இங்கிலாந்துக்கு அதிர்ச்சி வழங்கிய ஆப்கானிஸ்தான்

இங்கிலாந்து மற்றும் ஆப்கானிஸ்தான் அணிகளுக்கிடையில் இந்தியா, டெல்லி அருண் ஜட்லி மைதானத்தில் நடைபெற்ற உலகக்கிண்ண தொடரின் பதின்மூன்றாவது போட்டியில் ஆப்கானிஸ்தான் அணி இங்கிலாந்து அணியை 69 ஓட்டங்களினால் வெற்றி பெற்றுள்ளது.

இறுதிப் போட்டி வரை செல்லும் என எதிர்பார்க்கப்படும் இங்கிலாந்து அணி ஆப்கானிஸ்தான் அணியிடம் அடைந்துள்ள இந்த தோல்வி இந்த உலகக்கிண்ண தொடரின் முதல் அதிர்ச்சி முடிவாக அமைந்துள்ளது.

285 ஓட்டங்கள் என்ற வெற்றியிலக்கை நோக்கி துடுப்பாட்டத்தை ஆரம்பித்த இங்கிலாந்து அணி ஆரம்பம் முதலே சம இடைவெளிகளில் விக்கெட்களை இழந்தது. ஆப்கானிஸ்தான் அணியின் சுழற் பந்துவீச்சு, வேகப்பந்து வீச்சு கலவை இங்கிலாந்தின் ஆரம்ப விக்கெட்களை பதம் பார்த்தன. ஹரி ப்ரூக் நிதானம் கலந்த வேகத்துடன் துடிப்பாடி அரைச்சதத்தை பூர்த்தி செய்தார்.

பலமான துடுப்பாட்ட வரிசையை கொண்ட இங்கிலாந்து அணி ஆப்கானிஸ்தான் அணியிடம் இந்தளவுக்கு தடுமாறுமென யாரும் எதிர்பார்த்திருக்கவில்லை. மொஹமட் நபி, ரஷீட் கான் ஆகியோரின் சுழற்பந்து வீச்சு இங்கிலாந்து அணியின் துடுப்பாட்ட வீரர்களை தடுமாற வைத்தது. ஆரம்பத்தில் முஜீப் உர் ரஹ்மான் சிறப்பாக பந்துவீசி விக்கெட்களை கைப்பற்றிய அதேவேளை இறுதியிலும் ஒரு விக்கெட்டை கைப்பற்றினார். அவரின் துடுப்பாட்டமும் வெற்றிக்கு கைகொடுத்தது.

இங்கிலாந்து அணி 40.3 ஓவர்களில் சகல விக்கெட்களையும் இழந்து 215 ஓட்டங்களை பெற்றது.

இந்தப் போட்டியில் முதலில் துடுப்பாடிய ஆப்கானிஸ்த்தான் அணி 49.5 ஓவர்களில் சகல விக்கெட்களையும் இழந்து 284 ஓட்டங்களை பெற்றுக் கொண்டது.

நாணய சுழற்சியில் வெற்றி பெற்று களத்தடுப்பை இங்கிலாந்து அணி தெரிவு செய்தது. அவர்கள் எதிர்பார்த்தது போன்று இரண்டாவதாக துடுப்பாடி ஓட்டங்களை பெறலாம் என்ற எதிர்பார்ப்பு பிழைத்துப் போனது.

ஆப்கானிஸ்தான் அணிக்கு ரஹுமனுள்ள குர்பாஸ் சிறந்த அதிரடி ஆரம்பத்தை வழங்கினார். ஆரம்ப விக்கெட் இணைப்பாட்டம் 16.4 ஓவர்களில் 114. இப்ராஹிம் ஷர்டான் 28 ஓட்டங்களோடு ஆட்டமிழந்தார். குர்பாஸ் மூன்றாவது விக்கெட்டாக 57 பந்துகளில் 80 ஓட்டங்களை பெற்று ரன் அவுட் முறையில் ஆட்டமிழந்தார். அதன் பின்னரே இங்கிலாந்து அணி பக்கமாக போட்டி மாறியது. இங்கிலாந்து அணியின் சுழற்பந்து வீச்சாளர்கள் விக்கெட்களை கைப்பற்ற ஆப்கானிஸ்தான் அணிக்கு தடுமாற்றம் ஆரம்பித்தது.

மத்தியவரிசை பெரியளவில் சோபிக்கவில்லை. இறுதி நேரத்தில் களமிறங்கிய ரஷீட் கான் அதிரடியாக துடுப்பாடி ஓட்ட எண்ணிக்கையை சிறிதளவில் உயர்திக் கொடுத்து ஆட்டமிழந்ததை தொடர்ந்து துடுப்பாட வந்த முஜீப் உர் ரஹ்மான் ஓட்டங்களைக்குவித்து ஆப்கானிஸ்தான் அணியின் ஓட்ட எண்ணிக்கையை உயர்திக் கொடுத்தார். இக்ரம் அலிகில் நிதானமாகவும், அதிரடியாகவும் துடுப்பாடி அவருடைய அரைச்சதத்தை பூர்த்தி செய்து கொண்டார். இறுதி நேரத்தில் பின் வரிசை துடுப்பாட்ட வீரர்கள் சிறப்பாக துடுப்பாடி ஆப்கானிஸ்தான் அணிக்கு வலுவான ஓட்ட எண்ணிக்கையினை பெற்றுக் கொடுத்தனர்.

உலகக்கிண்ணத்தில் ஆப்கானிஸ்தான் அணி பெறும் இரண்டாவது வெற்றி இதுவாகும். இதற்கு முதலில் ஸ்கொட்லாந்து அணையை மட்டுமே வென்றுள்ளது. இது அவர்களது பதினாறாவது உலகக்கிண்ண போட்டியாகும். இங்கிலாந்து அணிக்கெதிராக முதலாவது வெற்றியாகவும் இது பதிவாகியுள்ளது.