LPL மகுடத்தை சூடியது யாழ் அணி

நிறைவடைந்துள்ள லங்கா பிரீமியர் லீக் கிரிக்கெட் தொடரின் கிண்ணத்தை ஜப்னா கிங்ஸ் அணி வெற்றி பெற்று மூன்றாவது தடவையாக கைப்பற்றியுள்ளது.

கொழும்பு R.பிரேமதாச கிரிக்கெட் மைதானத்தில் நடைபெற்ற இறுதிப் போட்டியில் 164 ஓட்டங்கள் என்ற இலக்கினை 19.3 ஓவர்களில் 08 விக்கெட்களை இழந்து துரதியடித்து 02 விக்கெட்களினால் வெற்றி பெற்றது.

ரஹ்மனுள்ள குர்பாஸ் அதிரடியாக ஆரம்பம் ஒன்றை பெற்றுக் கொடுத்தமை இந்த இலக்கினை யாழ் அணி துரத்துவதற்கு இலகுவாக அமைந்தது. அவிஷ்க பெர்னாண்டோ நிதானமாக துடுப்பாடி போட்டியினை கொண்டு சென்றார்.

அபிப் ஹொசைன் வேகமாக ஆட்டமிழக்க சதீர சமரவிக்ரம, அவிஷ்க இணைந்து மீண்டும் நிதானமான இணைப்பாட்டம் ஒன்றை உருவாக்கினார்கள். இணைப்பாட்டம் சீரான நிலைக்கு வந்த பின்னர் சதீர சமரவிக்ரம அதிரடியாக துடுப்பாடி ஓட்டங்களை வேகமாக உயர்த்தினார்.

கொழும்பு அணி சார்பாக பென்னி ஹோவல் இறுக்கமாக பந்துவீசிய அதேவேளை முதல் இரு விக்கெட்களையும் கைப்பற்றினார்கள். அஞ்சலோ மத்தியூசின் பந்துவீச்சு மாற்றங்கள் சரியான முறையில் அமையாமல் போனதும் யாழ் அணியினை கட்டுப்படுத்த முடியாமல் போனமைக்கு முக்கியமான காரணமாக அமைந்தது.

வெற்றியினை அண்மித்த நேரத்தில் யாழ் அணி அடுத்தடுத்த விக்கெட்களை இழந்தமையினால் இறுதி நேரத்தில் யாழ் அணிக்கு பதட்டமான சூழ்நிலை ஒன்று உருவானது. 15 ஆவது ஓவரில் பந்துவீச்சுக்கு அழைக்கப்பட்ட சுரங்க லக்மால் மூன்று விக்கெட்களை கைப்பற்றி போட்டியில் விறு விறுப்பை ஏற்படுத்தினார். போட்டி யாழ் அணியின் கைக்குள் வந்த பின்னர் நுட்பமற்ற ரீதியில் அவர்கள் விளையாடினார்கள்.

நாணய சுழற்சியில் வெற்றி பெற்ற யாழ் அணி களத்தடுப்பை தெரிவு செய்தது. முதலில் துடுப்பாடிய கொழும்பு அணி 20 ஓவர்களில் 05 விக்கெட்களை இழந்து 163 ஓட்டங்களை பெற்றது.

துடுப்பாடிய கொழும்பு அணி ஆரம்ப விக்கெட்டினை முதல் ஓவரில் இழந்த போதும், கடந்த போட்டியில் சிறந்த துடுப்பாட்டத்தை வெளிப்படுத்திய டினேஷ் சந்திமால் – சரித் அசலங்க ஜோடி சிறப்பான இணைப்பாட்டத்தை இன்றும் உருவாக்கி நல்ல ஆரம்பத்தை வழங்கினார்கள். 75 ஓட்டங்களை இணைப்பாட்டமாக இருவரும் பகிர்ந்த நிலையில் இளம் டுனித் வெல்லாளகே இணைப்பாட்டத்தை முறியடித்தார். ஓட்டங்களை அதிகமாக வழங்காமல் இறுக்கமாக அவர் பந்துவீசினார். வியாஸ்காந்தும் இறுக்கமாக அதிகமாக ஓட்டங்களை வழங்காமல் பந்து வீசினார்.

சரித் அசலங்க ஆட்டமிழந்து சிறிது நேரத்தில் டினேஷ் சந்திமால் ரன் அவுட் முறையில் ஆட்டமிழந்தது கொழும்பு அணிக்கு பின்னடைவை வழங்கியது. அதன் பின்னர் ஓட்டங்களை அதிகமாக பெறுத்தற்கு கொழும்பு அணி தடுமாறியது. யாழ் அணியின் இறுக்கமான பந்துவீச்சு ஓட்டங்களை கொழும்பு அணி பெறுவதில் சிக்கல் நிலைகளை உருவாக்கியது. இருப்பினும் இறுதி நேரத்தில் ரவி போபரா அதிரடியாக அடித்தாடி ஓட்டங்களை உயர்த்தினார். அவரின் துடுப்பாட்டமே கொழும்பு அணி பலமான நிலை ஒன்றுக்கு செல்வதற்கு காரணமாக அமைந்தது.

யாழ்ப்பாணம் அணி தொடர்ச்சியான மூன்றாவது தடவையாக கிண்ணத்தை வெற்றி பெற்றுள்ளது. கொழும்பு அணி இறுதிப் போட்டிக்குத் தெரிவாகியமை இதுவே முதற் தடவையாகும்.