இங்கிலாந்து மற்றும் மேற்கிந்திய தீவுகள் அணிகளுக்கு இடையிலான டெஸ்ட் தொடரின் முதலாவது போட்டியில் மேற்கிந்திய தீவுகள் அணி இன்னிங்ஸ் தோல்வியை தவிர்க்க போராடி வருகின்றது.
போட்டியின் இரண்டாம் நாள் ஆட்டத்தின் போது, 2வது இன்னிங்ஸிற்காக துடுப்பெடுத்தாடி வந்த இங்கிலாந்து அணி 90 ஓவர்களில் சகல விக்கெட்டுக்களையும் இழந்து 371 ஓட்டங்களைப் பெற்றுக்கொண்டது.
இங்கிலாந்த அணி சார்பில் சாக் கிராலி 76(89) ஓட்டங்களையும், ஜேமி ஸ்மித் 70(119) ஓட்டங்களையும், ஜோ ரூட் 68(114) ஓட்டங்களையும், ஒலி போப் 57(74) ஓட்டங்களையும், ஹாரி புரூக் 50 ஓட்டங்களையும் பெற்றுக்கொண்டனர்.
மேற்கிந்திய தீவுகள் அணி சார்பில் பந்து வீச்சில் ஜெய்டன் சீல்ஸ் 4 விக்கெட்டுக்களையும், ஜேசன் ஹோல்டர், மொடி ஆகியோர் தலா 2 விக்கெட்டுக்களையும் கைப்பற்றினர்.
250 ஓட்டங்கள் பின்தங்கிய நிலையில் 2வது இன்னிங்ஸை ஆரம்பித்த மேற்கிந்திய தீவுகள் அணி, இரண்டாம் நாள் ஆட்டநேர முடிவின் போது 34.5 ஓவர்களில் 79 ஓட்டங்களுக்கு 6 விக்கெட்டுக்களை இழந்து தடுமாற்றத்தை எதிர்நோக்கியுள்ளது.
மேற்கிந்திய தீவுகள் அணி சாரபில் ஜோசுவா டி சில்வா 8(16) ஓட்டங்களுடன் களத்தில் இருக்கின்றார். இங்கிலாந்த அணி சாரபில் பந்து வீச்சில், தன்னுடைய இறுதி டெஸ்ட் போட்டியில் பங்கேற்கும் ஜிம்மி அண்டர்சன், கஸ் அட்கின்சன், பென் ஸ்டோக்ஸ் ஆகியோர் தலா 2 விக்கெட்டுக்களை பெற்றுள்ளனர்.
இதன்படி, மேற்கிந்திய தீவுகள் அணி 171 ஓட்டங்கள் பின்தங்கியுள்ள நிலையில், இங்கிலாந்து அணி வெற்றி பெறுவதற்கு 4 விக்கெட்டுகளை கைப்பற்ற வேண்டும்.
போட்டியின் மூன்றாம் நாள் ஆட்டம் இன்று(12.07) இலங்கை நேரப்படி மாலை 3.30 மணிக்கு ஆரம்பமாகவுள்ளது.
போட்டியின் முதல் நாள் விபரம்
3 போட்டிகள் கொண்ட டெஸ்ட் தொடரில் பங்கேற்பதற்காக இங்கிலாந்துக்கு சுற்றுப்பயணம் மேற்கொண்டுள்ள மேற்கிந்திய தீவுகள் அணிக்கு எதிரான முதலாவது போட்டி லண்டன், லார்ட்ஸ் மைதானத்தில் கடந்த 10ம் திகதி ஆரம்பமாகியது. போட்டியின் நாணய சுழற்சியில் வெற்றி பெற்ற இங்கிலாந்து அணி களத்தடுப்பை தெரிவு செய்தது.
அதன்படி, முதலாவது இன்னிங்ஸிற்காக துடுப்பெடுத்தாடிய மேற்கிந்திய தீவுகள் அணி 41.4 ஓவர்களில் சகல விக்கெட்டுக்களையும் இழந்து 121 ஓட்டங்களை மாத்திரம் பெற்றுக்கொண்டது. மேற்கிந்திய தீவுகள் அணி சார்பில் மிகைல் லூயிஸ் 27(58) ஓட்டங்களையும், கவேம் ஹாட்ஜ் 24(48) ஓட்டங்களையும், அலிக் ஏதனேஸ் 23(56) ஓட்டங்களையும் பெற்றுக்கொண்டனர்.
இங்கிலாந்து அணி சார்பில் பந்து வீச்சில் கஸ் அட்கின்சன் 7 விக்கெட்டுக்களையும், ஜேம்ஸ் அண்டர்சன், கிரிஸ் வோக்ஸ், பென் ஸ்டோக்ஸ் ஆகியோர் தலா ஒரு விக்கெட்டினையும் கைப்பற்றினர். தன்னுடைய இறுதி டெஸ்ட் போட்டியில் பங்கேற்கும் ஜேம்ஸ் அண்டர்சன் பெற்றுக்கொண்ட 701 டெஸ்ட் விக்கெட் இதுவாகும்.
பின்னர், முதலாவது இன்னிங்ஸிற்காக துடுப்பெடுத்தாட ஆரம்பித்த இங்கிலாந்து அணி போட்டியின் முதல் நாள் ஆட்டநேர முடிவின் போது 40 ஓவர்களில் 3 விக்கெட் இழப்பிற்கு 189 ஓட்டங்களைப் பெற்றிருந்தது. இங்கிலாந்து அணி சார்பில் சாக் கிராலி 76(89) ஓட்டங்களையும், ஒலி போப் 57(74) ஓட்டங்களையும் பெற்றுக்கொண்டனர்.
மேற்கிந்திய தீவுகள் அணி சார்பில் பந்து வீச்சில் ஜெய்டன் சீல்ஸ் 2 விக்கெட்டுக்களையும், ஜேசன் ஹோல்டர் ஒரு விக்கெட்டினையும் கைப்பற்றினர்.
இங்கிலாந்து அணியின் நட்சத்திர வேகப்பந்து வீச்சாளர்களில் ஒருவரும், 700 டெஸ்ட் விக்கெட்டுக்களை கடந்த ஜாம்பவான்களில் ஒருவருமான ஜேம்ஸ்(ஜிம்மி) அண்டர்சன் இங்கிலாந்து அணி சார்பில் பங்கேற்கும் இறுதி டெஸ்ட் போட்டி இதுவாகும்.