அம்பாறை, காரைத்தீவு பிரதேசத்தில் உழவு இயந்திரம் வெள்ளத்தில் சிக்கியதில் 05 மாணவர்கள் உயிரிழந்துள்ளதுடன் மற்றுமொரு மாணவர் காணாமற்போன சம்பவம் தொடர்பில் நிந்தவூர் மத்ரஸா பாடசாலையின் அதிபர் மற்றும் ஆசிரியர் ஆகியோர் விளக்கமறியலில் வைக்கப்பட்டுள்ளனர்.
குறித்த மத்ரஸா பாடசாலையின் அதிபர், அதன் ஆசிரியர் ஒருவர் மற்றும் குறித்த உழவு இயந்திரத்தின் உதவியாளர்கள் இருவரும் நேற்று (28.11) பொலிஸாரால் கைது செய்யப்பட்டனர்.
அதன்படி நேற்று பிற்பகல் அவர்களை சம்மாந்துறை பதில் நீதவான் முன்னிலையில் ஆஜர்படுத்தியதையடுத்து மத்ரஸா பாடசாலை அதிபர் மற்றும் ஆசிரியர் ஆகியோரை எதிர்வரும் 2ஆம் திகதி வரை விளக்கமறியலில் வைக்குமாறு உத்தரவிடப்பட்டுள்ளது.
உழவு இயந்திரத்தின் உதவியாளர்கள் இருவரும் பிணையில் விடுவிக்கப்பட்டுள்ளதாக தெரிவிக்கப்படுகிறது.
கடந்த 26 ஆம் திகதி மத்ரசா பாடசாலை நிறைவடைந்ததன் பின்னர் குறித்த மாணவர்கள் வீட்டிற்கு செல்ல பஸ் இன்மையால், தலைமையாசிரியர் உழவு இயந்திரத்தில் செல்லுமாறு அறிவுறுத்தியதோடு அதற்காக பணமும் வழங்கியுள்ளமை விசாரணைகளின் போது தெரியவந்துள்ளது.
வெள்ளம் காரணமாக குறித்த வீதியில் பஸ் சேவைகள் இடம்பெறவில்லை என தெரிவிக்கப்படுகிறது.
இவ்வாறானதொரு பின்னணியில் பணத்திற்காக பயணிகளை ஏற்றிச் செல்லும் உழவு இயந்திரத்தில் மாணவர்களை அவர்களது வீடுகளுக்கு அழைத்துச் செல்லுமாறு அதிபர் பணிப்புரை வழங்கியுள்ளதாக தெரிவிக்கப்பட்டுள்ளது.
குறித்த வீதி ஆபத்தானது என்பதால் உழவு இயந்திரத்தில் குழந்தைகளை ஏற்றிச் செல்ல வேண்டாம் என இராணுவத்தினர் அறிவுறுத்தியிருந்தனர்.
11 மாணவர்களுடன் சென்ற உழவு இயந்திரம் வௌ்ளத்தில் சிக்கி கவிழ்ந்து விபத்துக்குள்ளானதில் 05 மாணவர்கள் மீட்கப்பட்டதோடு 06 மாணவர்கள் நீரில் மூழ்கி காணாமல் போயுள்ளனர். 12 வயதுக்கும் 16 வயதுக்கும் இடைப்பட்ட மாணவர்களே காணாமற் போயுள்ளனர்.
இதுவரை 5 மாணவர்களின் சடலங்கள் கண்டெடுக்கப்பட்டுள்ள நிலையில் மேலும் ஒரு மாணவனை தேடும் பணிகள் இடம்பெற்று வருகின்றன.
இது தவிர உழவு இயந்திர சாரதி மற்றும் மற்றுமொருவரின் சடலங்களும் கண்டெடுக்கப்பட்டுள்ளன.
