மன்னார் நொச்சிக்குளம் கிராமத்தில் கடந்த 10 ஆம் திகதி வெள்ளிக்கிழமை காலை இடம்பெற்ற வாள் வெட்டுச் சம்பவத்தில் குடும்பஸ்தர்கள் இருவர் படுகொலை செய்யப்பட்ட நிலையில் சம்பவத்துடன் தொடர்புடைய 16 சந்தேக நபர்கள் இனம் காணப்பட்டுள்ள நிலையில் அனைவரும் தலைமறைவாகி காடுகளில் பதுங்கியுள்ளதாகவும், அவர்களை கைது செய்வதற்காக பொலிஸார் தேடுதலில் ஈடுபட்டு வருவதாகவும் உயிலங்குளம் பொலிஸ் நிலையப் பொறுப்பதிகாரி தெரிவித்துள்ளார்.
இந்த இரட்டை கொலை சம்பவத்தில் வெளி மாவட்டத்தைச் சேர்ந்த மூவர் பங்கேற்றுள்ளதாக பொலிஸார் சந்தேகம் வெளியிட்டுள்ளனர். மூவரும் இந்த கொலைகளை மேற்கொள்வதற்காகவே திட்டமிட்டு வேறு மாவட்டத்தில் இருந்து நொச்சிக்குளத்திற்கு அழைத்து வரப்பட்டிருக்கலாம் என உயிலங்குளம் பொலிஸ் நிலையப் பொறுப்பதிகாரி மேலும் சந்தேகம் வெளியிட்டுள்ளார்.
நொச்சிக்குளம் படுகொலையுடன் சம்மந்தப்பட்டவர்களும் அவர்களின் குடும்பத்தினரும் தற்பொழுது அக்கிராமத்தில் இருந்து தலைமறைவாகி, உறவினர்களின் வீடுகள் மற்றும் காட்டுப்பகுதிகளில் மறைந்துள்ளதாக தெரிவிக்கப்படுவதுடன் பொலிஸாரும் இவர்களின் மறைவிடம் குறித்து விசாரணை செய்வதாகத் தெரிவிக்கப்படுகிறது.
மானாரில் நடைபெற்ற மாட்டு வண்டி சவாரி போட்டி ஒன்றில் ஏற்பட்ட முறுகலே தொடர்ச்சியான மோதல்கள் சம்பவங்களாக நடைபெற்று தற்போது கொலையில் நிறைவடைந்துள்ளது. கடந்த வெள்ளிக்கிழமை 10 ஆம் திகதி காலை 11 மணியளவில் மன்னார் நொச்சிக்குளம் கிராமத்தில் நிகழ்ந்த வாள்வெட்டு சம்பவத்தில் 40 வயதுடைய யேசுதாசன் ரோமியோ மற்றும் 33 வயதுடைய யேசுதாசன் தேவதாஸ் எனும் சகோதர்கள் கொல்லப்பட்டதுடன் இருவர் படுகாயமடைந்தனர்.
இந்த மோதல்கள் சம்பவங்களில் சம்பவத்தில் படுகாயமடைந்த இருவர் மன்னார் மாவட்ட பொது வைத்தியசாலையின் தீவிர சிகிச்சைப் பிரிவில் அனுமதிக்கப்பட்டு தொடர்ந்தும் சிகிச்சை பெற்று வருவதாக பொலிஸார் தெரிவிக்கின்றனர்.
மேலும் குறித்த படுகொலை சம்பவத்திற்கு பிரதான காரணமாக கடந்த நான்காம் திகதி
உயிலங்குளத்தில் நடந்த மாட்டு வண்டிச்சாவரியே காரணமாக இருந்ததாக தெரிவிக்கப்படும் நிலையில் குறித்த கொலைக்கு முக்கிய காரணம் உயிலங்குளத்தைச் சேர்ந்த சிலருக்கும், நொச்சிக்குளத்தைச் சேர்ந்த சிலருக்கும் இடையில் ஐந்து வருடங்களுக்கு மேலாக நிலவும் பகமையே காரணம் என நொச்சிக்குளம் அயல் கிராமவாசிகள் தெரிவித்துள்ளனர்.
இதே சமயம் கடந்த வெள்ளி காலை நொச்சிக்குளம் பகுதியில் நிகழ்ந்த குறித்த இரட்டைக்கொலை சம்பவம் மன்னார் மாவட்டத்தில் பெரும் அதிர்ச்சியையும் பரபரப்பையும் ஏற்படுத்தியுள்ளது.
தொடர்புடைய செய்தி
