வனிந்து ஹஸரங்க 4 விக்கெட்களையும், மதீஷ பத்திரன 3 விக்கெட்களையும், நுவான் துஷார 2 விக்கெட்களையும் கைப்பற்றியுள்ளனர்.
பதிலுக்கு துடுப்பாடிய இலங்கை அணி 19.5 ஓவர்களில் சகல விக்கெட்களையும் இழந்து 103 ஓட்டங்களை பெற்றுக்கொண்டது. பத்தும் நிஸ்ஸங்க இறுதி வரை போராடி 52 ஓட்டங்களை பெற்ற வேளையில் இறுதி ஓவரில் ஆட்டமிழந்தார். பானுக்க ராஜபக்ஷ 15 ஓட்டங்களை பெற்றுக்கொண்டார். இறுதி நேரத்தில் நிஸ்ஸங்கவுடன் இணைப்பாட்டம் ஒன்றை வழங்கிய மஹீஸ் தீக்ஷண 14 ஓட்டங்களை பெற்று இறுதியாக ஆட்டமிழந்தார். நியூஸிலாந்து அணியின் பந்துவீச்சில் லூக்கி பெர்குசன் 3 விக்கெட்களையும், கிளன் பிலிப்ஸ் ஆகியோர் 3 விக்கெட்களையும் கைப்பற்றினார்கள். பிலிப்ஸ் கைப்பற்றிய மூன்று விக்கெட்களும் இறுதி ஓவரில் கைப்பற்றப்பட்டன.
