இலங்கை மற்றும் அவுஸ்திரேலியா அணிகளுக்கிடையில் நடைபெற்று வரும் இரண்டாம் டெஸ்ட் போட்டியின் நான்காம் நாளில் இலங்கை அணி தனது முதல் இன்னிங்சை நிறைவு செய்தது. தினேஷ் சந்திமாலின் அபாரமான இரட்டை சதம் இலங்கை அணியின் முன்னிலைக்கு முக்கியமான காரணமாக அமைந்தது.
இது தினேஷ் சந்திமாலின் முதலாவது இரட்டை சதமாகும். அவுஸ்திரேலியா அணிக்கு எதிராக இலங்கை வீரரினால் பெறப்பட்ட முதலாவது இரட்டை சதம் என்ற சாதனையை சந்திமால் பெற்றுக் கொண்டார்.
முதல் இன்னிங்சில் துடுப்பாடிய இலங்கை அணி 181 ஓவர்களில் சகல விக்கெட்களையும் இழந்து 554 ஓட்டங்களை பெற்றது. இதில் தினேஷ் சந்திமல் 206 ஓட்டங்களையும், திமுத் கருணாரட்ண 86 ஓட்டங்களையும், குசல் மென்டிஸ் 85 ஓட்டங்களையும், கமின்டு மென்டிஸ் 61 ஓட்டங்களையும், அஞ்சலோ மத்யூஸ் 52 ஓட்டங்களையும் பெற்றனர். பந்துவீச்சில் மிச்செல் ஸ்டார்க் 4 விக்கெட்களையும், மிச்செல் ஸ்வெப்சன் 3 விக்கெட்களையும், நேதன் லயோன் 2 விக்கெட்களையும் கைப்பற்றினார்கள்.
இந்த ஓட்டங்கள் மூலம் இலங்கை அணி 190 ஓட்டங்களினால் முன்னிலை பெற்றுள்ளது. இந்த ஓட்ட எண்ணிக்கையானது இலங்கை அணி இந்தப் போட்டியில் வெற்றி பெறக்கூடிய நிலையை ஏற்படுத்தியுள்ளது .
முதல் இன்னிங்சில் துடுப்பாடிய அவுஸ்திரேலியா அணி 110 ஓவர்களில் சகல விக்கெட்களையும் இழந்து 364 ஓட்டங்களை பெற்றது. இதில் ஸ்டீவ் ஸ்மித் ஆட்டமிழக்காமல் 145 ஓட்டங்களையும், மார்னஸ் லபுஷேன் 104 ஓட்டங்களையும் பெற்றனர். பந்துவீச்சில் பிரபாத் ஜயசூரிய 6 விக்கெட்களையும், கசன் ராஜித 2 விக்கெட்களையும் கைப்பற்றினார்கள். பிரபாத் ஜயசூரிய அவரின் முதற் டெஸ்ட் போட்டியிலேயே 6 விக்கெட்களை கைப்பற்றினார்.
