-அகல்யா டேவிட்-
மட்டக்களப்பில் அபிவிருத்திகளை பார்வையிடும் நோக்குடனும், புனரமைக்கப்பட்டுள்ள விளையாட்டு மைதானங்களை கையளிக்கவும், இளைஞர் விவகார, விளையாட்டுதுறை மற்றும் அபிவிருத்தி மேற்பார்வை அமைச்சர் நாமல் ராஜபக்ஸ நாளை (23.09.2021) மட்டக்களப்புக்கு விஜயம் செய்யவுள்ளார்.
காலை 10.00 மணிக்கு முதலாவது நிகழ்வாக வந்தாறுமூலையில் புனரமைக்கப்பட்ட விளையாட்டு மைதானத்தினை கையளிக்கும் நிகழ்வில் கலந்தகொள்ளவிருக்கின்றார். அத்தோடு மட்டக்களப்பு மாவட்டத்தில் முன்னெடுக்கப்படவுள்ள பாரியவேலைத்திட்டமான உறுகாமம் கித்துள் குளங்களை இணைப்பது தொடர்பான வேலைத்திட்டத்தினையும் பார்வையிடுவதற்குத் திட்டமிடப்பட்டுள்ளது.
பின்தங்கிய கிராமிய பிரதேசங்களின் அபிவிருத்தி, வீட்டு விலங்கின வளர்ப்பு மற்றும் சிறுபொருளாதார பயிற்செய்கை மேம்பாட்டு இராஜாங்க அமைச்சர் எஸ்.வியாழேந்திரன் தலைமையில் அமைச்சர் நாமல் ராஜபக்ஷவின் வருகைதொடர்பான ஒழுங்கமைப்புக் கூட்டமானது இன்று(22.09.2021) மாவட்டச் செயலகத்தில் நடைபெற்றது.
இக்கூட்டமானது அரசாங்க அதிபர் கணபதிப்பிள்ளை கருணாகரன் ஏற்பாட்டில் நடைபெற்றது. இக்கூட்டத்திற்கு தமிழ் மக்கள் கட்சியின் பொது செயலாளர் பூபாலப்பிள்ளை பிரசாந்தன் மற்றும் பிரதேச அபிவிருத்தி குழுவின் தலைவரும் பொதுஜன பெரமுனவின் அமைப்பாளருமான எஸ்.சந்திரகுமார் மற்றும் மேலதிக அரசாங்க அதிபர் சுதர்சினி சிறிகாந் ஆகியோரும் திணைக்களத் தலைவர்களும் கலந்திருந்தனர்.
