இலங்கை கிரிக்கெட் மேற்கிந்தியத் தீவுகள் அணிக்கெதிரான பல்வகை கிரிக்கெட் தொடருக்கான இலங்கை அணிகளை அதிகாரப்பூர்வமாக அறிவித்துள்ளது. ஒருநாள் (ODI), இருபதுக்கு 20 (T20I) மற்றும் டெஸ்ட் போட்டிகளை உள்ளடக்கிய இந்த சுற்றுப்பயணம் நாளை (26.05) கரீபியன் நோக்கி புறப்படவுள்ளது.
சுற்றுப்பயணம் முதலில் ஒருநாள் தொடருடன் ஆரம்பமாகி, பின்னர் T20I போட்டிகளும் இறுதியாக டெஸ்ட் தொடரும் நடைபெறவுள்ளது.
இந்த சுற்றுப்பயணத்திற்காக வெவ்வேறு வடிவங்களுக்கு தனித்தனி தலைமைத்துவம் அறிவிக்கப்பட்டுள்ளது. டெஸ்ட் அணியை தொடர்ந்து தனஞ்சய டி சில்வா வழிநடத்தவுள்ளதுடன், கமிந்து மெண்டிஸ் துணைத் தலைவராக நியமிக்கப்பட்டுள்ளார்.
அதேவேளை, ஒருநாள் மற்றும் T20I அணிகளின் தலைவராக குசல் மெண்டிஸ் நியமிக்கப்பட்டுள்ளார். இந்த இரண்டு வடிவங்களிலும் துணைத் தலைவராகவும் கமிந்து மெண்டிஸ் செயல்படவுள்ளார்.
டெஸ்ட் அணியில் பெத்தும் நிசங்க, தினேஷ் சந்திமால், பிரபாத் ஜயசூரிய உள்ளிட்ட அனுபவமிக்க வீரர்களுடன் பல இளம் வீரர்களும் இடம்பெற்றுள்ளனர்.
ஒருநாள் மற்றும் T20I அணிகளில் வணிந்து ஹசரங்க, மஹீஸ் தீக்ஷண துஷ்மந்த சமீர, டில்ஷான் மதுஷங்க ஆகியோர் இடம்பிடித்துள்ளனர்.
மேலும், தஸுன் ஷானக T20I அணிக்கு மீண்டும் அழைக்கப்பட்டுள்ளமை குறிப்பிடத்தக்கது.