2024ம் ஆண்டிற்கான மகளிர் டி20 உலகக் கிண்ணத் தொடரில் பாகிஸ்தானுக்கு எதிரான போட்டியில் இந்தியா வெற்றி பெற்றுள்ளது. இந்த போட்டி டுபாய் சர்வதேச கிரிக்கெட் மைதானத்தில் இன்று(06.10) நடைபெற்றது.
போட்டியின் நாணய சுழற்சியில் வெற்றி பெற்ற பாகிஸ்தான் மகளிர் அணி முதலில் துடுப்பெடுத்தாட தீர்மானித்தது. அதன்படி பாகிஸ்தான் 20 ஓவர்கள் நிறைவில் 8 விக்கெட் இழப்பிற்கு 105 ஓட்டங்களைப் பெற்றுக்கொண்டது. பாகிஸ்தான் சார்பில் நிடா டார் 28(34) ஓட்டங்களைப் பெற்றுக்கொள்ள ஏனைய வீரர்கள் குறைந்தளவு ஓட்டங்களுக்கு ஆட்டமிழந்தனர்.
இந்தியா சார்பில் பந்து வீச்சில் அருந்ததி ரெட்டி 3 விக்கெட்டுக்களையும், படில் 2 விக்கெட்டுக்களையும் கைப்பற்றினர்.
106 ஓட்டங்களை வெற்றியிலக்காக கொண்டு பதிலுக்கு துடுப்பெடுத்தாடிய இந்திய மகளிர் அணி, 18.5 ஓவர்களில் 4 விக்கெட்டுக்களை இழந்து வெற்றியில்ககை கடந்தது. இந்தியா சார்பில் ஷஃபாலி வர்மா 32(35) ஓட்டங்களையும், ஹர்மன்பிரீத் கவுர் 29(24) ஓட்டங்களையும், ஜெமிமா ரோட்ரிக்ஸ் 23(28) ஓட்டங்களையும் பெற்றுக்கொண்டனர்.
இந்தியா அணித்தலைவி ஹர்மன்பிரீத் கவுர் துடுப்பெடுத்தாடிக் கொண்டிருந்த போது ஏற்பட்ட உபாதை காரணமாக போட்டியின் இடை நடுவே களத்திலிருந்து வெளியேறியிருந்தார்.
பாகிஸ்தான் சார்பில் பந்து வீச்சில் பாத்திமா சனா 2 விக்கெட்டுக்களை கைப்பற்றினர்.
இதன்படி, இந்தியா மகளிர் அணி 6 விக்கெட்டுக்களினால் வெற்றியீட்டியதுடன், இந்தியாவின் அருந்ததி ரெட்டி ஆட்ட நாயகியாகத் தெரிவு செய்யப்பட்டார்.
