ஐக்கிய அரபு அமீரகத்தில் இடம்பெற்ற சர்வதேச இந்திய திரைப்பட விருதுகள் வழங்கும் விழாவில் வாழ்நாள் சாதனையாளருக்கான விருது நடிகர் கமல்ஹாசனுக்கு வழங்கப்பட்டதுடன் இந்த விழாவில் நடிகர் மாதவன் சிறந்த இயக்குனருக்கான விருதை பெற்றுள்ளார். அவர் இயக்கி நடித்திருந்த ரொக்கெட்டரி திரைப்படத்துக்காக இந்த விருது அவருக்கு வழங்கப்பட்டுள்ளது.
இஸ்ரோ விஞ்ஞானி நம்பி நாராயணன் வாழ்க்கையை மையமாக வைத்து ரொக்கெட்டரி திரைபடத்தை மாதவன் இயக்கியிருந்தார். உளவு பார்த்ததாக போலி குற்றச்சாட்டில் சிக்கி சிறை தண்டனை மற்றும் சித்ரவதையை அனுபவித்த நேர்மையான விஞ்ஞானியின் வாழ்க்கை சம்பவங்களை இந்த திரைப்படத்தில் பதிவு செய்யப்பட்டிருந்தது.
சூர்யா சிறப்பு தோற்றத்தில் நடித்திருந்த இப்படத்தை மாதவனே தயாரித்தும் இருந்தார். தற்போது ரொக்கெட்டரி படத்துக்காக சிறந்த இயக்குனர் விருது பெற்றுள்ள நிலையில் மாதவனுக்கு ரசிகர்கள் வாழ்த்து தெரிவித்து வருகிறார்கள். அடுத்து ஜி.டி.நாயுடு வாழ்க்கை கதையிலும் மாதவன் நடிக்க இருப்பதாக இந்திய செய்திகள் தெரிவிக்கின்றன.