இந்திய மீனவர்கள் பருத்தித்துறையில் கைது

இந்தியாவை சேர்ந்த மீனவர்கள், இலங்கை பருத்தித்துறை பகுதியில் மீன்பிடியில் ஈடுபட்ட வேளையில், இலங்கை கடற்படையினரால் கைது செய்யப்பட்டுள்ளனர்.

பருத்தித்துறை மற்றும் வெற்றிலைக்கேணிக்கு இடைப்பட்ட கிழக்கு கடலில் இவர்கள் அனுமதியற்ற மீன்பிடியில் ஈடுபட்டபோது 2 வள்ளங்களையும், 23 மீனவர்களையும் கைது செய்துள்ளதாக இலங்கை கடற்படை அறிவித்துள்ளது.

நேற்று இரவு கைது செய்யப்பட்ட இவர்கள், சட்ட நடவடிக்கைக்கு உரிய திணைக்களத்துக்கு கையளிக்கும் வரை, கொரோனோ சுகாதார வழிகாட்டுதலுக்கு அமைய தொடர்ந்தும் கடற்படை பாதுகாப்பில் வைக்கப்பட்டுள்ளனர்.

இலங்கை கடற்பரப்பில் அனுமதியின்றி மீன்பிடிப்பதை தடுக்கும் முகமாக இலங்கை கடற்படையினர் இலங்கை எல்லைக்குள் ரோந்து நடவடிகையில் ஈடுப்பட்டு வருகின்றனர். அதன்போதே குறித்த படகுகளும், மீனவர்களும் கைது செய்யப்பட்டுள்ளனர்.