ஐக்கிய மக்கள் கூட்டமைப்பிலுள்ள பாராளுமன்ற உறுப்பினர்களான வேலுசாமி இராதாகிருஷ்ணன், உதயகுமார் ஆகியோர் ரணில் விக்ரமசிங்கவுடன் இணையவுள்ளதாகத் தெரிவித்த கருத்தை, தமிழ் முற்போக்கு கூட்டணியின் உபதலைவரும், மலையக மக்கள் முன்னணியின் தலைவருமான வேலுசாமி இராதாகிருஷ்ணன் மறுத்துள்ளார்.

கொழும்பில் நேற்று முன்தினம்(30.08) நடைபெற்ற ஐக்கிய மக்கள் சக்தியின் ஊடக சந்திப்பின் போதே அவர் இந்த விடயத்தினை தெரிவித்தார்.

இங்கு மேலும் கருத்து தெரிவித்த வேலுசாமி இராதாகிருஷ்ணன்,

“கண்டியிலிருந்து ரணிலுடன் சென்று இணைந்து கொண்ட நபர், தன்னுடன் மற்றவர்களையும் அழைத்துச் செல்ல முயற்சிக்கின்றார். ஐக்கிய மக்கள் சக்தி என்பது நாங்கள் உருவாக்கிய கட்சி, ஆகவே நாம் எக்காரணத்திற்காகவும் கட்சியிலிருந்து வெளியே செல்ல மாட்டோம். தமிழ் முற்போக்கு கூட்டணி சஜித் பிரேமதாசவுக்கு முழுமையான ஒத்துழைப்பை வழங்கும்.

ரணில் விக்ரமசிங்க ஜனாதிபதியாக வந்தால், தற்பொழுதுள்ள அமைச்சரவையே தொடர்ந்தும் செயற்படும். இதே அமைச்சரவையின் ஊழல் காரணமாகவே நாடு சீர்குலைந்தது. ஆகவே மீண்டும் ரணில் விக்ரமசிங்கவுக்கு வாக்களித்தால் 2022 ஏற்பட்ட நிலையே மீண்டும் ஏற்படும்” என அவர் தெரிவித்தார்.

The post ஐக்கிய மக்கள் சக்தி எம்மால் உருவாக்கப்பட்டது – வே.இராதாகிருஷ்ணன் appeared first on V MEDIA.

எங்களுக்கு மதுபான அனுமதிப் பத்திரங்கள் தேவையில்லை எனத் தொழிலாளர் தேசிய சங்கத்தின் தலைவரும், பாராளுமன்ற உறுப்பினருமான உதயகுமார் தெரிவித்துள்ளார்.

வாக்களித்த மக்களுக்குத் துரோகம் இழைத்து, பதவிக்கும், பணத்திற்கும், அனுமதிப்பத்திரங்களுக்கு விலை போனவர்கள், ஏனைய நபர்களும் அவர்களைப் போன்றே செயற்படுவார்கள் என நினைத்துக் கொண்டிருப்பதாக ஐக்கிய மக்கள் சக்தியின் ஊடக சந்திப்பின் போது சுட்டிக்காட்டியிருந்தார்.

பாராளுமன்ற உறுப்பினர்களான வேலுச்சாமி இராதாகிருஷ்ணன் மற்றும் எம். உதயகுமார் ஆகியோர் எதிர்வரும் செப்டெம்பர் 10ம் திகதி ஜனாதிபதி ரணில் விக்ரமசிங்கவிற்கு ஆதரவு வழங்கவுள்ளமை தொடர்பிலான அறிவிப்பை வெளியிடுவார்கள் எனப் பாராளுமன்ற உறுப்பினர் வேலுகுமார் அண்மையில் தெரிவித்திருந்தார்.

இவ்வாறு முன்வைக்கப்பட்ட கருத்துக்குப் பதிலளிக்கும் போதே பாராளுமன்ற உறுப்பினர் உதயகுமார் மேற்குறிப்பிடப்பட்டவாறு தெரிவித்திருந்தார்.

The post மதுபான அனுமதிப் பத்திரங்களுக்கு விலை போகின்றவர்கள் நாமல்ல – எம்.பி உதயகுமார் appeared first on V MEDIA.

பாராளுமன்ற உறுப்பினர்களான வேலுச்சாமி இராதாகிருஷ்ணன் மற்றும் எம். உதயகுமார் ஆகியோர் எதிர்வரும் செப்டெம்பர் 10ம் திகதி ஜனாதிபதி ரணில் விக்ரமசிங்கவிற்கு ஆதரவு வழங்கவுள்ளமை தொடர்பிலான அறிவிப்பை வெளியிடுவார்கள் என அண்மையில் ஜனாதிபதி ரணில் விக்ரமசிங்கவுடன் இணைந்து கொண்ட பாராளுமன்ற உறுப்பினர் வேலுகுமார் தெரிவித்தார்.

கொழும்பில் இன்று(27.08) நடைபெற்ற ஊடக சந்திப்பின் போது அவர் இந்த விடயத்தினை வெளிப்படுத்தினார்.

ஜனாதிபதி ரணில் விக்ரமசிங்கவினுடாகவே பெருந்தோட்டத் தொழிலாளர்களுக்கான 1,700 ரூபா சம்பளம் சாத்தியமாகி இருப்பதாகவும், எதிர்வரும் செப்டெம்பர் 10ம் திகதி அந்த கொடுப்பனவு பெருந்தோட்டத் தொழிலாளர்களுக்குக் கிடைக்கும் எனப் பாராளுமன்ற உறுப்பினர் வேலுகுமார் நம்பிக்கை வெளியிட்டார்.

இதன் பின்னர் பாராளுமன்ற உறுப்பினர்களான வேலுச்சாமி இராதாகிருஷ்ணன் மற்றும் எம். உதயகுமார் ஆகியோர்  ரணில் விக்ரமசிங்கவிற்கு ஆதரவு வழங்குவார்கள் எனவும் அவர் தெரிவித்தார்.

The post காணொளி: தமிழ் முற்போக்கு கூட்டணியின் இருவர் ஜனாதிபதிக்கு ஆதரவு – எம்.பி வேலுகுமார் appeared first on V MEDIA.

இலங்கைக்கு சுதந்திரத்தை தேடிக் கொடுத்த ஐக்கிய தேசிய கட்சி, ரணில் விக்ரமசிங்கவினுடைய தலைமையில் இல்லாதொழிக்க பட்டுள்ளதாக ஜனாதிபதி வேட்பாளர் விஜயதாச ராஜபக்‌ஷ தெரிவித்துள்ளார். 

சில வருடங்களுக்கு முன்னர் ரணில் விக்ரமசிங்க தன்னை அமைச்சரவையிலிருந்து நீக்கிய காலத்திலேயே இந்த விடயத்தை தெரிவித்ததாக, ஹம்பாந்தோட்டையில் நேற்று(19.08) நடைபெற்ற மக்கள் சந்திப்பின் போது விஜயதாச ராஜபக்‌ஷ சுட்டிக்காட்டியுள்ளார். 

இந்த விடயம் தொடர்பில் மேலும் கருத்து தெரிவித்த அவர்,  

“நான் எதிர்வு கூறி 2 வருடங்களுக்குள், பொதுத் தேர்தலின் போது ஐக்கிய தேசிய கட்சி காணாமல் போனது. அதைபோன்று, மொட்டுக் கட்சிக்கு இவ்வாறான நிலையே ஏற்படும் என கூறினேன். அதுவும் அவ்வாறே நடந்தது. 69 இலட்சம் வாக்குகளைப் பெற்றுக் கொண்ட கட்சி, ஜனாதிபதி தேர்தலுக்கு வேட்பாளர் ஒருவரின்றி தடுமாறியது. 

இன்று கட்சி அரசியல் நடைபெறுவதில்லை. ஐக்கிய தேசிய கட்சி தலைமையகமான ஶ்ரீ கொத்தவில் யானையை அகற்றி சிலிண்டரை வைத்துள்ளனர். இது தாயின் கழுத்தை அறுக்கும் செயலைப் போன்றது. இதனை பார்த்துக் கொண்டிருக்கும் டி.எஸ். சேனாநாயக்க ரணிலுக்கு சாபமளிப்பார்.  

நாட்டிற்கு சேவையாற்றிய யானையை கொன்று விட்டனர். தேர்தல் முடிவுகள் வரும் போது யானைக்கு இறுதிச் சடங்குகளை செய்ய வேண்டும்” என தெரிவித்துள்ளார்.

The post யானையை அழித்த ரணில் – விஜயதாச ராஜபக்‌ஷ appeared first on V MEDIA.

எதிர்வரும் ஜனாதிபதித் தேர்தலில் இலங்கை தொழிலாளர் காங்கிரஸ் ஜனாதிபதி ரணில் விக்ரமசிங்கவுக்கு ஆதரவளிப்பதற்கு தீர்மானித்துள்ள நிலையில், மக்கள் நலன் சார்ந்த விடயங்கள் தொடர்பில் இலங்கை தொழிலாளர் காங்கிரஸுக்கும் ஜனாதிபதிக்கும் இடையில் புரிந்துணர்வு ஒப்பந்தம் கைச்சாத்திடவுள்ளதாக இலங்கை தொழிலாளர் காங்கிரஸின் தரைவரும் கிழக்கு மாகாண ஆளுநருமான செந்தில் தொண்டமான் தெரிவித்தார். 

இலங்கை தொழிலாளர் காங்கிரஸின் தேசிய சபையில் ஜனாதிபதி ரணில் விக்ரமசிங்கவுக்கு ஆதரவளிப்பதாக ஒருமனதாக தீர்மானிக்கப்பட்டதாகவும் ஜனாதிபதி ஊடகப் பிரிவில் இன்று(19.08) நடைபெற்ற ஊடக சந்திப்பின் போது ஆளுநர் செந்தில் தொண்டமான் தெரிவித்தார்.

கட்சியின் தேசிய சபை உறுப்பினர்கள் மக்கள் நலன் சார்ந்த பல்வேறு கோரிக்கைகளை முன் வைத்திருந்ததாகவும், இந்த கோரிக்கைகள் தொடர்பில் ஜனாதிபதியுடன் கலந்துரையாடியதாகவும் அவர் கூறினார். 

இதன்போது, மக்கள் நலனுக்கு முன்னுரிமை கொடுப்பதாக ஜனாதிபதி உறுதியளித்துள்ள நிலையில், எதிர்க்காலத்தில் குறித்த விடயங்கள் புரிந்துணர்வு ஒப்பந்தங்களாக கைச்சாத்திடப்படும் என கிழக்கு மாகாண ஆளுநர் செந்தில் தொண்டமான் உறுதியளித்தார். 

The post மக்கள் நலனுக்காக ஜனாதிபதியுடன் புரிந்துணர்வு ஒப்பந்தம் – செந்தில் தொண்டமான் appeared first on V MEDIA.

ஜனாதிபதி ரணில் விக்கிரமசிங்க தூரநோக்கு சிந்தனைக்கு அமைவாக, வடமாகாண மக்களுக்கு பாதுகாப்பானதும் சுத்தமானதுமான குடிநீரை வழங்கும் வேலை திட்டத்தின் பிரகாரம்,மன்னார் மாவட்டத்தின் பாலியாறு நீர் திட்டம்(வெள்ளாங்குளம்) மற்றும் மல்லாவி நீர் வழங்கல், திட்டம் (மல்லாவி,முல்லைத்தீவு) ஆகிய திட்டங்களின் சம்பிரதாயபூர்வ ஆரம்ப நிகழ்வானது இன்று(15.05) காலை 9.30 மணிக்கு,தேசிய நீர் வழங்கல் மற்றும் வடிகாலமைப்புச் சபை, வெள்ளாங்குளத்தில் நடைபெற்றது.

நீர் வழங்கல் மற்றும் பெருந்தோட்ட உட்கட்டமைப்பு அபிவிருத்தி அமைச்சர், ஜீவன் தொண்டமான்,கடற்றொழில் அமைச்சர் டக்ளஸ் தேவானந்தா,வடமாகாண ஆளுநர் பி.எம்.எஸ் சாள்ஸ், நீர்ப்பாசனம் மற்றும் நீர் வழங்கல் அமைச்சர் சசீந்திர ராஜபக்‌ஷ,கிராமிய பொருளாதார அமைச்சர், காதர் மஸ்தான்,உயர்கல்வி இராஜாங்க அமைச்சர் சுரேன் ராகவன்,மற்றும் பாராளுமன்ற உறுப்பினர்கள், மக்கள் பிரதிநிதிகள், பொதுமக்கள் என பலரும் கலந்து கொண்டிருந்தனர். 

The post மன்னாரில் புதிய நீர்த் திட்டங்கள்  appeared first on V MEDIA.

மன்னார் தீவின் சுற்றுச் சூழல் காரணமாக, கனியவள மணல் அகழ்வுக்கான  சுற்றுச்சூழல் தாக்க ஆய்வறிக்கையைப் பெற அனுமதிக்க முடியாது என மக்கள் உறுதியாகக் கூறிய நிலையில்,  மன்னார் மாவட்டச் செயலகத்தில் இடம்பெற்ற கனியவள மணல் அகழ்வு தொடர்பான கூட்டம் கைவிடப்பட்டது.

மன்னார் தீவில் கனியவள மணல் அகழ்வு தொடர்பாக பொதுமக்களுக்கு விளக்கத்தினை அளிக்கும் படி மன்னார் அரசாங்க அதிபருக்கு ஜனாதிபதி செயலகத்திலிருந்து கிடைக்கப் பெற்ற வேண்டுகோளுக்கு அமைய  இக்கூட்டம் ஏற்பாடு செய்யப்பட்டிருந்தது.

இதற்கமைய அரசாங்க அதிபர் க.கனகேஸ்வரன் தலைமையில் கடந்த 13ம் திகதி பிற்பகல் 2 மணியளவில் மன்னார் மாவட்டச் செயலகத்தில் இதற்கான கூட்டம் இடம்பெற்றது.

இதில் கனியவள மணல் அகழ்வு நிறுவன அதிகாரிகள் உட்பட மன்னார் பொது அமைப்புக்களின் பிரதிநிதிகள் அரச திணைக்கள அதிகாரிகள், மதகுருமார்கள் மற்றும் பொதுமக்கள் என பலரும் கலந்து கொண்டிருந்த நிலையில், பொதுமக்களின் பலத்த எதிர்ப்புக்கு மத்தியில் கூட்டம் கைவிடப்பட்டது.

இது தொடர்பாக, மன்னார் மாவட்ட அரசாங்க அதிபர் க.கனகேஸ்வரன் ஊடகங்களுக்குத் தெரிவிக்கையில்,

“மன்னார் மாவட்டத்தில் அவுஸ்ரேலியாவை தளமாக கொண்டு இயங்குகின்ற கனியவள மணல் அகழ்வு நிறுவனத்தினால் மன்னார் தீவில் கனியவள மணல் அகழ்வை மேற்கொள்வதற்காக 2018 ஆம் ஆண்டு தொடக்கம் ஏற்பாடுகள் மேற்கொள்ளப்பட்டு, இன்று வரை இது தொடர்பான ஆய்வுகள் மன்னார் தீவில் முன்னெடுக்கப்பட்டு வருகின்றது.

இதை அடிப்படையாக வைத்து இங்கு தொடர்ந்து கனியவள மணல் அகழ்வை மேற்கொள்ளும் முகமாக ஏற்பாடுகள் மேற்கொள்ளப்படுவதற்கு முயன்று வருகின்ற நிலையில் சுற்றுச் சூழலில் ஏற்படும் பாதிப்பினைக் கருத்திற்கொண்டு, பொது மக்கள் தங்கள் எதிர்ப்பினைத் தெரிவிக்கும் நிலையில், மன்னார் தீவு மக்கள் மன்னார் தீவில் கணியவள மணல் அகழ்வு செய்ய விரும்பாத காரணத்தை சம்பந்தப்பட்ட அதிகாரிகளுக்கு நாங்கள் அறிக்கை மூலம் சமர்பிக்க இருக்கின்றோம்” எனத் தெரிவித்தார். 

The post மன்னாரில் கனியவள மணல் அகழ்விற்கு மக்கள் எதிர்ப்பு  appeared first on V MEDIA.

இந்தியன் பிரீமியர் லீக் தொடரின் குஜராத் டைடன்ஸ் அணிக்கு எதிரான போட்டியில் டெல்லி கேபிடல்ஸ் அணி வெற்றி பெற்றுள்ளது. 

அகமதாபத்தில் இன்று(17) நடைபெற்ற இந்த போட்டியின் நாணய சுழற்சியில் வெற்றி பெற்ற டெல்லி அணி களத்தடுப்பை தெரிவு செய்தது. 

அதன்படி, முதலில் துடுப்பெடுத்தாடிய குஜராத் அணி 17.3 ஓவர்களில் சகல விக்கெட்டுகளையும் இழந்து 89 ஓட்டங்களை மாத்திரம் பெற்றுக்கொண்டது.   

குஜராத் அணி சார்பில் ரஹித் கான் 31 ஓட்டங்களை பெற்றுக் கொள்ள, ஏனைய வீரர்கள் குறைந்தளவு ஓட்டங்களுக்கு ஆட்டமிழந்தனர். 

டெல்லி அணி சார்பில் பந்துவீச்சில் முகேஷ் குமார் 3 விக்கெட்டுகளையும், இஷாந்த் சர்மா மற்றும் டிரிஸ்டன் ஸ்டப்ஸ் ஆகியோர் தலா 2 விக்கெட்டுகளையும், கலீல் அஹமட் மற்றும் அக்சர் படேல் தலா ஒரு விக்கெட்டினையும் பெற்றுக்கொண்டனர். 

90 ஓட்டங்களை வெற்றி இலக்காக கொண்டு பதிலுக்கு துடுப்பெடுத்தாடிய டெல்லி அணி 8.5 ஓவர்களில் 4 விக்கெட்டுகளை மாத்திரம் இழந்து வெற்றி இலக்கை கடந்தது. 

டெல்லி அணி சார்பில் ஜேக் ஃப்ரேசர் 20 ஓட்டங்களையும், ஹாய் ஹோப் 19 ஓட்டங்களையும் மற்றும் ரிஷாப் பான்ட் 16 ஓட்டங்களையும் அதிகப்பட்சமாக பெற்றுக்கொண்டனர். 

குஜராத் அணி சார்பில் பந்துவீச்சில் சந்தீப் வாரியர் 2 விக்கெட்டுகளையும் ஸ்பென்சர் ஜான்சன் மற்றும் ரஹித் கான் தலா ஒரு விக்கெட்டினையும் கைப்பற்றினர். 

இதன்படி, இந்த போட்டியில் டெல்லி கேபிடல்ஸ் அணி 6 விக்கெட்டுகளினால் வெற்றியீட்டியதுடன், போட்டியின் ஆட்ட நாயகனாக டெல்லி அணித் தலைவர் ரிஷப் பாண்ட் தெரிவு செய்யப்பட்டார். 

இந்த போட்டியில் வெற்றியீட்டியதன் ஊடாக டெல்லி கேபிடல்ஸ் அணி, ஐ.பி.எல் தொடரின் தரவரிசைப் பட்டியலில் 6 புள்ளிகளுடன் 6ம் இடத்திற்கு முன்னேறியுள்ளதுடன், குஜராத் டைட்டன்ஸ் அணி 6 புள்ளிகளுடன் 7ம் இடத்திற்கு பின் தள்ளப்பட்டுள்ளது. 

இதேவேளை, ஐ.பி.எல் தொடரின் நாளைய(18) போட்டியில் பஞ்சாப் கிங்ஸ் மற்றும் மும்பை இந்தியன்ஸ் அணிகள் பலப்பரீட்சை நடத்தவுள்ளன. 

சண்டிகர் மைதானத்தில் நாளை(18) இரவு 7.30 மணிக்கு குறித்த போட்டி ஆரம்பமாகவுள்ளது. 

The post டெல்லி கேபிடல்ஸ் அபார பந்துவீச்சு – DC vs GT appeared first on V MEDIA.

இந்தியன் பிரீமியர் லீக் தொடரில் கொல்கத்தா நைட் ரைடர்ஸ் அணிக்கு எதிரான போட்டியில் சென்னை சூப்பர் கிங்ஸ் அணி வெற்றி பெற்றுள்ளது. 

இரு அணிகளுக்கு இடையிலான போட்டி சென்னை அணியின் சொந்த மைதானமான எம்.எ.சிதம்பரம் மைதானத்தில் இன்று(08) நடைபெற்றது. 

போட்டியின் நாணய சுழற்சியில் வெற்றி பெற்ற சென்னை அணி முதலில் களத்தடுப்பை தெரிவு செய்தது. 

அதன்படி, முதலில் துடுப்பெடுத்தாடிய கொல்கத்தா அணி 20 ஓவர்களில் 9 விக்கெட் இழப்பிற்கு 137 ஓட்டங்களைப் பெற்றுக்கொண்டது. 

கொல்கத்தா அணி சார்பில் ஸ்ரேயாஸ் ஐயர் 34 ஓட்டங்களையும், சுனில் நரைன் 27 ஓட்டங்களையும் மற்றும் ரகுவன்ஷி 24 ஓட்டங்களையும் அதிகப்பட்சமாக பெற்றுக்கொண்டார். 

சென்னை அணி சார்பில் பந்துவீச்சில் ஜடேஜா மற்றும் துஷார் தேஷ்பாண்டே தலா 3 விக்கெட்டுகளையும், முஸ்தாபிசூர் 2 விக்கெட்களையும் மற்றும் தீக்‌ஷன ஒரு விக்கெட்டினையும் கைப்பற்றிக் கொண்டனர். 

138 ஓட்டங்களை வெற்றி இலக்காக கொண்டு பதிலுக்கு துடுப்பெடுத்தாடிய சென்னை அணி 17.4 ஓவர்களில் 3 விக்கெட்டுகளை மாத்திரம் இழந்து வெற்றி இலக்கை கடந்தது. 

இதன்படி, சென்னை அணி இந்த போட்டியில் 7 விக்கெட்டுகளினால் வெற்றியீட்டியது. 

சென்னை சார்பில் அணி தலைவர் ருத்துராஜ் கெய்க்வாட் 67 ஓட்டங்களையும், டரில் மிட்செல் 25 ஓட்டங்களையும் மற்றும் சிவம் துபே 18 பந்துகளில் 28 ஓட்டங்களையும் பெற்றுக்கொண்டனர். 

கொல்கத்தா அணி சார்பில் பந்துவீச்சில் வைபவ் அரோரா 2 விக்கெட்டுகளையும் சுனில் நரைன் ஒரு விக்கெட்டினையும் கைப்பற்றிக் கொண்டனர். 

போட்டியின் ஆட்டநாயகனாக சென்னை அணியின் ஜடேஜா தெரிவு செய்யப்பட்டார்.

இந்த போட்டியில் வெற்றியீட்டிய சென்னை அணி ஐ.பி.எல் தொடரின் தரவரிசைப் பட்டியலில் 6 புள்ளிகளுடன் தொடர்ந்தும் 4 இடத்திலும், கொல்கத்தா அணி 6 புள்ளிகளுடன் 2ம் இடத்திலும் உள்ளது. 

ஐ.பி.எல் தொடரின் தரவரிசைப் பட்டியலில் ராஜஸ்தான் அணி 8 புள்ளிகளுடன் முதலிடத்தில் காணப்படுகின்றது. 

இதேவேளை, ஐ.பி.எல் தொடரின் நாளைய(09) போட்டியில் பஞ்சாப் கிங்ஸ் மற்றும் சன்ரைசர்ஸ் ஹைதராபாத் அணிகள் பலப்பரீட்சை நடத்தவுள்ளன. 

சண்டிகர் நகரின் முல்லன்பூர் மைதானத்தில் இரவு 7.30 மணிக்கு குறித்த போட்டி ஆரம்பமாகவுள்ளது. 

The post கொல்கத்தாவின் எதிர்பார்ப்புக்களை நொறுக்கிய சென்னை..! appeared first on V MEDIA.

ராஜ் சிவராஜின் இயக்கத்தில், பூவன் மதீசனின் இசையில், Black Board தயாரிப்பில் உருவாகியுள்ள வரும் டக் டிக் டோஸ் திரைப்படத்தின் “நாங்க நாங்க தான்” பாடல் தற்போது வெளியாகியுள்ளது.

நீங்களும் கண்டு மகிழலாம்…

Please share this and support.

The post வெளியானது டக் டிக் டோஸ் திரைப்படத்தின் “நாங்க நாங்க தான்” பாடல்! appeared first on V MEDIA.