கொழும்பு அணியினை உருட்டி எடுத்தது யாழ் அணி

லங்கா பிரீமியர் லீக் கிரிக்கட் தொடரின் ஜப்னா கிங்ஸ், கொழும்பு ஸ்டார்ஸ் அணிகளுக்கிடையிலான போட்டியில் யாழ் அணியின் சிறந்த பந்துவீச்சு மூலம் கொழும்பு அணி கட்டுப்படுத்தப்பட்டுள்ளது.

கொழும்பு R.பிரேமதாச மைதானத்தில் நடைபெற்று வரும் போட்டியில் நாணய சுழற்சியில் வெற்றி பெற்ற யாழ் அணி களத்தடுப்பை தெரிவு செய்தது. துடுப்பாடிய கொழும்பு அணி 20 ஓவர்களில் 09 விக்கெட்களை இழந்து 128 ஓட்டங்களை பெற்றுள்ளது.

திசர பெரேரா, சொஹைப் மலிக் ஆகியோரின் சிறப்பான பந்துவீச்சு மூலம் கொழும்பு அணியின் முதல் நான்கு விக்கெட்கள் 16 ஓட்டங்களுக்குள் வீழ்த்தப்பட்டன. சொஹைப் மலிக் 2 ஓவர்களில் 4 ஓட்டங்களுக்கு 2 விக்கெட்களை கைப்பற்றினார்.

நிஷான் மதுசங்க மற்றும் ரவி போபரா ஆகியோரின் இணைப்பாட்டம் மூலம் கொழும்பு அணி ஓரளவு மீண்டு வந்தது. நிரோஷன் டிக்வெள்ல இந்த தொடரில் சிறந்த ஆரம்பத்தை எடுத்த போதும், கடைசி நான்கு போட்டிகளில் 2 ஓட்டங்களை மட்டுமே பெற்றுள்ளார். இவற்றில் மூன்று தடவைகள் ஓட்டமெதனையும் பெறாமல் ஆட்டமிழந்தார்.

கொழும்பு அணியின் தலைவர் அஞ்சலோ மத்தியூஸ் ஓய்வு எடுத்துக்கொண்டார். அது கொழும்பு அணியின் துடுப்பாட்டத்துக்கு பின்னடைவை ஒன்றை ஏற்படுத்தியது.

யாழ் அணி சார்பாக இன்று விஜயகாந்த் விஜயஸ்காந்துக்கு ஓய்வு வழங்கப்பட்டு பிரவீன் ஜெயவிக்ரம சேர்த்துக்கொள்ளப்பட்டுள்ளார்.