சூப்பர் 8 சுற்றில் பங்களாதேஷ் அணிக்கு எதிரான போட்டியில் இந்திய அணி வெற்றியீட்டியதன் ஊடாக அரையிறுதி போட்டிக்கு தெரிவாகும் வாய்ப்பை நெருங்கியுள்ளது. மேற்கிந்திய தீவுகள், அன்டிகாவில் இன்று(22.06) நடைபெற்ற இந்த போட்டியின் நாணய சுழற்சியில் வெற்றி பெற்ற பங்களாதேஷ் அணி களத்தடுப்பை தெரிவு செய்தது.
அதன்படி, முதலில் துடுப்பெடுத்தாடிய இந்திய அணி 20 ஓவர்களில் 5 விக்கெட் இழப்பிற்கு 196 ஓட்டங்களைப் பெற்றுக்கொண்டது. இந்திய அணி சார்பில் ஹர்திக் பாண்டியா 50 ஓட்டங்களையும், விராட் கோலி 37 ஓட்டங்களையும், ரிஷப் பாண்ட் 36 ஓட்டங்களையும், சிவம் துபே 34 ஓட்டங்களையும் பெற்றுக்கொண்டனர். பங்களாதேஷ் அணி சார்பில் பந்து வீச்சில் ஹசன் ஷகிப், ரிஷாட் ஒசைன் ஆகியோர் தலா 2 விக்கெட்டுக்களை கைப்பற்றினர்
197 ஓட்டங்களை வெற்றியிலக்காக கொண்டு பதிலுக்கு துடுப்பெடுத்தாடிய பங்களாதேஷ் அணி 20 ஓவர்களில் 8 விக்கெட் இழப்பிற்கு 146 ஓட்டங்களை பெற்று தோல்வியடைந்தது. பங்களாதேஷ் அணி சார்பில் அணித் தலைவர் ஷன்டோ 40 ஓட்டங்களையும், தன்சித் ஹசன் 29 ஓட்டங்களையும் பெற்றுக்கொண்டனர். இந்திய அணி சார்பில் பந்துவீச்சில் குல்தீப் யாதவ் 3 விக்கெட்டுக்களையும், பும்ரா, அர்ஷ்தீப் சிங் ஆகியோர் தலா 2 விக்கெட்டுக்களையும் கைப்பற்றினர்.
இதன்படி, இந்த போட்டியில் இந்திய அணி 50 ஓட்டங்களினால் வெற்றியீட்டியதுடன், போட்டியின் ஆட்ட நாயகனாக இந்திய அணியின் ஹர்திக் பாண்டியா தெரிவு செய்யப்பட்டார்.