இலங்கை தென்னாபிரிக்கா அணிகளுக்கிடையில் நடைபெற்ற இரண்டாவது ஒரு நாள் சர்வதேசப் போட்டியில் இலங்கை அணி தோல்வியினை சந்தித்துள்ளது. இந்த தோல்வியின் மூலம் தொடர் 1-1 என சமநிலை அடைந்துள்ளது. மழை இடையூறு செய்த இந்த போட்டி 47 ஓவர்கள் அடங்கிய போட்டியாக மாற்றப்பட்டு ஆரம்பிக்கப்பட்டது. நாணய சுழற்சியில் வெற்றி பெற்று முதலில் துடுப்பாட்டிய தென்னாபிரிக்க அணி 6 விக்கெட்களை இழந்து 283 ஓட்டங்களை பெற்றது. இதில் ஜெனெமன் மலான் 121 ஓட்டங்களை பெற்றுக் கொண்டார். ஒன்பது போட்டிகளில் 3 சதங்களை இவர் பெற்றுள்ளார். ரீசா ஹென்றிக்ஸ் 51 ஓட்டங்களை பெற்றார். பந்துவீச்சில் இலங்கை அணி சார்பாக துஸ்மாந்த சமீர, சமிக்க கருணாரட்ன ஆகியோர் தலா 2 விக்கெட்களை கைப்பற்றினர். இலங்கை அணி ஆரம்ப விக்கெட்களை வேகமாக இழந்து துடுப்பாடிக்கொண்டிருந்த வேளையில் 25 ஓவரில் மழை குறுக்கிட்ட்து. இதன் காரணமாக 41 ஓவர்களில் 265 ஓட்டங்கள் என்ற வெற்றியிலக்கு இலங்கை அணிக்கு நிர்ணயிக்கப்பட்டது. இலங்கை 36.4 ஓவர்களில் சகல விக்கெட்களையும் இழந்து 197 ஓட்டங்களை மட்டுமே பெற்றது. துடுப்பாட்டத்தில் சரித் அசலங்க 77 ஓட்டங்களையும், சமிக்க கருணாரட்ன 23 ஓட்டங்களையும் பெற்றுக்கொடுத்தனர். தென்னாபிரிக்கா அணியின் பந்துவீச்சில் தனது முதலாவது ஐந்து விக்கெட் பெறுதியாக ரப்ரைஸ் ஷம்சி 5 விக்கெட்களையும், ககிஸோ ரபாடா 2 விக்கெட்களையும் கைப்பற்றினார்கள். தென்னாபிரிக்கா அணி டக் வேர்த் லூயிஸ் முறைப்படி 67 ஓட்டங்களால் வெற்றி பெற்றது.
