காலி அணியை உருட்டி எடுத்த கண்டி.

கோல் டைட்டன்ஸ் மற்றும் பி-லவ் கண்டி அணிகளுக்கிடையிலான போட்டியில் துடுப்பாட்டத்தில் அதிரடி நிகழ்த்திய கண்டி அணி பந்துவீச்சில் காலி அணியை உருட்டி எடுத்துள்ளது. கண்டி பல்லேகல சர்வதேசக் கிரிக்கெட் மைதானத்தில் நடைபெற்ற இன்றைய முதற் போட்டியில் கண்டி ஓட்டங்களினால் அணி அபார வெற்றியை பெற்று புள்ளிப்பட்டியலில் முதலிடத்தை பெற்றுக் கொண்டது.

204 ஓட்டங்கள் என்ற வெற்றியிலக்கை நோக்கி துடுப்பாடிய காலி அணி ஆரம்பம் முதலே விக்கெட்களை இழந்து தடுமாறி வந்தது. லசித் க்ரூஸ்புல்லே ஓரளவு சிறந்த ஆரம்பத்தை வழங்கினார். விக்கெட்கள் வீழ்த்தப்பட்ட வேளையில் ஏழாவது விக்கெட் இணைப்பாட்டமாக அஷான் பிரியரஞ்சன், லஹிரு சமரக்கோன் ஆகியோர் இணைப்பாட்டம் ஒன்றை ஏற்படுத்தி ஓட்ட எண்ணிக்கையினை அதிகரித்தனர். இருப்பினும் அது வெற்றிக்கு போதுமானதாக அமையவில்லை. இறுதியில் 16.4ஓவர்களில் சகல விக்கெட்களையும் இழந்து 114 ஓட்டங்களை பெற்றுக் கொண்டது.

துடுப்பாட்டத்தில் அசத்திய வனிந்து ஹசரங்க, பந்துவீச்சிலும் மிக அபாரமாக செயற்பட்டார். நுவான் பிரதீப்பும் சிறப்பாக பந்துவீசி விக்கெட்களை கைப்பற்றினார்.

நாணய சுழற்சியில் வெற்றி பெற்ற காலி அணி களத்தடுப்பை தெரிவு செய்தது. முதலில் துடுப்பாடிய கண்டி அணி அபாரமான துடுப்பாட்டம் மூலம் 20 ஓவர்களில் 05 விக்கெட்களை இழந்து 203 ஓட்டங்களை பெற்றுக் கொண்டது. இந்த தொடரில் முதற் தடவையாக அணி ஒன்று 200 ஓட்டங்களை கடந்துள்ளது.

ஆரம்பம் முதலே நல்ல முறையில் துடுப்பாடிய கண்டி அணிக்கு பக்கார் ஷமான் சிறந்த ஆரம்பத்தை வழங்கினார். அவருக்கு மொஹமட் ஹாரிஸ், டினேஷ் சந்திமால் ஆகியோர் நல்ல இணைப்பாட்டங்களை வழங்கினார்கள். மத்தியவரிசையில் களமிறங்கிய வனிந்து ஹஸரங்க அதிரடியாக அடித்தாடி ஓட்ட எண்ணிக்கையினை சடுதியாக அதிகரித்தார். 18 பந்துகளில் அரைச்சதத்தை கடந்தார். அவரோடு இணைந்து அஞ்சலோ மத்தியூசும் அதிரடி நிகழ்த்த வான வேடிக்கையாக மைதானம் காட்சியளித்தது. 77 ஓட்டங்களை இருவரும் இணைப்பாட்டமாக பகிர்ந்தனர்.

கண்டி அணி முதலிரு போட்டிகளிலும் தோல்வியை சந்தித்த நிலையில், தொடர்சியாக கண்டியில் நடைபெற்ற மூன்று போட்டிகளிலும் வெற்றி பெற்று முதலிடத்தை தனதாக்கி கொண்டுள்ளது.

இரு அணிகளுக்குமிடையில் நடைபெற்ற முதற் போட்டியில் காலி அணி வெற்றி பெற்றிருந்தது.