இலங்கைக்கு சுற்றுப்பயணம் மேற்கொள்ளவுள்ள இந்திய கிரிக்கெட் குழாம் அறிவிக்கப்பட்டுள்ளது.
இலங்கை அணிக்கு எதிரான டி20 மற்றும் ஒருநாள் சர்வதேச போட்டித் தொடரில் பங்கேற்கவுள்ள இந்திய குழாம் இந்திய தெரிவுக் குழுவினால் நேற்று(18.07) வெளியிடப்பட்டது.
இந்திய டி20 அணிக்கு தலைவராக சூர்யகுமார் யாதவ் நியமிக்கப்பட்டுள்ளார். இந்திய அணியின் தலைவராக செயற்பட்ட ரோகித் சர்மா டி20 உலகக் கிண்ண வெற்றியுடன் டி20 போட்டிகளில் ஓய்வு பெறுவதாக அறிவித்திருந்த நிலையில் இந்திய டி20 அணிக்கு புதிய தலைவர் நியமிக்கப்பட்டுள்ளார்.
33 வயதான சூர்யகுமார் யாதவ் கண்டி, பல்லேகலவில் எதிர்வரும் 27ம் திகதி ஆரம்பமாகவுள்ள 3 போட்டிகள் கொண்ட டி20 தொடரில் பங்கேற்கவுள்ள இந்திய அணிக்கு தலைமை தாங்கவுள்ளார்.
சர்வதேச ஒருநாள் போட்டித் தொடருக்கான இந்திய அணிக்கு ரோகித் சர்மா தொடர்ந்தும் தலைமை தாங்கவுள்ளார். இந்தியா மற்றும் இலங்கை அணிகளுக்கு இடையிலான 3 போட்டிகள் கொண்ட ஒருநாள் போட்டித் தொடர் கொழும்பில் எதிர்வரும் ஆகஸ்ட் மாதம் 2ம் திகதி ஆரம்பமாகவுள்ளது.
இந்திய அணியின் தலைமை பயிற்சிவிப்பாளராக கௌதம் கம்பீர் நியமிக்கப்பட்டதன் பின்னர், இந்திய அணி பங்கேற்கும் முதலாவது கிரிக்கெட் தொடர் இதுவாகும்.
டி20 குழாம்: சூர்யகுமார் யாதவ், சுப்மன் கில், யஷஸ்வி ஜெய்ஸ்வால், ரின்கு சிங், ரியான் பராக், ரிஷப் பண்ட், சஞ்சு சாம்சன், ஹர்திக் பாண்டியா, சிவம் துபே, அக்சர் படேல், வாஷிங்டன் சுந்தர், ரவி பிஷ்னோய், அர்ஷ்தீப் சிங், கலீல் அஹமட், மொஹமட் சிராஜ்
ODI குழாம்: ரோகித் சர்மா, சுப்மன் கில், விராட் கோலி, கேஎல் ராகுல், ரிஷப் பண்ட், ஷ்ரேயாஸ் ஐயர், சிவம் துபே, குல்தீப் யாதவ், மொஹமட் சிராஜ், வாஷிங்டன் சுந்தர், அர்ஷ்தீப் சிங், ரியான் பராக், அக்சர் படேல், கலீல் அஹமட், ஹர்ஷித் ராணா
