இந்தியா மற்றும் அவுஸ்திரேலியா அணிகளுக்கிடையில் தி ஓவல் மைதானத்தில் நடைபெற்ற உலக டெஸ்ட் சம்பியன்ஷிப் இறுதிப் போட்டியில் இந்தியா அணியை அவுஸ்திரேலியா அணி 209 ஓட்டங்களினால் வெற்றி பெற்று 2023 ஆண்டுக்கான சம்பியனாகியுள்ளது.
444 ஓட்டங்கள் என்ற வெற்றியிலக்குடன் துடுப்பாடிய இந்தியா அணி ஐந்தாம் நாளான இன்று மதிய போசன இடைவேளைக்கு சற்று முன்னர் இரண்டாம் இன்னிங்சில் சகல விக்கெட்களையும் இழந்து 234 ஓட்டங்களை பெற்றுக் கொண்டது. இதில் விராட் கோலி 49 ஓட்டங்களையும், அஜிங்கையா ரெஹானே 46 ஓட்டங்களையும், ரோஹித் ஷர்மா 43 ஓட்டங்களையும் பெற்றனர்.
அவுஸ்திரேலியா அணியின் பந்துவீச்சில் நேதன் லயோன் 04 விக்கெட்களையும், ஸ்கொட் போலான்ட் 03 விக்கெட்களையும், மிர்ச்செல் ஸ்டார்க் 02 விக்கெட்களையும் கைப்பற்றினார்கள்.
முன்னதாக அவுஸ்திரேலியா அணி தனது இரண்டாம் இன்னிங்சில் 08 விக்கெட் இழப்பிற்கு 270 ஓட்டங்களை பெற்று துடுப்பாட்டத்தை நிறுத்தியது. அலெக்ஸ் கேரி ஆட்டமிழக்காமல் 66 ஓட்டங்களையும், மிர்ச்செல் ஸ்டார்க் 41 ஓட்டங்களையும், மார்னஸ் லபுஷேன் 41 ஓட்டங்களையும் பெற்றனனர். இந்தியா அணியின் பந்துவீச்சில் ரவீந்தர் ஜடேஜா 03 விக்கெட்களையும், மொஹமட் ஷமி, உமேஷ் யாதவ் ஆகியோர் தலா 02 விக்கெட்களையும் கைப்பற்றினார்கள்.
இந்தியா அணி முதல் இன்னிங்சில் 296 ஓட்டங்களை பெற்றது. இதில் அஜிங்கையா ரெஹானே 89 ஓட்டங்களையும், ஷர்தூள் தாகூர் 51 ஓட்டங்களையும் பெற்றனர். இருவரும் 109 ஓட்டங்களை 07 ஆவது விக்கெட் இணைப்பாட்டமாக பெற்றுக் கொண்டனர். ரவீந்தர் ஜடேஜா 48 ஓட்டங்களை பெற்றுக் கொண்டார். அண்மைக்காலமாக அணியிலிருந்து நீக்கப்பட்டிருந்த ரெஹானே மீண்டும் அணிக்குள் வந்து தனது திறமையை வெளிக்காட்டியுள்ளார். 5000 ஓட்டங்களையும் அவர் பூர்த்தி செய்துகொண்டார்.
அவுஸ்திரேலியா அணியின் பந்துவீச்சில் பட் கம்மின்ஸ் 03 விக்கெட்களையும், மிர்ச்செல் ஸ்டார்க், கமரூன் க்ரீன், ஸ்கொட் போலன்ட் ஆகியோர் தலா 02 விக்கெட்களை கைப்பற்றினார்கள்.
அவுஸ்திரேலியா அணி முதல் இன்னிங்ஸில் 469 ஓட்டங்களை பெற்றுக் கொண்டது. ஆரம்பத்தில் தடுமாறிய அவுஸ்திரேலியா அணி ரவிஸ் ஹெட், ஸ்டீபன் ஸ்மித் ஆகியோரது அபாரமான இணைப்பாட்டம் மூலம் மீள்ச்சி பெற்றது.
இணைப்பாட்டமாக 285 ஓட்டங்களை ரவிஸ் ஹெட், ஸ்டீபன் ஸ்மித் ஆகியோர் பகிர்ந்து கொண்டனர். முதல் 3 விக்கெட்கள் 76 ஓட்டங்களை பெற்ற வேளையில் வீழ்த்தப்பட்டன. இறுதி 07 விக்கெட்கள் 108 ஓட்டங்களுக்குள் வீழ்த்தப்பட்டன.
ரவிஸ் ஹெட் 163(174) ஓட்டங்களை பெற்றுக் கொண்டார். ஸ்டீபன் ஸ்மித் 121(268) ஓட்டங்களை பெற்றுக் கொண்டார். அலெக்ஸ் கேரி 48 ஓட்டங்களையும், டேவிட் வோர்னர் 43 ஓட்டங்களையும் பெற்றனர்.
பந்துவீச்சில் மொஹமட் சிராஜ் 04 விக்கெட்களையும், மொஹமட் ஷமி, ஷர்தூள் தாகூர் ஆகியோர் தலா இரண்டு விக்கெட்களை கைப்பற்றினார்கள்.
இந்தப் போட்டியின் நாயகனாக ரவிஸ் ஹெட் தெரிவு செய்யப்பட்டார்.
கடந்த முறை நடைபெற்ற இறுதிப் போட்டியில் இந்தியா அணியை நியூசிலாந்து அணி வெற்றி பெற்று முதலாவது சம்பியனானது. அவுஸ்திரேலியா அணி இரண்டாவது தடவை நடைபெற்ற இறுதிப் போட்டியில் வெற்றி பெற்று சம்பியனாக தெரிவு செய்யப்பட்டுள்ளது. இரண்டு வருடங்களின் பின்னர் மீண்டும் உலக டெஸ்ட் சம்பியன்ஷிப் தொடரின் இறுதிப் போட்டி நடைபெறும்.