தம்புள்ள அணிக்கு முதல் வெற்றி

லங்கா பிரீமியர் லீக் கிரிக்கெட் தொடரில் தம்புள்ள ஓரா, கோல் க்ளாடியேட்டர்ஸ் அணிகளுக்கிடையிலான போட்டியில் தம்புள்ள அணி 47 ஓட்டங்களினால் வெற்றி பெற்றுள்ளது. முதல் ஐந்து போட்டிகளிலும் தோல்வியடைந்துள்ள நிலையில் ஆறாவது போட்டியில் முதல் வெற்றியினை தம்புள்ள அணி பதிவு செய்துள்ளது.

மீதமுள்ள இரு போட்டிகளிலும் வெற்றி பெற்றால் தம்புள்ள அணிக்கு அடுத்த சுற்று வாய்ப்பு கிடைக்கலாம். அந்த வாய்ப்பு காலி மற்றும் கொழும்பு அணிகள் விளையாடவுள்ள போட்டிகளிலும் தங்கியுள்ளது.

178 ஓட்டங்கள் என்ற வெற்றியிலக்குடன் துடுப்பாடிய காலி அணி 19.4 ஓவர்களில் 10 விக்கெட்களை இழந்து 130 ஓட்டங்களை பெற்றுக் கொண்டது. ஆரம்பம் முதலே விக்கெட்களை காலி இழந்தமையினால் வெற்றி இலக்கை பெறுவதில் சிக்கல் நிலை ஏற்பட்டது.

ப்ரமோட் மதுஷான், தஸூன் சாணக்க ஆகியோர் சிறப்பாக பந்துவீசினார்கள். ஆரம்ப விக்கெட்களை அவர்கள் உடைத்தமையே வெற்றிக்கு முக்கியமான காரணமாக அமைந்தது.

கொழும்பு R.பிரேமதாச மைதானத்தில் நடைபெற்ற இந்தப் போட்டியில் நாணய சுழற்சியில் வெற்றி பெற்று முதலில் துடுப்பாடிய தம்புள்ள அணி 20 ஓவர்களில் 05 விக்கெட்களை இழந்து 177 ஓட்டங்களை பெற்றுக்கொண்டது.

ஷெவோன் டானியல் மற்றும் ஜோர்டான் கொக்ஸ் ஆகியோரின் சிறப்பான அதிரடியான ஆரம்பம் இந்த இலக்கை பெற உதவியது. இந்த இணைப்பாட்டம் 96 ஆக காணப்பட்ட வேளையில் மிகவும் இலகுவான பிடி ஒன்று நழுவ விடப்பட்டது. அதன் பின்னர் இருவரும் சத இணைப்பாட்டத்தை பகிர்ந்து கொண்டனர். 163 ஓட்டங்களை 17 ஓவர் வரை துடுப்பாடி பெற்றுக்கொண்டனர்.

தம்புள்ள அணி ஐந்து போட்டிகளில் தோல்வியடைந்துள்ள நிலையில் இந்தப் போட்டியில் தோல்வியடைந்தால் அடுத்த சுற்று வாய்ப்பை இழந்துவிடும். வெற்றி பெற்றால் அடுத்த சுற்று வாய்ப்பை தக்க வைக் முடியும். காலி அணி வெற்றி பெற்றால் அடுத்த சுற்று வாய்ப்பை பெறும் அதேவேளை கொழும்பு அணியும் அடுத்த சுற்றுக்கு தெரிவாகிவிடும்.