ஆசிய கிண்ணத்தை விட்டு வெளியேறும் நிலையில் இலங்கை?

-டுபாயிலிருந்து விமல்-

இலங்கை அணியின் முதல் போட்டியே மோசமான தோல்வியாக மாறியுள்ள நிலையில் ஆசிய கிண்ணத்தை விட்டு வெளியேறும் அபாயம் ஏற்பட்டுள்ளது. பங்களாதேஷ் அணியுடன் வெற்றி பெற வேண்டும். அதுவும் மிக பெரிய வெற்றி. பங்களாதேஷ் அணி இரண்டு போட்டிகளிலும் தோல்வியடைய வேண்டும். பங்களாதேஷ் அணியை இலங்கை அணி வெற்றி பெற ஆப்கானிஸ்தான் அணி மோசமான தோல்வியினை அடைய வேண்டும்.

இப்படியாகிவிட்டதா இலங்கை அணியின் நிலை? என கேள்வி எழுப்பும் நிலைக்கு நிலைமை மாறிவிட்டது. இலங்கை அணி பெற்ற குறைவான ஓட்ட எண்ணிக்கையினை துரத்தி அதிரடியாக அடித்தாடிய ஆப்கானிஸ்தான் அணி இலகுவான வெற்றியினை பெற்றுக் கொண்டது. மோசமான இலங்கை அணியின் துடுப்பாட்டம், பந்துவீச்சு அத்தோடு தலைமை என சகலதும் இணைந்து மோசமான தோல்வியினை இலங்கை அணி தனதாக்கி கொண்டது.

இலங்கை அணியின் துடுப்பாட்ட நிலைமை

இலங்கை கிரிக்கெட் ரசிகர்கள் நிறைந்து போயுள்ள போட்டி இலங்கை , ஆப்கானிஸ்தான் அணிகளுக்கிடையிலான முதலாவது ஆசிய கிண்ண போட்டியில் இலங்கை அணி துடுப்பாட்டத்தில் சொதப்பியுள்ளது.

ஆரம்பம் முதல் விக்கெட்களை இழந்த நிலையில், இலங்கை அணி பெற்றுள்ள இந்த ஓட்ட எண்ணிக்கை போதுமா என்ற நிலை ஏற்பட்டுள்ளது.

நாணய சுழற்சியில் வெற்றி பெற்று களத்தடுப்பை தெரிவு செய்த ஆப்கானிஸ்தான் அணி மிகவும் அபாரமாக பந்து வீசி கலக்கியுள்ளது. களத்தடுப்பிலும் மிகவும் அபாரமாக செய்யற்பட்டனர். ஆகோரோஷமா ஆப்கானிஸ்தான் அணி தமது திறமையினை வெளிக்காட்டியுள்ளது.

இலங்கை அணி துடுப்பாட்ட வரிசையில் செய்த மாற்றங்கள், இலங்கை அணியின் பின்னடைவுக்கு காரணமாக அமைந்துள்ளது. வீரர்களிடையே புரிந்துணர்வின்றி, நுட்பமின்றி விளையாடியது தெளிவாக தென்பட்டது. இலங்கை அணி இலகுவாக ஆப்கானிஸ்தான் அணியினை எடுத்துவிட்டதோ என்ற கேள்வியும் எழுகிறது.

சாமிக்க கருணாரட்ன இறுதி நேரத்தில் தனித்து நின்று போராடி பெற்ற ஓட்டங்கள் இலங்கை அணிக்கு ஓரளவு கைகொடுத்து ஓட்ட எண்ணிக்கையினை உயர்த்தியது.