யாழ்ப்பாணத்தை சேர்ந்த இளம் வீரர் மர்வின் அபினாஷின் அபார துடுப்பாட்டத்தின் உதவியுடன் Burgher Recreation Club அணி, இலங்கையிலுள்ள கிரிக்கெட் கழகங்களுக்கு இடையிலான மேஜர் களப்ஸ் மட்டுப்படுத்தப்பட்ட ஓவர்கள் தொடரின் முதல் சுற்றுப் போட்டிகளின் இறுதிப் போட்டியில் வெற்றிப் பெற்றுள்ளது.
மொரட்டுவையில், இன்று(05.08) நடைபெற்ற இந்த போட்டியில் Burgher Recreation Club மற்றும் Nugegoda Sports Welfare Club அணிகள் பலப்பரீட்சை நடத்தியிருந்தன. போட்டியின் நாணய சுழற்சியில் வெற்றி பெற்ற Nugegoda அணி களத்தடுப்பை தெரிவு செய்தது.
அதன்படி, முதலில் துடுப்பெடுத்தாட ஆரம்பித்த Burgher அணி 11.1 ஓர்களில் 39 ஓட்டங்களுக்கு 6 விக்கெட்டுக்களை இழந்து பெரும் தடுமாற்றத்தை எதிர்நோக்கியிருந்த நிலையில், களத்திற்கு வந்த யாழ்ப்பாணத்தை சேர்ந்த இளம் வீரர் மர்வின் அபினாஷ் அபாரமாக துடுப்பெடுத்தாடி ஆட்டமிழக்காமல் 96(129) ஓட்டங்களை பெற்றுக் கொண்டார்.
முல்லைத்தீவை சேர்ந்த மகேந்திரன் கவிலன் 27(33) ஓட்டங்களையும், துலாஜ் அஷேன் 32(62) ஓட்டங்களையும் அணிக்காக பெற்றுக்கொடுக்க 50 ஓவர்கள் நிறைவில் 9 விக்கெட் இழப்பிற்கு 204 ஓட்டங்களை Burgher அணி பெற்றுக்கொண்டது.
205 ஓட்டங்களை வெற்றியிலக்காக கொண்டு பதிலுக்கு துடுப்பெடுத்தாடிய Nugegoda அணி 41.5 ஓவர்களில் கசல விக்கெட்டுக்களையும் இழந்து 181 ஓட்டங்களை மாத்திரம் பெற்று தோல்வியடைந்தது. Nugegoda அணி சார்பில் ஆரம்ப துடுப்பாட்ட வீரர் புலிந்து பெரேரா 72(74) ஓட்டங்களையும், கெவின் பெரேரா 53(67) ஓட்டங்களையும் பெற்றுக்கொண்டனர்.
Burgher அணிக்காக பந்து வீச்சிலும், வலது கை சுழற்பந்து வீச்சாளரான மர்வின் அபினாஷ் 2 விக்கெட்டுக்களையும், வலது கை வேகப்பந்து வீச்சாளரான மகேந்திரன் கவிலன் ஒரு விக்கெட்டினையும் கைப்பற்றினர். அணியின் ஏனைய வீரர்களான சமிந்த பண்டார, துலாஜ் அஷேன், சமீர திசாநாயக்க ஆகியோரும் தலா 2 விக்கெட்டுக்களை கைப்பற்றினர்.
இதன்படி, இந்த போட்டியில் Burgher Recreation Club அணி 23 ஓடடங்களினால் வெற்றியீட்டிய போதும், அரையிறுதி சுற்றுக்கு தகுதி பெறும் வாய்ப்பை இழந்தது. தொடரில் ‘பி’ குழாமில் இடம்பெற்றுள்ள Burgher அணி 8 போட்டிகளில் 5 வெற்றிகளைப் பெற்று 10 புள்ளிகளுடன் 3ம் இடத்திலுள்ளது.
இந்த குழுவில் முதல் இரண்டு இடங்களில் முறையே உள்ள Colombo Cricket Club, Moors Sports Club அணிகள் அரையிறுதி சுற்றுக்கு தகுதி பெற்றுள்ளன. குழு ‘ஏ’ யில் முறையே முதல் இரண்டு இடங்களிலுள்ள Ace Capital Cricket, Sinhalese Sports Club அணிகளும் அரையிறுதி சுற்றுக்கு தகுதி பெற்றுள்ளன.
எதிர்வரும் 8ம் திகதி நடைபெறவுள்ள மேஜர் களப்ஸ் மட்டுப்படுத்தப்பட்ட ஓவர்கள் தொடரின் அரையிறுதி சுற்றில் Ace Capital அணி, Moors அணியுடனும், Colombo CC அணி SSC அணியுடனும் பலப்பரீட்சை நடத்தவுள்ளன.