லங்கா பிரீமியர் லீக் தொடரின் 2வது Qualifier போட்டிக்கு கண்டி பல்கோன்ஸ் அணி தகுதி பெற்றுக்கொண்டது. கொழும்பு ஸ்ட்ரைக்கர்ஸ் அணிக்கு எதிரான Eliminator போட்டியில் வெற்றியீட்டியதனுடாக கண்டி பல்கோன்ஸ் 2வது Qualifier போட்டிக்கான வாய்ப்பை உறுதி செய்து கொண்டது.
லங்கா பிரீமியர் லீக் தொடரின் கொழும்பு ஸ்ட்ரைக்கர்ஸ் மற்றும் கண்டி பல்கோன்ஸ் அணிகளுக்கு இடையிலான Eliminator போட்டி இன்று(18.07) நடைபெற்றது தரவரிசையில் முறையே 3ம் மற்றும் 4ம் இடங்களிலுள்ள கொழும்பு மற்றும் கண்டி அணிகள் Eliminator போட்டிக்கு தகுதி பெற்றிருந்தன.
கொழும்பில் நடைபெற்று வரும் இந்த போட்டியின் நாணய சுழற்சியில் வெற்றி பெற்ற கண்டி அணி களத்தடுப்பை தெரிவு செய்தது.
அதன்படி, முதலில் துடுப்பெடுத்தாட ஆரம்பித்த கொழும்பு அணியின் முஹமட் வசீம் 10(9) ஓட்டங்களுக்கும், க்ளன் பிலிப்ஸ் ஓட்டங்கள் எதனையும் பெறாமலும், நிபுன் தனஞ்சய 14(11) ஓட்டங்களுக்கும் ஆட்டமிழக்க அணி ஆரம்பத்திலேயே தடுமாற்றத்தை எதிர்நோக்கியது.
ஆரம்பம் முதல் நிதானமாக துடுப்பெடுத்தாடிய ரஹ்மானுள்ளா குர்பாஸ் 30(29) ஓட்டங்களைப் பெற்றிருந்த போது ஆட்டமிழந்தார். க்ளன் பிலிப்ஸ் ஓட்டங்கள் எதனையும் பெறாமல் ஆட்டமிழக்க, களத்தில் நின்ற சதீர சமரவிக்ரம, டுனித் வெல்லாலஹே ஆகியோர் அணியின் ஓட்ட எண்ணிக்கையை அதிகரித்தனர்.
சதீர சமரவிக்ரம 62(45) ஓட்டங்களுக்கும், டுனித் வெல்லாலஹே 28(21) ஓட்டங்களுக்கும் ஆட்டமிழக்க, பின்னர் களத்திற்கு வந்த ஏனைய வீரர்களும் ஓட்டங்கள் எதனையும் பெறாமல் வெளியேறினர். கொழும்பு அணி 20 ஓவர்கள் நிறைவில் 8 விக்கெட் இழப்பிற்கு 159 ஓட்டங்களைப் பெற்றுக்கொண்டது.
கண்டி அணி சார்பில் பந்துவீச்சில் மொஹமட் ஹஸ்னைன் 3 விக்கெட்டுக்களையும், அணித் தலைவர் வனிந்து ஹசரங்க 2 விக்கெட்டுக்களையும் கைப்பற்றினர்.
160 ஓட்டங்களை வெற்றியிலக்காக கொண்டு பதிலுக்கு துடுப்பெடுத்தாட ஆரம்பித்த கண்டி அணி 38 ஓட்டங்களுக்கு 3 விக்கெட்டுக்களை இழந்து தடுமாற்றத்தை எதிர்நோக்கியது. டினேஷ் சந்திமால் 6(4) ஓட்டங்களுக்கும், மொஹமட் ஹரிஸ் 10(4) ஓட்டங்களுக்கும், அன்றே ப்லட்சர் 20(12) ஓட்டங்களுக்கும் ஆட்டமிழந்தனர்.
பின்னர் களத்திற்கு வந்த காமிந்து மென்டிஸ் சிறப்பாக துடுப்பெடுத்தாட, மறுபுறம் அஞ்சலோ மத்தியூஸ், அணித் தலைவர் வனிந்து ஹசரங்க, சதுரங்க டி சில்வா ஆகியோர் குறைந்தளவு ஓட்டங்களுக்கு ஆட்டமிழந்தனர். காமிந்து மென்டிசுடன் ஜோடி சேரந்த தஸூன் சாணக்க அதிரடியாக துடுப்பெடுத்தாடி அணியை வெற்றியிலக்கை நோக்கி கொண்டு சென்றார்.
கண்டி அணி 18.4 ஓவர்களில் 8 விக்கெட்டுக்களை இழந்து வெற்றியிலக்கை கடந்தது. காமிந்து மென்டிஸ் 54(36) ஓட்டங்களையும், தஸூன் சாணக்க 39(21) ஓட்டங்களையும் பெற்றுக்கொண்டனர்.
இந்த போட்டியில் தோல்வியடைந்த கொழும்பு அணி தொடரிலிருந்து வெளியேறியதுடன், கண்டி அணி 2வது Qualifier போட்டிக்கு தகுதி பெற்றுக்கொண்டது. அதற்கமைய 1வது Qualifier போட்டியில் தோல்வியடைந்த யாழ்ப்பாணம் அணி, கண்டி அணியை எதிர்வரும் 20ம் திகதி நடைபெறவுள்ள 2வது Qualifier போட்டியில் ஏதிர்க்கொள்ளவுள்ளது. இன்றைய போட்டியின் ஆட்ட நாயகனாக காமிந்து மென்டிஸ் தெரிவு செய்யப்பட்டார்.
1வது Qualifier போட்டியில் வெற்றியீட்டிய காலி அணி இறுதிப்போட்டிக்குள் முதல் அணியாக தெரிவாகியுள்ள நிலையில், கண்டி மற்றும் யாழ்ப்பாணம் அணிகளுக்கிடையிலான போட்டியில் வெற்றி பெறும் அணி, காலி அணியை இறுதிப்போட்டியில் எதிர்க்கொள்ளவுள்ளது.