ஸ்ரீலங்கா கிரிக்கெட்டினால் நடாத்தப்படும் 4 நாள் தேசிய சூப்பர் லீக் தொடரின் இரண்டு போட்டிகள் தற்பொழுது நடைபெற்று வருகின்றன.
கொழும்பு ஆர் பிரேமதாச மைதானத்தில் இன்று ஆரம்பமாகிய போட்டியில் யாழ்ப்பாணம் மற்றும் கண்டி அணிகள் பலப்பரீட்சை நடத்தி வருகின்றன.
இன்று(21) போதிய ஒளியின்மையின் காரணமாக போட்டி இடைநிறுத்தப்படும் போது, முதலாவது இனிங்ஸிற்காக துடுப்பெடுத்தாடி வரும் கண்டி அணி 204 ஓட்டங்கள் பின்தங்கிய நிலையில் உள்ளது.
போட்டியின் நாணய சுழற்சியில் வெற்றி பெற்ற யாழ்ப்பாணம் அணி முதலில் துடுப்பெடுத்தாட தீர்மானித்தது.
அண்மையில் பங்களாதேஷ் அணிக்கு எதிராக சர்வதேச ஒரு நாள் போட்டிகளில் கன்னிச் சதத்தை பதிவு செய்த, ஜனித் லியனகேவின் துடுப்பாட்டத்தின் உதவியுடன் யாழ்ப்பாணம் அணி முதல் இனிங்ஸிற்காக 261 ஓட்டங்களைப் பெற்றுக் கொண்டது.
ஜனித் லியனகே 137 பந்துகளில் 83 ஓட்டங்களை பெற்றுக் கொடுத்தார். கண்டி அணி சார்பில் நிம்சர அதரகல்ல மற்றும் வனுஜா சஹான் ஆகியோர் தலா 3 விக்கெட்டுகளை பெற்றுக் கொண்டனர்.
முதலாவது இனிங்ஸிற்காக துடுப்பெடுத்தாட ஆரம்பித்த கண்டி அணியின் ஆரம்ப துடுப்பாட்ட வீரர்கள் குறைந்த ஓட்டங்களுக்கு ஆட்டமிழக்க, 57 ஓட்டங்களுக்கு 3 விக்கெட்டுகளை இழந்து அணி தடுமாற்றத்தை எதிர்நோக்கியுள்ளது.
கண்டி அணிக்காக கமில் மிஷாரா 15 ஓட்டங்களுடனும் சஹான் ஆராச்சிகே ஒரு ஓட்டத்துடனும் களத்தில் உள்ளனர். யாழ்ப்பாணம் அணி சார்பில் பந்து வீச்சிர் லஹிரு மதுஷங்க, நிபுன் மலிங்க மற்றும் ஜெப்ரி வான்டர்சே ஆகியோர் தலா ஒரு விக்கெட்டுகளை பெற்றுக் கொண்டனர்.
இதேவேளை, தம்புள்ளை மற்றும் கொழும்பு அணிகளுக்கு இடையிலான மற்றுமொரு போட்டி ஹம்பாந்தோட்டை மஹிந்த ராஜபக்ஷ மைதானத்தில் நடைபெற்று வருகின்றது.
போட்டியின் நாணய சுழற்சியில் வெற்றி பெற்ற கொழும்பு அணி களத்தடுப்பை தேர்வு செய்தது. அதன்படி, முதலாவது இனிங்ஸிற்காக துடுப்பெடுத்தாடி வரும் தம்புள்ளை அணி இன்றைய நாள் ஆட்டநேர முடிவின் போது 9 விக்கெட் இழப்பிற்கு 240 ஓட்டங்களைப் பெற்றிருந்தது.
தம்புள்ளை அணி சார்பில் சமிந்து விஜேசிங்க 51 ஓட்டங்களையும் லசித் குரூஸ்புள்ளே 43 ஓட்டங்களையும் அதிகப்பட்சமாக பெற்றுக் கொண்டனர். கொழும்பு அணி சார்பில் பந்துவீச்சில் நிசல தாரக மற்றும் இசித டியூ விஜேசுந்தர ஆகியோர் தலா 3 விக்கெட்டுகளை கைப்பற்றினர்.
போட்டியின் இரண்டாம் நாள் ஆட்டம் நாளை காலை ஆரம்பமாகவுள்ளது.