இலங்கையின் துடுப்பாட்டம் நிறைவு

(ச.விமல் – காலி சர்வதேச கிரிக்கெட் மைதானத்திலிருந்து)

இலங்கை, பாகிஸ்தான் அணிகளுக்கிடையிலான முதலாவது டெஸ்ட் போட்டி இன்று(16.07) காலி சர்வதேச கிரிக்கெட் மைதானத்தில் ஆரம்பமாகி நடைபெற்று வருகிறது. இலங்கை அணி தமது முதல் இன்னிங்ஸை நிறைவு செய்துள்ளது. நாணய சுழற்சியில் வெற்றி பெற்று முதலில் துடுப்பாடிய அணி பெறக்கூடிய ஓட்ட எண்ணிக்கையினை இலங்கை அணி பெறவில்லை.

டினேஷ் சந்திமால் தனித்து போராடி பெற்ற ஓட்டங்களின் மூலம், இலங்கை அணி போராடக் கூடிய ஓட்ட எண்ணிக்கையினை 222 ஓட்டங்களை பெற்றுள்ளது. இறுதி நேரத்தில் மகேஷ் தீக்ஷண சந்திமாலுடன் வழங்கிய இணைப்பாட்டமும், பின்னர் அவர் பெற்றுக் கொண்ட ஓட்டங்களும் இலங்கை அணிக்கு முக்கியமானவையாக அமைந்தன. மகேஷ் தீக்ஷண பெற்றுக் கொண்ட 38 ஓட்டங்கள், அவரின் கூடுதலான ஓட்டங்களாகும். இறுதி விக்கெட் இணைப்பாட்டமாக மகேஷ் தீக்ஷன, கஹூன் ரஜித ஆகியோர் 45 ஓட்டங்களை பகிர்ந்து கொண்டனர்.

ஆரம்பம் முதலே தடுமாறிய இலங்கை அணி, மதிய போசனத்துக்கு முன்னரே 4 விக்கெட்களை இழந்தது. மத்திய போசனத்துக்கு பின்னர் மேலும் நான்கு விக்கெட்களை இழந்தது. மோசமாக முன் வரிசை துடுப்பாட்ட வீரர்கள் தடுமாறிய நிலையில் பின் வரிசை துடுப்பாட்ட வீரர்கள் அணிக்கான ஓட்ட எண்ணிக்கையினை ஓரளவு உயர்த்தியுள்ளனர்.

விக்கெட் வீழ்ந்தால் அடுத்தடுத்து விக்கெட் விழும் நிலை இலங்கை அணியின் மோசமான நிலைப்பாடாகும். இணைப்பாட்டங்களை கட்டியெழுப்புதல் அணியின் பிரச்சினையான விடயம். அதனை இலங்கை அணி சீர் செய்ய வேண்டும். இந்த போட்டியில் மட்டுமன்றி இது ஒரு தொடர் பிரச்சினையாக இலங்கை அணிக்கு காணப்படுகிறது.

பாகிஸ்தான் அணியின் நேர்த்தியான பந்துவீச்சு இலங்கை அணியின் துடுப்பாட்ட வீரர்களை தடுமாற வைத்துள்ளது. குறிப்பாக ஷஹின் ஷா அப்ரிடியின் ஸ்விங் பந்துவீச்சு இலங்கையின் துடுப்பாட்ட வீரர்களை தடுமாற வைத்துள்ளது. ஆரம்ப விக்கெட்களை அவரே தகர்த்துக் கொடுத்தார். இந்த போட்டியில் மீள் வருகையினை ஏற்படுத்தியுள்ள யசீர் ஷா கடந்த காலங்களில் இலங்கை அணிக்கெதிராக மிகவும் சிறப்பாக பந்துவீசியுள்ளார் என்பது இலங்கை அணிக்கு சிக்கலை தரும் என நம்பப்பட்ட நிலையில் அவர் 2 விக்கெட்களை கைப்பற்றினார்.

சுழற்பந்துவீச்சாளரக்ளுக்கு சாதகம் தரும் மைதானத்தில் வேகப்பந்து வீச்சாளர்கள் இலங்கையின் விக்கெட்களை அதிகமாக கைப்பற்றியுள்ளனர். துடுப்பாட்ட வீரர்களின் பிழையான துடுப்பாட்ட பிரயோகங்கள் இலங்கை அணியின் பின்னடைவுக்கு காரணமாக அமைந்தன.

முழுமையான ஸ்கோர் விபரம்.