டி20 உலகக் கிண்ணத் தொடரின் சூப்பர் 8 சுற்றில் பங்களாதேஷ் அணிக்கு எதிரான போட்டியில் அவுஸ்ரேலியா அணி வெற்றியீட்டியது. மேற்கிந்திய தீவுகள், அன்டிகாவில் இன்று(21.06) நடைபெற்ற இந்த போட்டியின் நாணய சுழற்சியில் வெற்றி பெற்ற அவுஸ்ரேலியா அணி களத்தடுப்பை தெரிவு செய்தது.
அதன்படி, முதலில் துடுப்பெடுத்தாடிய பங்களாதேஷ் அணி 20 ஓவர்களில் 8 விக்கெட் இழப்பிற்கு 140 ஓட்டங்களைப் பெற்றுக்கொண்டது. பங்களாதேஷ் அணி சார்பில் அணித் தலைவர் நஜ்முல் ஹுசைன் சான்டோ 41 ஓட்டங்களையும், தௌஹீட் ஹ்ரிடோய் 40 ஓட்டங்களையும் பெற்றுக்கொண்டனர். அவுஸ்ரேலியா அணி சார்பில் பந்து வீச்சில் பட் கம்மின்ஸ் 3 விக்கெட்டுக்களையும், அடம் சம்பா 2 விக்கெட்டுக்களையும் கைப்பற்றினர்.
பட் கம்மின்ஸ் 17 வருடங்களின் பின்னர் அவுஸ்ரேலியா அணி சார்பில் டி20 உலகக் கிண்ணத் தொடரில் ஹட்ரிக் விக்கெட்டுக்களை பெற்றுக்கொண்டார். இதற்கு முன்னர் 2007ம் ஆண்டு இடம்பெற்ற முதலாவது டி20 உலகக் கிண்ணத் தொடரின் போது பங்களாதேஷ் அணிக்கு எதிரான போட்டியில் பிரெட் லீ ஹட்ரிக் விக்கெட்டுக்களை கைப்பற்றியிருந்தார்.
141 ஓட்டங்களை வெற்றியிலக்காக கொண்டு பதிலுக்கு துடுப்பெடுத்தாடிய அவுஸ்ரேலியா அணி 11.2 ஓவர்களில் 2 விக்கெட் இழப்பிற்கு 100 ஓட்டங்களைப் பெற்றிருந்த போது மழை குறுக்கிட்டது. இதன் காரணமாக போட்டியை கைவிடுவதற்கு நடுவர்கள் தீர்மானித்தனர். அதற்கமைய DLS முறைப்படி அவுஸ்ரேலியா 28 ஓட்டங்களினால் வெற்றியீட்டியது.
அவுஸ்ரேலியா அணி சார்பில் டேவிட் வார்னர் 53 ஓட்டங்களையும், டிராவிஸ் ஹெட் 31 ஓட்டங்களையும் பெற்றுக்கொண்டனர். பங்களாதேஷ் அணி சார்பில் பந்துவீச்சில் ரிஷாத் ஹுசைன் 2 விக்கெட்டுக்களை கைப்பற்றினார். இதன்படி, இந்த போட்டியில் அவுஸ்ரேலியா அணி வெற்றியீட்டியதுடன், போட்டியின் ஆட்ட நாயகனாக அவுஸ்ரேலியா அணியின் பட் கம்மின்ஸ் தெரிவு செய்யப்பட்டார்.