கொழும்பு அணிக்கு வெற்றி

தம்புள்ள ஓரா, கொழும்பு ஸ்டார்ஸ் அணிகளுக்கிடையிலான லங்கா பிரீமியர் லீக் கிரிக்கெட் தொடரின் மூன்றாம் நாளுக்கான போட்டியில் கொழும்பு ஸ்டார்ஸ் அணி 09 ஓட்டங்களினால் வெற்றி பெற்றது.

166 ஓட்டங்கள் என்ற வெற்றியிலக்குடன் துடுப்பாடிய தம்புள்ள அணி 20 ஓவர்களில் 07 விக்கெட்களை இழந்து 156 ஓட்டங்களை பெற்றது.

தம்புள்ள அணி சிறந்த ஆரம்பத்தை பெற்ற போதும், மத்தியவரிசை துடுப்பாட்ட வீரர்கள் அதிரடியாக துடுப்பாட முடியாமல் போனமையினால் தோல்வியடைய வேண்டிய நிலை ஏற்பட்டது. கொழும்பு அணியின் பந்து வீச்சில் சுரங்க லக்மால், டொமினிக் ரேக்ஸ், கரீம் ஜனட் ஆகியோரது பந்துவீச்சும், நவீன் உல் ஹக்கின் இறுக்கமான பந்துவீச்சும் தம்புள்ள அணியினை கட்டுப்படுத்தியது.

ஹம்பாந்தோட்டை, மஹிந்த ராஜபக்ஷ சர்வதேச கிரிக்கெட் மைதானத்தில் நடைபெற்ற இந்தப் போட்டியில் நாணய சுழற்சியில் வெற்றி பெற்று துடுப்பாடிய கொழும்பு ஸ்டார்ஸ் அணி 20 ஓவர்களில் 09 விக்கெட்களை இழந்து 165 ஓட்டங்களை பெற்றது.

கொழும்பு அணி ஆரம்பத்தில் விக்கெட்களை இழந்து தடுமாறிய வேளையில் ஆரம்ப துடுப்பாட்ட வீரராக களமிறங்கிய நிரோஷன் டிக்வெல்ல நல்ல ஆரம்பத்தை வழங்க கொழும்பு அணி மீண்டது. மத்திய வரிசையில் ரவி போபரா, டினேஷ் சந்திமாலும் நிதானம் கலந்த அதிரடி துடுப்பாட்டத்தின் மூலம் வலுவான ஓட்ட எண்ணிக்கைக்கு அணியினை நகர்த்தி சென்றனர்.

லஹிரு குமார ஆரம்ப விக்கெட்களை தகர்த்து கொழும்பு அணியினை தடுமாற வைத்தார்.

இரு அணிகளும் தாம் விளையாடிய முதற் போட்டிகளில் தோல்விகளை சந்தித்துள்ள நிலையில் கொழும்பு அணி முதல் வெற்றியினை பெற்றுள்ளது.

சகல அணிகளும் இரண்டு போட்டிகளில் விளையாடியுள்ள நிலையில் கண்டி பல்கொன்ஸ் முதலிடத்திலும், ஜப்னா கிங்ஸ் இரண்டாம் இடத்திலும், கொழும்பு ஸ்டார்ஸ் அணி மூன்றாமிடத்திலும், தம்புள்ள ஓரா, காலி கிளாடியேட்டர்ஸ் ஆகிய அணிகள் நான்காம் ஐந்தாம் இடங்களிலும் காணப்படுகின்றன.