அஹான் விக்கிரமசிங்க சதம் – கண்டி, தம்புள்ளை அணிகள் வலுவான நிலையில் 

ஸ்ரீலங்கா கிரிக்கெட்டினால் நடாத்தப்படும் 4 நாள் தேசிய சூப்பர் லீக் தொடரின் யாழ்ப்பாணம் அணிக்கு எதிரான போட்டியில் கண்டி அணி 87 ஓட்டங்கள் முன்னிலையில் உள்ளது. 

போட்டியின் இரண்டாம் நாள் ஆட்டநேர முடிவின் போது, கண்டி அணி 7 விக்கெட் இழப்பிற்கு 348 ஓட்டங்களைப் பெற்றிருந்து. 

கண்டி அணிக்காக அஹான் விக்கிரமசிங்க 147 ஓட்டங்களுடனும் ஆஷியன் டேனியல் 18 ஓட்டங்களுடனும் களத்தில் உள்ளனர். 

கொழும்பு ஆர் பிரேமதாச மைதானத்தில் கடந்த 21ம் திகதி ஆரம்பமாகிய இந்த போட்டியின் நாணய சுழற்சியில் வெற்றி பெற்ற யாழ்ப்பாணம் அணி முதலில் துடுப்பெடுத்தாட தீர்மானித்தது. 

அண்மையில் பங்களாதேஷ் அணிக்கு எதிராக சர்வதேச ஒரு நாள் போட்டிகளில் கன்னிச் சதத்தை பதிவு செய்த, ஜனித் லியனகேவின் துடுப்பாட்டத்தின் உதவியுடன் யாழ்ப்பாணம் அணி முதல் இனிங்ஸிற்காக 261 ஓட்டங்களைப் பெற்றுக் கொண்டது. 

ஜனித் லியனகே 137 பந்துகளில் 83 ஓட்டங்களை பெற்றுக் கொடுத்தார். கண்டி அணி சார்பில் நிம்சர அதரகல்ல மற்றும் வனுஜா சஹான் ஆகியோர் தலா 3 விக்கெட்டுகளை பெற்றுக் கொண்டனர். 

முதலாவது இனிங்ஸிற்காக துடுப்பெடுத்தாட ஆரம்பித்த கண்டி அணியின் ஆரம்ப துடுப்பாட்ட வீரர்கள் குறைந்த ஓட்டங்களுக்கு ஆட்டமிழக்க, 57 ஓட்டங்களுக்கு 3 விக்கெட்டுகளை இழந்து அணி தடுமாற்றத்தை எதிர்நோக்கியிருந்தது. 

இருப்பினும் போட்டியின் இரண்டாம் நாள் ஆட்டத்தின் போது, அஹான் விக்கிரமசிங்க மற்றும் சாமிக்க கருணாரத்னவின் இணைப்பாட்டத்தின் உதவியுடன் கண்டி அணி 87 ஓட்டங்கள் முன்னிலையில் உள்ளது. 

யாழ்ப்பாணம் அணி சார்பில் லஹிரு மதுஷங்க மற்றும் ரவிந்து பெர்னாண்டோ, தலா 2 விக்கெட்டுகளை பெற்றுள்ளனர். 

இதேவேளை, தம்புள்ளை மற்றும் கொழும்பு அணிகளுக்கு இடையிலான மற்றுமொரு போட்டி ஹம்பாந்தோட்டை மஹிந்த ராஜபக்‌ஷ மைதானத்தில் நடைபெற்று வருகின்றது. 

போட்டி இரண்டாம் நாள் ஆட்டம் போதிய ஒளியின்மையின் காரணமாக நிறுத்தப்படும் போது, முதலாவது இனிங்ஸிற்காக பதிலுக்கு துடுப்பெடுத்தாடி வரும் கொழும்பு அணி 8 விக்கெட் இழப்பிற்கு 187 ஓட்டங்களை பெற்றிருந்தது.  

துனித் வெல்லலகே 20 ஓட்டங்களுடனும் நிசல தாரக 3 ஓட்டங்களுடனும் களத்தில் உள்ளனர்.

போட்டியின் நாணய சுழற்சியில் வெற்றி பெற்ற கொழும்பு அணி களத்தடுப்பை தேர்வு செய்தது. அதன்படி, முதலாவது இனிங்ஸிற்காக துடுப்பெடுத்தாடிய தம்புள்ளை அணி சகல விக்கெட்டுக்களையும் இழந்து  240 ஓட்டங்களைப் பெற்றுக்கொண்டது. 

தம்புள்ளை அணி சார்பில் சமிந்து விஜேசிங்க 51 ஓட்டங்களையும் லசித் குரூஸ்புள்ளே 43 ஓட்டங்களையும் அதிகப்பட்சமாக பெற்றுக் கொண்டனர். கொழும்பு அணி சார்பில் பந்துவீச்சில் நிசல தாரக மற்றும் இசித டியூ விஜேசுந்தர ஆகியோர் தலா 3 விக்கெட்டுகளை கைப்பற்றினர். 

முதலாவது இனிங்ஸிற்காக துடுப்பெடுத்தாடி வரும் கொழும்பு அணி 53 ஓட்டங்கள் பின்தங்கிய நிலையில் உள்ளது. 

கொழும்பு அணிக்காக கிரிஷன் சஞ்சுலா 49 ஓட்டங்களையும் தசுன் ஷானக 42 ஓட்டங்களையும் அதிகப்பட்சமாக பெற்றுக் கொடுத்தனர். 

போட்டியின் மூன்றாம் நாள் ஆட்டம் இன்று(23) நடைப்பெறவுள்ளது.