கண்டி அணி முதற் தடவையாக இறுதிப் போட்டியில்

லங்கா பிரீமியர் லீக் கிரிக்கெட் போட்டி தொடரின் இறுதிப்போட்டிக்கு இரண்டாவது அணியாக பி-லவ் கண்டி அணி முதற் தடவையாக தெரிவாகியுள்ளது. கொழும்பு ஆர்.பிரேமதாச மைதானத்தில் நடைபெற்ற போட்டியில் கோல் டைட்டன்ஸ் அணியை 34 ஓட்டங்களினால் வெற்றி பெற்று இறுதிப் போட்டிக்குத் தகுதி பெற்றுள்ளது.

கண்டி அணியின் தலைவர் வனிந்து ஹசரங்க இந்த தொடரில் கூடுதலான ஓட்டங்கள் மற்றும் கூடுதலான விக்கெட்கள் என்ற பெறுதியோடு தனது அணியை இறுதிப் போட்டிக்கு அழைத்து சென்றுள்ளார்.

இந்தப் போட்டியில் நாணய சுழற்சியில் வெற்றி பெற்று முதலில் துடுப்பாடிய கண்டி அணி 20 ஓவர்களில் 07 விக்கெட்களை இழந்து 157 ஓட்டங்களை பெற்றது.

கண்டி அணியின் ஆரம்ப விக்கட்கள் வேகமாக தளர்க்கப்பட அதிரடி நிகழ்த்தும் கண்டி சோர்ந்து போனது. மூன்றாவது விக்கெட் இணைப்பாட்டமாக வனிந்து ஹஸரங்க, டினேஷ் சந்திமால் இணைந்து அணியின் துடுப்பாட்டத்தை ஸ்திர நிலைக்கு எடுத்து சென்றனர். ஒன்பதாவது ஓவரில் வனிந்துவுக்கு ஏற்பட்ட தசை பிடிப்பும் சிறிதளவு பின்னடைவை ஏற்படுத்தியது. இருப்பினும் உபாதையோடு அதிரடி நிகழ்த்தி அணியின் ஓட்ட எண்ணைக்கையினை உயர்த்தினார். இருவரும் இணைந்து 72 ஓட்டங்களை இணைப்பாட்டமாக பெற்ற வேளையில் வனிந்து ஆட்டமிழந்தார். தொடர்ந்து அஞ்சலோ மத்தியூசும் சிறப்பாக துடுப்பாட கண்டி அணி போராடக் கூடிய இலக்கை தொட்டுள்ளது. இருப்பினும் இதனை வெற்றி பெறக்கூடிய இலக்காக எடுத்துக்கொள்ள முடியாது.

பந்துவீச்சில் லஹிரு குமார சிறந்த ஆரம்பம் ஒன்றை வழங்கினார். சொனால் டினுஷ இணைப்பாட்டங்களை முறியடித்துக் கொடுத்தார்.

148 ஓட்டங்கள் என்ற வெற்றியிலக்குடன் துடுப்பாடிய காலி அணி சிறந்த ஆரம்பத்தை பெற்ற போதும் அது முறியடிக்கப்பட அடுத்ததடுத்து விக்கெட்கள் வீழ்த்தப்பட்ட தடுமாறிப் போனது. பந்துவீச்சில் சத்துரங்க டி சில்வா அபாரமாக பந்துவீசினார். ஓட்டங்களை அதிகமாக வழங்காத அதேவேளை விக்கெட்களையும் கைப்பற்றினார்.

நாளைய தினம் இரவு 7.30 இற்கு தம்புள்ளை ஓரா, பி-லவ் கண்டி அணிகளுக்கிடையிலான இறுதிப் போட்டி நடைபெறவுள்ளது. இரு அணிகளும் முதற் தடவையாக இறுதிப் போட்டியில் விளையாடுகின்றன.