வவுனியா சந்தை சுற்றுவட்ட வீதியிலும் பொதுச்சந்தையினை அண்மித்தும் அமைந்திருந்த வீதியோர மரக்கறி வியாபாரங்கள் மற்றும் ஏனைய வீதியோர தற்காலிக நிலையங்கள் நேற்று(03.07) அகற்றப்பட்டுள்ளன. இவற்றின் மூலம் அண்மைக்காலமாக மக்களின் பொதுப்போக்குவரத்திற்கு இடையூறு ஏற்பட்டு வந்ததுடன், அப்பகுதிகளில் தொடர்ச்சியாக வீதி விபத்துக்கள் இடம்பெற்று வருகின்றமையினை கருத்திற்கொண்டும், குறித்த வியாபாரிகளால் பொது மக்களின் சுகாதாரத்திற்கு அச்சுறுத்தல் ஏற்படுத்தும் வகையில் கழிவு நீர் வடிகாலமைப்பிற்கு அருகில் மரக்கறி வியாபாரம் முன்னெடுக்கப்பட்டு வந்தமையினை கருத்திற்கொண்டும் வவுனியா மாநகரசபை இந்த நடவடிக்கையினை எடுத்துள்ளது.

மேலும் இவ்விடயம் தொடர்பில், பொது மக்களிடமிருந்தும், சமூக ஆர்வலர்களிடமிருந்தும் தொடர்ச்சியாக முறைப்பாடுகள் மனக்கசபைக்கு மேற்கொள்ளப்பட்டு வந்தன. அதற்கமைவாக அண்மையில் பதவியேற்ற புதிய மாநகரசபை நிர்வாகம் கடந்த வாரம் மேற்குறிப்பிட்ட நடவடிக்கைளை நிறுத்துமாறும், தற்காலிக கொட்டகைகளை அகற்றுமாறும் அறிவுறுத்தல் வழங்கியிருந்தது. அதன்படி கொட்டகைகளும், வீதியோர வியாபாரங்கள் வவுனியா மாநகர சபையின் முதல்வர் சுந்தரலிங்கம் காண்டீபனின் பணிப்புரைக்கமைவாக, அகற்றப்பட்டது என வவுனியா மாநகரசபை தெரிவித்துள்ளது.

இனிவரும் காலங்களில் மக்களின் பொதுப்போக்குவரத்து மற்றும் பொதுச்சுகாதாரத்திற்கு அச்சுறுத்தலினை விளைவிக்கும் வகையில் செயற்படும் அனைத்து வீதியோர வியாபாரங்கள் தொடர்பில் மாநகர சபையினரால் தொடர் கவனம் செலுத்தப்படவுள்ளதுடன், குறித்த வியாபாரங்களுக்கு எதிராக மாநகர சபை கட்டளை சட்டத்திற்கிணங்க நடவடிக்கை எடுக்கப்படும் என்பதனையும், இவ் நடவடிக்கைகள் தொடர்ச்சியான முறையில் மக்களின் கோரிக்கைக்கமைவாக நடைமுறைப்படுத்தப்படும் எனவும் வவுனியா மாநகரசபை அறிவித்துள்ளது.

The post வவுனியா சந்தை சுற்றுவட்ட வீதி கொட்டகைகள், வீதியோர வியாபாரங்கள் அகற்றபப்ட்டன appeared first on V MEDIA.

வவுனியாவில் ஸ்பா நிலையம் ஒன்று திறக்கப்படுவதற்கான பெயர் பலகை இன்று நாட்டப்பட்டது. இதற்கான அனுமதி பெறப்படவில்லை என தெரிவித்து சம்பவ இடத்துக்கு சென்ற மாநகரசபை முதல்வர், மற்றும் உப முதல்வர் ஆகியோர் குறித்த பெயர் பலகையை அகற்றியுள்ளனர்.

கண்டி வீதியில் இந்த நிலையம் திறப்பதற்கான ஏற்பாடுகள் செய்யப்பட்டிருந்த நிலையிலேயே தடுக்கப்பட்டுள்ளது.

The post வவுனியாவில் ஸ்பா நிலைய ஆரம்பம் தடுக்கப்பட்டது appeared first on V MEDIA.

வவுனியா தெற்கு தமிழ் பிரதேசசபையின் எதிர்கால செயற்பாடுகள் மற்றும் வேலைத்திட்டங்கள் தொடர்பில் வவுனியா மாவட்ட அரசாங்க அதிபர் சரத் சந்திரசேகர மற்றும் மேலதிக அரசாங்க அதிபர் நா.கமலதாசன் ஆகியோரை இலங்கைத் தமிழ் அரசுக் கட்சியின் வன்னி மாவட்ட பாராளுமன்ற உறுப்பினர் மருத்துவர் ப.சத்தியலிங்கம் மற்றும் வவுனியா தெற்கு தமிழ் பிரதேசசபையின் தவிசாளர் பா.பாலேந்திரன் ஆகியோர் இன்று மாலை (02.07.2025) வவுனியா மாவட்ட செயலகத்தில் சந்தித்து கலந்துரையாடினர்.

இதன்போது வவுனியா தெற்கு தமிழ் பிரதேசசபையினால் முன்னெடுக்கப்படும் வேலைத்திட்டங்களுக்கு மாவட்ட செயலகத்தினால் பூரண ஒத்துழைப்பு வழங்கப்படும் என அரசாங்க அதிபர் தெரிவித்ததுடன் புதிய தவிசாளருக்கு தனது வாழ்த்துக்களையும் தெரிவித்திருந்தார்.

The post வவுனியா மாவட்ட அரசாங்க அதிபர், பிரதேசசபை தவிசாளர் சந்திப்பு appeared first on V MEDIA.

வவுனியா, மாநகரசபை எல்லைக்குள் அமைந்துள்ள கடைகளுக்கு முன்பக்கமாக மேலதிகமாக அமைக்கப்பட்டுள்ள மேலதிக கொட்டகைகளை அகற்றுமாறு மாநகரசபை அறிவித்துள்ளது. இவ்வாறன தற்காலிக கொட்டகைகள் நடந்து செல்லும் பாதசாரிகளுக்கு இடையூறுகளை ஏற்படுத்துகின்றன. அண்மையில் புதிய மாநகரசபை பொறுப்பேற்று புதிய உறுப்பினர்கள் நகரப்பகுதிகளில் இந்த நடவடிக்கைகளை பார்வையிட்டனர். அதனை தொடர்ந்து இந்த அறிவித்தல் வெளியிடப்பட்டுள்ளது.

தற்காலிக கொட்டகைகளை அகற்ற தவறும் பட்சத்தில் நடவடிக்கை எடுக்கப்படுமென குறித்த பொது அறிவிப்பில் தெரிவிக்கப்பட்டுள்ளது. மாநகர முதல்வரின் அறிவிக்கப்பாக வெளியிடப்பட்டுள்ள அறிவித்தலில் இதனை அகற்றுவதற்கான கால எல்லை குறிப்பிடப்படவில்லை.

The post வவுனியா கடைகளில் மேலதிக கொட்டகைகளை அகற்ற அறிவித்தல் appeared first on V MEDIA.

கடற்றொழில், நீரியல் மற்றும் கடல்வளங்கள் பிரதி அமைச்சர் ரத்ன கமகேயின் தலைமையில் முல்லைத்தீவு மாவட்ட மீனவர் ஒருங்கிணைப்புக் குழு கூட்டம் நேற்று (ஜூன் 25.06) முல்லைத்தீவு மாவட்ட செயலகத்தில் நடைபெற்றது.

முல்லைத்தீவு மாவட்ட செயலாளர் அவர்களின் ஏற்பாட்டில் நடைபெற்ற இக்கூட்டத்தில் பிரதேச செயலாளர்கள், சம்பந்தப்பட்ட அரச அதிகாரிகள் மற்றும் மீனவர் அமைப்பு பிரதிநிதிகள் உட்பட பல தரப்பினரும் கலந்துகொண்டனர். மீன்பிடி அமைச்சின் கீழ் இயங்கும் அனைத்து நிறுவனங்களும், மீன்பிடித் தொழிலுடன் தொடர்புடைய ஏனைய திணைக்களங்கள் மற்றும் நிறுவனங்களும் இக்கூட்டத்தில் பரந்துபட்ட அளவில் பங்கேற்றன.

இந்திய இழுவைப் படகுகளால் மேற்கொள்ளப்படும் சட்டவிரோத மீன்பிடி நடவடிக்கைகள் மற்றும் அதனால் ஏற்படும் சேதங்கள் குறித்து மீனவர் அமைப்பு பிரதிநிதிகள் கருத்துகளை முன்வைத்தனர்.

உள்நாட்டு சட்டவிரோதச் செயல்கள்: உரிமம் இன்றி மீன்பிடி நடவடிக்கைகளில் ஈடுபடுதல், சுருக்கு மடி வலைகள் போன்ற தடை செய்யப்பட்ட வலைகள் மற்றும் வெடிபொருட்கள், லைட் கோர்ஸ் மீன்பிடி முறைகள் போன்ற அழிவுகரமான முறைகளைப் பயன்படுத்துதல் குறித்தும் கவனம் செலுத்தப்பட்டது. லைட் கோர்ஸ் மீன்பிடி முறைகளால் சிறிய மீன் குஞ்சுகள் கூட அழிக்கப்படுவதால், எதிர்கால வளங்களுக்கு சேதம் ஏற்படுவதாக சுட்டிக்காட்டப்பட்டது.

இதுவரை இடம்பெற்ற அனைத்து சட்டவிரோத மீன்பிடி நடவடிக்கைகளையும் முழுமையாக நிறுத்த நடவடிக்கை எடுப்பதாக பிரதி அமைச்சர் ரத்ன கமகே வலியுறுத்தினார். கடற்றொழில் மற்றும் நீரியல் வளங்கள் திணைக்களம், பொலிஸ் மற்றும் கடற்படையின் ஒத்துழைப்புடன் இந்த சட்டவிரோதச் செயல்களை ஒடுக்க நடவடிக்கை எடுக்கப்படும் என்றும் அவர் கூறினார். இந்திய இழுவைப் படகுகளால் மேற்கொள்ளப்படும் சட்டவிரோத மீன்பிடி நடவடிக்கைகளை கட்டுப்படுத்த கடற்படையின் தொடர்ச்சியான ஒத்துழைப்பை மேலும் வலுப்படுத்துமாறும் பிரதி அமைச்சர் தயவுடன் கேட்டுக்கொண்டார்.

பாரம்பரிய மடிவலை தொழிலில் டிராக்டர்கள் பயன்படுத்தப்படுவதால் கடற்கரைக்கு ஏற்படும் சேதங்கள் மற்றும் மணல் அகழ்வு போன்ற பல சுற்றுச்சூழல் பிரச்சினைகளும் இங்கு வெளிப்படுத்தப்பட்டன.

முல்லைத்தீவு பிரதேசத்தில் நந்திக்கடல் ஆழி மற்றும் நயினார்குளம் ஆழி போன்ற ஆழிகளை துப்பரவு செய்யும் நடவடிக்கைகள் ஏற்கனவே மேற்கொள்ளப்பட்டுள்ளன. மேலும் துப்பரவு செய்து, விஞ்ஞானபூர்வமாக ஆழப்படுத்துவதன் அவசியமும் வலியுறுத்தப்பட்டது. 2026 ஆம் ஆண்டு வரவுசெலவுத் திட்டத்தில் ஆழிகள் அபிவிருத்திக்கான நிதி ஒதுக்கீடுகளை வழங்க எதிர்பார்க்கப்படுகிறது. அத்துடன் கழிவுப் பொருட்களை முறையாக அகற்றுவதற்கு ஒரு விசேட பொறிமுறையின் அவசியம் வலியுறுத்தப்பட்டது.

கலங்கரை விளக்கம் (Lighthouse) இல்லாதது, மாடிவலை முறைகளுக்கான நிலங்கள் மற்றும் உறுதிப்பத்திரங்களை வழங்குவதன் அவசியம், மற்றும் மீனவ படகுகளுக்கான எரிபொருள் நிரப்பும் நிலையத்தின் அவசியம் போன்ற மீனவர்கள் எதிர்கொள்ளும் பிரச்சினைகள் குறித்தும் கலந்துரையாடப்பட்டது. எரிபொருள் நிரப்பும் நிலையம் குறித்து பெற்றோலியக் கூட்டுத்தாபனத்துடன் கலந்துரையாடி தேவையான ஏற்பாடுகளை செய்துள்ளதாக பிரதி அமைச்சர் தெரிவித்தார்.

மீனவர் சமூகத்தை வலுப்படுத்துதல் மற்றும் எதிர்காலத் திட்டங்கள்
மீனவர்கள் மற்றும் மீன்பிடித் தொழிலில் ஈடுபடும் பெண்களுக்கு, புதிய வருமான வழிகளை கண்டறியவும், தொழில்களை மேம்படுத்தவும், ஐந்து லட்சம் ரூபாய் வரை கடன் வசதிகளை வழங்கும் முன்மொழியப்பட்ட கடன் திட்டம் குறித்து இங்கு தெளிவுபடுத்திய பிரதி அமைச்சர் கௌரவ ரத்ன கமகே, அதற்காக அனைவரும் முன்வருமாறு அழைப்பு விடுத்தார்.

இந்த மாவட்ட மீனவர் ஒருங்கிணைப்புக் குழு கூட்டம் மூன்று மாதங்களுக்கு ஒருமுறை நடத்த எதிர்பார்க்கப்படுகிறது. இதன் மூலம், மீனவர்கள் தங்களின் பொதுப் பிரச்சினைகளை சம்பந்தப்பட்ட அதிகாரிகளிடம் (உதவிப் பணிப்பாளர், திட்டமிடல் அதிகாரி) முன்வைத்து, தீர்வு காணும் வாய்ப்பை அமைச்சகம் வழங்கும் என்றும் தெரிவிக்கப்பட்டது.

இந்நிகழ்வில் முல்லைத்தீவு மாவட்ட செயலாளர், முல்லைத்தீவு மேலதிக மாவட்ட செயலாளர், அனைத்துப் பிரதேச செயலாளர்கள், இலங்கை பொலிஸ் மற்றும் இராணுவம், கடற்படைப் பிரதிநிதிகள். அத்துடன், மீன்பிடி அமைச்சின் கீழ் இயங்கும் தேசிய நீரியல் வள ஆராய்ச்சி மற்றும் அபிவிருத்தி நிறுவனம் (NARA), தேசிய நீரியல் வளர்ப்பு அபிவிருத்தி அதிகார சபை (NAQDA), இலங்கை மீன்பிடித் துறைமுகக் கூட்டுத்தாபனம் (CFHC), Cey-Nor நிறுவனம், NorthSea நிறுவனம், திணைக்களம், கரையோர பாதுகாப்பு மற்றும் கடலோர வள முகாமைத்துவத் திணைக்களம் (CCD) ஆகிய நிறுவனங்களின் அதிகாரிகளும், மீனவர் அமைப்புக்களின் பிரதிநிதிகளும் கலந்துகொண்டனர்.

The post முல்லைத்தீவு மீனவர் பிரச்சினைகளுக்கு விரைவான தீர்வு: கடற்றொழில் பிரதியமைச்சர் appeared first on V MEDIA.

மன்னார் நகரப்பகுதியில் நிறுவப்பட்டிருந்த தமிழரசுக் கட்சியின் ஸ்தாபகர் தந்தை செல்வாவின் சிலை சேதமாக்கப்பட்டுள்ளது. நேற்றைய தினம்(24.06) மன்னாரில் நடைபெற்ற உள்ளுராட்சி மன்றங்களின் ஆட்சியாளர்கள் தேர்வின் பின்னரே இச் சம்பவம் நிகழ்ந்துள்ளதாக சந்தேகம் வெளியிடப்பட்டுள்ளது.

விஷமிகளால் நடாத்தப்பட்டுள்ள இந்த சிலை உடைப்பு சம்பவம் பின்னனியிலிருந்து ஏவப்பட்டே நடைபெற்றுள்ளதாகத்  தமிழரசுக் கட்சியின் மன்னார் மாவட்ட இணைப்பாளரும் முன்னாள் பாராளுமன்ற உறுப்பினருமான சாள்ஸ் நிர்மலநாதன் குற்றம் சாட்டியுள்ளார்.

செவ்வாய் கிழமை இரவு நடைபெற்ற இச்சம்பவம் தொடர்பாக சந்தேகத்தின் பேரில் ஒருவர் கைது செய்யப்பட்டுள்ளதாகத் தெரிவிக்கப்படுகிறது. கடந்த உள்ளூராட்சி மன்றத் தேர்தலில் மன்னார் மாவட்டத்தில் தமிழரசுக் கட்சி சில உள்ளுராட்சி மன்ற சபைகளில், மக்களின் வாக்குகளால் முன்னிலையில் இருந்தது.

இருந்தபோதிலும் தமிழரசுக் கட்சியின் உறுப்பினர்கள் முரண்பாடு மற்றும் பொறுப்பற்ற தன்மையாலும் அக்கட்சியினால் மன்னாரில் ஐந்து உள்ளுராட்சி சபைகளில் ஒரு சபையையும் தனதாக்கிக் கொள்ள முடியவில்லை.

நேற்றைய தினம் (24.05) மன்னாரில் உள்ள மூன்று உள்ளூராட்சி மன்றங்களில் தவிசாளர் உப தவிசாளர் தெரிவில் தமிழரசுக் கட்சி ஒன்று அல்லது இரண்டையாவது கைப்பற்றும் என்ற எதிர்பார்ப்பில் மக்கள் இருந்தபோதும் தேசிய மக்கள் சக்தி , ஜனநாயக தமிழ்த் தேசிய கூட்டமைப்பு மற்றும் அகில இலங்கை மக்கள் காங்கிரஸ் இணைந்து  சபைகளைக் கைப்பற்றியிருந்தது.

இந்நிலையில், தேசியம் பேசி வந்த தமிழ்க் கட்சிகள் அரசியல் மேடைகளில் பிரச்சாரக் கூட்டங்களில் பேசி வந்ததைப் போலவே மன்னாரில் உள்ளுராட்சி மன்றத் தவிசாளர் மற்றும் உப தவிசாளர் தெரிவில் ஒன்றிணைந்து செயற்படுவார்கள் என்ற எதிர்பார்ப்போடு காத்திருந்த வேளை பெரும் ஏமாற்றத்திற்குட்படுத்தப் பட்டுள்ளதாக தமிழ் மக்கள் கவலை வெளியிட்டுள்ளனர்.

இந்த நிலையிலேயே மன்னார் நகரில் நீண்டகாலமாக கம்பீரமாக காட்சியளித்து வந்த தந்தை செல்வாவின் சிலையின் தலை துண்டிக்கப்பட்டுள்ள சம்பவமானது மன்னார் மக்களை விசனத்தில் ஆழ்த்தியுள்ளது.

The post துண்டிக்கப்பட்ட தந்தை செல்வாவின் தலை appeared first on V MEDIA.

மன்னார் நகர  சபையின் தவிசாளர் மற்றும் உப  தவிசாளரை தெரிவு செய்வதற்கான அமர்வு இன்று (24.06)செவ்வாய்க்கிழமை காலை 11.30 மணியளவில்  வடக்கு மாகாண உள்ளூராட்சி ஆணையாளர் தேவந்தினி பாபு தலைமையில் மன்னார் நகர சபையில் நடைபெற்றது.

இதன் போது தவிசாளர் தெரிவிற்காக தமிழ் மக்கள் கூட்டணி கட்சியின்  உறுப்பினர் ஞானப்பிரகாசம் அன்ரனி டேவிட்சன் மற்றும்  ஜனநாயக தமிழ் தேசிய கூட்டமைப்பு  உறுப்பினர் டானியல் வசந்தன் ஆகியோரது பெயர்கள் முன் மொழியப்பட்ட நிலையில், தமிழ் மக்கள் கூட்டணி கட்சியின்  உறுப்பினர் ஞானப்பிரகாசம் அன்ரனி டேவிட்சன் 06 வாக்குகளும், ஜனநாயக தமிழ் தேசிய  கூட்டமைப்பு  உறுப்பினர் டானியல் வசந்தன் 08 வாக்குகளும் பெற்றிருந்த நிலையில்,கூடிய வாக்குகளை பெற்ற ஜனநாயக தமிழ் தேசிய  கூட்டமைப்பு  உறுப்பினர் டானியல் வசந்தன் மன்னார் நகர முதல்வராகத் தெரிவு செய்யப்பட்டார்.இவருக்கு அகில இலங்கை மக்கள் காங்கிரஸ் மற்றும் தேசிய மக்கள் சக்தி ஆதரவு வழங்கி இருந்தது.

தொடர்ந்து இடம்பெற்ற உப தவிசாளர் தெரிவில் அகில இலங்கை மக்கள் காங்கிரஸ் கட்சி உறுப்பினர்  நூர் முகம்மது உஷைன் மற்றும் இலங்கைத் தமிழரசு கட்சி உறுப்பினர் சோமநாதன் பிரசாத் ஆகியோரது பெயர்கள் முன்மொழியப்பட்டது.

இந்த வாக்களிப்பின் போது   அகில இலங்கை மக்கள் காங்கிரஸ் கட்சி உறுப்பினர்  நூர் முகம்மது, முகம்மது உஷைன் 08 வாக்குகளையும் இலங்கைத் தமிழரசுக் கட்சி உறுப்பினர் சோமநாத் பிரசாத் 05 வாக்குகளையும் பெற்ற நிலையில் கூடுதல் வாக்குகள் பெற்ற நூர் முகம்மது முகம்மது உஷைன் மன்னார் நகர சபையின் உப தவிசாளராகத் தெரிவு செய்யப்பட்டார்.அவருக்கு ஜனநாயக தமிழ் தேசிய கூட்டமைப்பு மற்றும் தேசிய மக்கள் சக்தி ஆதரவு வழங்கி இருந்தது.

குறித்த தெரிவுகளின் போது பாராளுமன்ற உறுப்பினர்களான ரிஷாட் பதியுதீன், செல்வம் அடைக்கலநாதன், முன்னாள் பாராளுமன்ற உறுப்பினர் எஸ்.வினோ நோகராதலிங்கம் உள்ளிட்ட பலர் வருகை தந்திருந்தனர்.

ரோகினி நிஷாந்தன்
மன்னார் செய்தியாளர்

The post மன்னார் நகரசபை ஆட்சி அமைக்கப்பட்டது appeared first on V MEDIA.

ஜனநாயக தமிழ்த் தேசியக் கூட்டணியின் சார்பில் மன்னார் மாவட்டத்தில்   உள்ளூராட்சி மன்றங்களுக்குத் தெரிவு செய்யப்பட்ட உறுப்பினர்களின் சத்தியப்பிரமாண நிகழ்வு நேற்றைய தினம் (03.06) செவ்வாய்க்கிழமை மாலை மன்னாரில் இடம்பெற்றது.

தமிழீழ விடுதலை இயக்கம் ரெலோ கட்சியின் தலைவரும் வன்னி மாவட்ட பாராளுமன்ற உறுப்பினருமான செல்வம் அடைக்கலநாதன் தலைமையில் இடம்பெற்ற குறித்த நிகழ்வில்,

மன்னார் மாவட்டத்தில் உள்ள ஐந்து உள்ளூராட்சி மன்றங்களிலும் ஜனநாயகத் தமிழ்த் தேசியக் கூட்டணியில் போட்டியிட்டு வெற்றி பெற்றவர்கள் மற்றும் விகிதாசார உறுப்பினர்கள் கலந்து கொண்டு சத்திய பிரமாணம் செய்து கொண்டனர்.

இதன் போது தமிழ் தேசிய மக்கள் முன்னணியின் மன்னார் மாவட்ட அமைப்பாளர் ஜோன்சன் மற்றும் நானாட்டான் பிரதேச சபையின் சுயேட்சைக்குழு சார்பாக போட்டியிட்ட ஜி.எம்.சீலன் தலைமையிலான குழுவினரும் கலந்துகொண்டு ஆதரவு வழங்கியதோடு அவர்களது உறுப்பினர்களும் சத்தியப்பிரமாணம் செய்து கொண்டனர்.

குறித்த சத்தியபிரமாண நிகழ்வில் ஜனநாயக தமிழ் தேசிய கூட்டமைப்பின் மன்னார் மாவட்ட இணைப்பாளர் எஸ்.ஆர் குமரேஸ்,புளொட் அமைப்பின் மாவட்ட இணைப்பாளர் ஜேம்ஸ்,தமிழ் தேசிய மக்கள் முன்னணியின் மாவட்ட அமைப்பாளர் ஜோன்சன்,சுயேட்சை குழுவின் தலைவர் ஜி.எம்.சீலன்,ஆகியோர் கலந்து கொண்டனர்.

ரோகினி நிஷாந்தன்
மன்னார் செய்தியாளர்

The post மன்னாரில் உள்ளூராட்சி மன்ற உறுப்பினர்கள் சத்தியபிரமாணம் appeared first on V MEDIA.

இந்திய மீனவர்கள் இலங்கை கடற்பரப்புக்குள் அத்துமீறி நுழைந்து மீன்பிடி நடவடிக்கையில் ஈடுபடுவதைத் தடுப்பதற்கு தேவையான அனைத்து நடவடிக்கைகளும் முன்னெடுக்கப்படும் என கடற்றொழில், நீரியல் மற்றும் கடல் வளங்கள் அமைச்சர் இராமலிங்கம் சந்திரசேகர் தெரிவித்தார்.

இது தொடர்பில் இலங்கை கடற்படையினருக்கும் உரிய ஆலோசனைகள் வழங்கப்பட்டுள்ளதாகவும் அவர் தெரிவித்துள்ளார்.

யாழ். நெடுந்தீவு பகுதிக்கு நேற்று (29.04.2025) பயணம் மேற்கொண்டிருந்த அமைச்சர், மீனவ சங்கங்களின் பிரதிநிதிகளை சந்தித்து கலந்துரையாடினார்.

இதன்போது, இந்திய மீனவர்களின் அத்துமீறல் மற்றும் சட்டவிரோத மீன்பிடி நடவடிக்கையால் தமது வாழ்வாதாரத்துக்கு ஏற்படும் பாதிப்புகள் தொடர்பில் மீனவர்கள், அமைச்சரிடம் எடுத்துரைத்தனர்.

இந்திய மீனவர்களின் அத்துமீறலை தடுப்பதற்கு நிரந்தர பாதுகாப்பு பொறிமுறையொன்று அவசியம் எனவும் அவர்கள் சுட்டிக்காட்டினர்.

இதற்கு பதிலளித்த அமைச்சர், இந்திய மீனவர்களின் அத்துமீறலை தடுப்பதற்குரிய இராஜதந்திர நடவடிக்கை உட்பட அனைத்து நடவடிக்கைகளும் முன்னெடுக்கப்படும் எனவும், இது தொடர்பில் கடற்படையினருக்கும் உரிய ஆலோசனை வழங்கப்பட்டுள்ளது என தெரிவித்துள்ளார்.

கடற்றொழிலாளர்கள் எதிர்நோக்கும் சவால்கள் மற்றும் இறங்குத்துறை பிரச்சினை சம்பந்தமாகவும் கருத்துகள் முன்வைக்கப்பட்டன. அவை தொடர்பிலும் உரிய நடவடிக்கை எடுக்கப்படும் என அமைச்சர் உறுதியளித்தார்.

அதேவேளை, நெடுந்தீவு மக்களுடனும் அமைச்சர் கலந்துரையாடலில் ஈடுபட்டார். இதன்போது நெடுந்தீவு அபிவிருத்தி மற்றும் சுற்றுலாத்துறை மேம்பாடு தொடர்பிலும் அவதானம் செலுத்தப்பட்டது.

The post இந்திய மீனவர்களின் வருகை தடுக்கப்படும் – அமைச்சர் சந்திரசேகர் appeared first on V MEDIA.

யாழ்ப்பாணம், வல்வெட்டித்துறை பகுதிக்கு அப்பால் உள்ள கடல் பிரதேசத்தில் கேரள கஞ்சாவுடன் நால்வர் கடற்படையினரால் கைது செய்யப்பட்டுள்ளனர்.

அவர்களிடம் இருந்து 322 கிலோகிராம் கேரள கஞ்சா கைப்பற்றப்பட்டதாக கடற்படை தெரிவித்துள்ளது.

இதுதவிர, இரண்டு டிங்கி படகுகளும் கடற்படையினரால் கைப்பற்றப்பட்டுள்ளன.

The post வல்வெட்டித்துறையில் போதைப்பொருளுடன் நால்வர் கைது appeared first on V MEDIA.