பால்மா விலையில் மாற்றமில்லை? 

இறக்குமதி செய்யப்படும் பால்மாவின் விலையை குறைப்பதற்கு  எவ்வித தீர்மானமும் மேற்கொள்ளப்படவில்லை என பால்மா இறக்குமதியாளர்கள் சங்கம் தெரிவித்துள்ளது.

பால்மாவின் விலை திருத்தம் தொடர்பில் உத்தியோகபூர்வ கலந்துரையாடல் எதுவும் இடம்பெறவில்லை எனவும் பால்மா இறக்குமதியாளர்கள் சங்கத்தின் ஊடகப் பேச்சாளர் அசோக பண்டார தெரிவித்துள்ளார்.

கடந்த மாதம் பால்மா இறக்குமதியாளர்கள், 400 கிராம் பால்மா பெக்கட்டின் விலையை 60 ரூபாவினாலும், ஒரு கிலோகிராம் பால்மா பெக்கட்டின்  விலை 150 ரூபாவினாலும் குறைப்பதற்கு நடவடிக்கை எடுத்திருந்தனர்.

தற்போது சந்தையில் பால்மா வெவ்வேறு விலைகளுக்கு விற்பனை செய்யப்படுவதாக சுட்டிக்காட்டிய பால்மா இறக்குமதியாளர்கள் சங்கத்தின் ஊடகப் பேச்சாளர், பால்மாவின் விலையை குறைப்பது தொடர்பில் இதுவரையில் எவ்வித தீர்மானமும் எடுக்கப்படவில்லை எனவும் தெரிவித்துள்ளார். 

இந்நிலையில், இன்று(25.04) முதல் அமுலுக்கு வரும் வகையில் மீண்டும் பால்மாவின் விலையை குறைப்பதாக நியூசிலாந்தில் இருந்து பால்மாவை இறக்குமதி செய்யும் நிறுவனம் ஒன்று நேற்று (24.04) அறிவித்துள்ளது.

இதன்படி, இறக்குமதி செய்யப்படும் ஒரு கிலோகிராம் பால்மா பெக்கட்டின் விலை 250 முதல் 350 ரூபா வரையிலும், 400 கிராம் பால்மா பெக்கட்டின் விலை 100 முதல் 140 ரூபா வரையிலும் குறைக்கப்படும் என தெரிவிக்கப்பட்டுள்ளது.

இந்த விலை குறைப்புக்கும், பால்மா இறக்குமதியாளர் சங்கத்திற்கும் எவ்வித தொடர்பும் இல்லை என சங்கத்தின் ஊடகப் பேச்சாளர் அசோக பண்டார சுட்டிக்காட்டியுள்ளார்.