இலங்கை மற்றும் அவுஸ்திரேலியா அணிகளுக்கிடையிலான வோர்ன் -முரளி கிண்ண முதலாவது டெஸ்ட் போட்டி காலி சர்வதேசக் கிரிக்கெட் மைதானத்தில் நடைபெற்று வருகிறது. இந்த போட்டியின் மூன்றாம் நாளுக்கான போட்டி மழை காரணமாக நிறைவு செய்யப்பட்டுள்ளது.
நாணய சுழற்சியில் வெற்றி பெற்று முதலில் துடுப்பாடிய அவுஸ்திரேலியா அணி மிக சிறப்பாக துடுப்பாடி பலமான நிலையை அடைந்துள்ளது. முதல் நாள் மழை காரணமாக குறித்த நேரத்துக்கு முன்னதாக நிறைவுக்கு வந்தது. அவுஸ்திரேலியா அணி 154 ஓவர்களில் 06 விக்கெட்களை இழந்து 654 ஓட்டங்களை பெற்று துடுப்பாட்டத்தை நிறைவு செய்தது.
ஆரம்ப விக்கெட் இணைப்பாட்டமாக உஸ்மான் காவாஜா, டிரவிஸ் ஹெட் இணைந்து 92 ஓட்டங்களை பெற்றனர். டிரவிஸ் ஹெட் அதிரடியாக துடுப்பாடி 40 பந்துகளில் 57 ஓட்டங்களை பெற்றுக்கொண்டார். மார்னஸ் லபுஷேன் 20 ஓட்டங்களுடன் ஆட்டமிழந்தார். அதன் பின் ஜோடி சேர்ந்த உஸ்மான் காவாஜா, ஸ்டீவன் ஸ்மித் இணைந்து 266 ஓட்டங்களை பெற்றுக்கொண்டனர். அவுஸ்திரேலியா அணியின் துடுப்பாட்டத்தில் உஸ்மான் காவாஜா 232 ஓட்டங்களையும், ஸ்டீவன் ஸ்மித் 141 ஓட்டங்களையும், அவுஸ்திரேலியா அணிக்காக அறிமுகத்தை மேற்கொண்ட ஜோஸ் இங்கிலிஷ் 102 ஓட்டங்களையும், அலெக்ஸ் கேரி ஆட்டமிழக்காமல் 46 ஓட்டங்களையும் பெற்றுக்கொண்டனர்.
ஸ்டீவன் ஸ்மித் 10,000 ஓட்டங்களை கடந்தார். டெஸ்ட் போட்டிகளில் 10,000 ஓட்டங்களை கடந்த பதினைந்தாவது வீரராகவும், அவுஸ்திரேலியாவின் நான்காவது வீரராகவும் தனது பெயரை பதிவு செய்துள்ளார். உஸ்மான் காவாஜா தனது 16 ஆவது சதத்தை பூர்த்தி செய்தார். ஸ்மித் 35 ஆவது சதத்தை பூர்த்தி செய்தார்.
இலங்கை அணியின் பந்துவீச்சில் பிரபாத் ஜெயசூர்யா, ஜெப்ரி வண்டர்செய் ஆகியோர் தலா 3
விக்கெட்களை கைப்பற்றினார்கள்.
இரண்டு ஆட்டமிழப்புக்களை நடுவர்கள் வழங்காத நிலையில், அவற்றை இலங்கை அணியும் மீள் பரிசீலனை செய்யாமை இலங்கைக்கு பாதிப்பாக அமைந்தது. ஐந்தாவது ஓவரில் டிரவிஸ் ஹெட்ட்டின் ஆட்டமிழப்பு மற்றும் காவஜா-ஸ்மித் இணைப்பாட்ட வேளையில் மேலுமொரு ஆட்டமிழப்பு என்பன இவ்வாறு தவறவிடப்பட்டன.
பதிலுக்கு துடுப்பாடி வரும் இலங்கை அணி 42 ஓவர்களில் 5 விக்கெட்களை இழந்து 136 ஓட்டங்களை பெற்றுள்ளது. தற்போது துடுப்பாடி வரும் தினேஷ் சந்திமால் 67 ஓட்டங்களுடனும், குசல் மென்டிஸ் 10 ஓட்டங்களுடனும் துடுப்பாடி வருகின்றனர். தனஞ்சய டி சில்வா 22 ஓட்டங்களை பெற்று ஆட்டமிழந்தார். கமிண்டு மென்டிஸ் 15 ஓட்டங்களுடனும், ஆரம்ப துடுப்பாட்ட வீரர்களான திமுத் கருணாரட்ண, ஒஷட பெர்னாண்டோ ஆகியோர் 7 ஓட்டங்களை பெற்று ஆட்டமிழந்தனர்.
அவுஸ்திரேலியா அணியின் பந்துவீச்சில் மிச்சல் ஸ்டார்க், மத்தியூ குஹ்ன்மென் ஆகியோர் தலா 2 விக்கெட்களையும், நேதன் லயன் 1 விக்கெட்டினையும் கைப்பற்றியுள்ளனர்.
அணி விபரம்
அவுஸ்திரேலியா : 1 உஸ்மான் காவாஜா 2 டிரவிஸ் ஹெட் 3 மார்னஸ் லபுஷேன் 4 ஸ்டீவன் ஸ்மித் (தலைவர்) 5 ஜோஷ் இங்கிலிஸ் 6 பியூ வெப்ஸ்டர் 7 அலெக்ஸ் கேரி 8 மிட்செல் ஸ்டார்க் 9 மத்யூ குஹ்ன்மென் 10 நேதன் லியோன் 11 ட்ரொட் மேர்பி
இலங்கை : 1 டிமுத் கருணாரட்ன, 2 ஓஷத பெர்னாண்டோ, 3 டினேஷ் சந்திமால், 4 அஞ்சலோ மத்தியூஸ், 5 கமிந்து மென்டிஸ், 6 தனஞ்சய டி சில்வா (தலைவர்), 7 குசல் மென்டிஸ், 8 பிரபாத் ஜெயசூர்யா, 9 நிஷான் பீரிஸ், 9 ஜெப்ரி வன்டர்ஷே 11 அசித்த பெர்னாண்டோ