இலங்கையை பந்தாடிய ஆப்கானிஸ்தான்

இலங்கை மற்றும் ஆப்கானிஸ்தான் அணிகளுக்கிடையில் உலககிண்ணத்தொடரின் 30 ஆவது போட்டியாக பூனேயில் இன்று (30.10) நடைபெற்றது. இந்த போட்டியில் ஆப்கானிஸ்தான் அணி 7 விக்கெட்களினால் வெற்றி பெற்றது.

நாணய சுழற்சியில் வெற்றி பெற்ற ஆப்கானிஸ்தான் அணி களத்தடுப்பை தெரிவு செய்துள்ளது.

இலங்கை அணியின் முதல் விக்கெட் வீழ்ந்தவுடன் 2 விக்கெட் இணைப்பாட்டத்திற்காக ஜோடி சேர்ந்த பத்தும் நிசங்க மற்றும் குசல் மென்டிஸ் ஆகியோர் 62 ஓட்டங்களை இணைப்பாட்டமாக பகிர்ந்து கொண்டனர். பத்தும் நிசங்க ஆட்டமிழந்தவுடன் சதீர சமரவிக்ரம, குஷால் மென்டிஸ் ஆகியோர் 50 ஓட்டங்களை இணைப்பாட்டமாக பகிர்ந்து கொண்டனர். குசல் மென்டிஸ் ஆட்டமிழந்ததுடன் சம இடைவெளிகளில் விக்கெட்கள் வீழ்த்தப்பட்டன. ஆப்கானிஸ்தான் அணியின் அபாரமான பந்துவீச்சு மற்றும் சிறந்த களத்தடுப்பு மூலமாகவே இலங்கை அணியின் ஓட்ட எண்ணிக்கையினை கட்டுப்படுத்த முடிந்தது. இலங்கை அணி தடுமாறிக் கொண்டிருந்த வேளையில் 8 ஆவது விக்கெட் இணைப்பாட்டத்திற்காக ஜோடி சேர்ந்த அஞ்சலோ மத்தியூஸ், மஹீஸ் தீக்ஷண ஆகியோர் 45 ஓட்டங்களை இணைப்பாட்டமாக பகிர்ந்ததுடன் அணியின் ஓட்ட எண்ணிக்கையினை உயர்திக்கொடுத்தனர்.

இலங்கை அணி 49.3 ஓவர்களில் சகல விக்கெட்களையும் இழந்து 241 ஓட்டங்களை பெற்றது.

ஆப்கானிஸ்தான் அணியின் முதல் விக்கெட் வேகமாகவே வீழ்த்தப்பட்டது. அதன் பின்னர் ஜோடி சேர்ந்த ரஹ்மத் ஷா, இப்ராஹிம் சட்ரன் ஆகியோர் 73 ஓட்டங்களை இணைப்பாட்டமாக பகிர்ந்து கொண்டனர். அதன் பின்னர் ஜோடி சேர்ந்த ஹஷ்மதுல்லா ஷஹிதி, ரஹ்மத் ஷா ஆகியோர் 58 ஓட்டங்களை இணைப்பாட்டமாக பகிர்ந்து கொண்டனர். ரஹ்மத் ஷா ஆட்டமிழந்ததுடன் ஜோடி சேர்ந்த அஸ்மதுல்லா ஓமர்சாய் ஆகியோர் 111 ஓட்டங்களை இணைப்பாட்டமாக பகிர்ந்ததுடன் இருவரும் அரைச்சதங்களை பூர்த்தி செய்துகொண்டது மட்டுமின்றி ஆப்கானிஸ்தான் அணியின் வெற்றிக்கும் உதவினர். இலங்கை அணியின் பந்துவீச்சில் டில்ஷான் மதுஷங்க மட்டுமே சிறப்பாக பந்துவீசியிருந்தார். இலங்கை அணியின் களத்தடுப்பாளர்கள் மற்றும் விக்கெட் காப்பாளர் இவர்கள் இலகுவான 6 பிடிகளை நழுவவிட்டிருந்தனர். இதுவே இலங்கை அணியின் தோல்விக்கு காரணமாக அமைந்தது.

ஆப்கானிஸ்தான் அணி 45.2 ஓவர்களில் 3 விக்கெட்களை இழந்து 242 ஓட்டங்களை பெற்றது.

இலங்கை அணி இரண்டு மாற்றங்களுடன் இன்று விளையாடுகிறது. குசல் பெரேராவிற்கு பதிலாக திமுத் கருணாரட்னவும் லஹிரு குமார உபாதை அடைந்த காரணத்தால் அவருக்கு பதிலாக துஷ்மந்த சமீரவும் விளையாடுகினறனர். ஆப்கானிஸ்தான் அணி ஒரு மாற்றத்தோடு விளையாடுகிறது. நூர் அஹமட்டிற்கு பதிலாக பசல்ஹக் பரூக்கி மீண்டும் அணிக்குள் வந்திருக்கிறார்.

அணி விபரம்

இலங்கை அணி: குஷல் மென்டிஸ்(தலைவர்), திமுத் கருணாரட்ன, பத்தும் நிஸ்ஸங்க, சதீர சமரவிக்ரம, சரித் அசலங்க, அஞ்சலோ மத்தியூஸ், தனஞ்சய டி சில்வா, மஹீஸ் தீக்ஷண, டில்ஷான் மதுஷங்க, துஷ்மந்த சமீர, கஸூன் ரஜித

ஆப்கானிஸ்தான் அணி: ஹஷ்மதுல்லா ஷஹிதி (தலைவர்), ரஹ்மனுல்லா குர்பாஸ், இப்ராஹிம் ஷர்டான், இக்ரம் அலிகில், ரஹ்மத் ஷா, மொஹமட் நபி, அஸ்மதுல்லா ஓமர்சாய், ரஷீட் கான்,முஜீப் உர் ரஹ்மான், நவீன் உல் ஹக், பசல்ஹக் பரூக்கி