LPL – மேலும் இரு அணிகள் உள்ளே

லங்கா பிரீமியர் லீக் கிரிக்கெட் தொடரில் நேற்று(15.12) நடைபெற்ற போட்டிகளினடிப்படையில் கோல் கிளாடியேட்டர்ஸ், மற்றும் தம்புள்ள ஜியன்ட்ஸ் ஆகிய அணிகள் அடுத்த சுற்று வாய்ப்பை பெற்றுள்ளன. கண்டி வொரியேர்ஸ் அணியின் தோல்வி இந்த அணிகள் அடுத்து சுற்று வாய்ப்பை பெற முக்கியமான காரணமாக அமைந்துள்ளது.

நேற்றைய முதற் போட்டியில் கொழும்பு ஸ்டார்ஸ், கண்டி வொரியேர்ஸ் ஆகிய அணிகள் மோதியிருந்தன. முதலில் துடுப்பாடிய கண்டி வொரியேர்ஸ் அணி 20 ஓவர்களில் 9 விக்கெட்களை இழந்து 146 ஓட்டங்களை பெற்றது. இதில் கென்னர் லெவிஸ் 62(44) ஓட்டங்களையும், சரித் அசலங்க 28(18) ஓட்டங்களையும் பெற்றனர். டுஸ்மாந்த சமீர பந்துவீச்சில் 4 விக்கெட்களை கைப்பற்றினார்.

பதிலுக்கு துடுப்பாடிய கொழும்பு ஸ்டார்ஸ் அணி 19.4 ஓவர்களில் 5 விக்கெட்களை இழந்து 150 ஓட்டங்களை பெற்று வெற்றி பெற்றது. இந்த வெற்றியின் மூலம் தமது அடுத்த சுற்று வாய்ப்பை கொழும்பு அணி தக்கவைத்துள்ளது. நான்காவது இடத்துக்கான போட்டியில் இந்த இரண்டு அணிகளும் தொடரவுள்ளன.

கொழும்பு அணி மீதமுள்ள 2 போட்டிகளில் ஒன்றில் வெற்றி பெற்றால் அடுத்த சுற்று வாய்ப்பை பெற்றுவிடும். கண்டி அணி இரண்டு போட்டிகளிலும் வெற்றி பெற்றாலும், கொழும்பு அணி இரண்டு போட்டிகளிலும் தோல்வியடைந்தால் மட்டுமே அடுத்து சுற்று வாய்ப்பை பெறும்.

கொழும்பு ஸ்டார்ஸ் அணியின் துடுப்பாட்டத்தில் டினேஷ் சந்திமால் 44(27) ஓட்டங்களையும், சீக்குகே பிரசன்ன ஆட்டமிழ்க்காமல் ஐந்து சிக்ஸர்கள் அடங்கலாக 32(6) ஓட்டங்களையும் பெற்றுக் கொடுத்தார்கள்.

இரண்டாவது போட்டி மழை காரணமாக 14 ஓவர்கள் கொண்ட போட்டியாக தம்புள்ள ஜியன்ட்ஸ், கோல் கிளாடியேட்டர்ஸ் அணிகளுக்கிடையில் நடைபெற்றது.

முதலில் துடுப்பாடிய கோல் கிளாடியேட்டர்ஸ் அணி 14ஓவர்களில் 7 விக்கெட்களை இழந்து 134 ஓட்டங்களை பெற்றது. இதில் குசல் மென்டிஸ் 35(17) ஓட்டங்களையும், பானுக்க ராஜ்பக்ஸ 33(20) ஓட்டங்களையும் பெற்றனர். பந்துவீச்சில் இம்ரான் தாகீர் 3 விக்கெட்களையும், ஜோஷ் லிட்டில் 2விக்கெட்களையும் கைப்பற்றினார்கள்.
பதிலுக்கு துடுப்பாடிய தம்புள்ள ஜியன்ட்ஸ் அணி 14 ஓவர்களில் 5 விக்கெட்களை இழந்து 125 ஓட்டங்களை பெற்றது. துடுப்பாட்டத்தில் ஜனித் லியனகே 51(37), பில் சோல்ட் 41(29) ஓட்டங்களையும் பெற்றனர். பந்துவீச்சில் சமிட் படேல், இசுரு உதான ஆகியோர் தலா இரண்டு விக்கெட்களை கைப்பற்றினார்கள்.

புள்ளி பட்டியல்