சம்பியன்ஸ் கிண்ணத்தை அபாரமாக ஆரம்பித்தது நியூசிலாந்து

பாகிஸ்தான் மற்றும் நியூசிலாந்து அணிகளுக்கிடையில் சம்பியன்ஸ் கிண்ணத்தின் முதல் போட்டியாக நேற்று (19.02) பாகிஸ்தானிலுள்ள கராச்சியில் நடைபெற்றது. இந்த போட்டியில் நியூசிலாந்து அணி 60 ஓட்டங்களால் வெற்றி பெற்றது.

நாணய சுழற்சியில் வெற்றி பெற்ற பாகிஸ்தான்அணி களத்தடுப்பை தெரிவு செய்தது.

முதலில் துடுப்பாடிய நியூசிலாந்து அணி 50 ஓவர்களில் 5 விக்கெட்களை இழந்து 320 ஓட்டங்களை பெற்றது. இதில் டொம் லதாம் ஆட்டமிழக்காமல் ஓட்டங்களையும்,வில் யங் 107(112) ஓட்டங்களையும், க்ளென் பிலிப்ஸ் 61(38) ஓட்டங்களையும் பெற்றனர். நியுஸிலாந்து அணி ஆரம்பத்திலேயே விக்கெட்களை இழந்து தடுமாறியது. 4 ஆவது விக்கெட் இணைப்பாட்டத்திற்காக ஜோடி சேர்ந்த வில் யங், டொம் லதாம் ஆகியோர் 118 ஓட்டங்களை இணைப்பாட்டமாக பகிர்ந்து அணியை மீட்டெடுத்தனர். 5 ஆவது விக்கெட்டிற்காக ஜோடி சேர்ந்த க்ளென் பிலிப்ஸ், டொம் லதாம் ஆகியோர் 125 ஓட்டங்களை இணைப்பாட்டமாக பகிர்ந்து அணியின் ஓட்ட எண்ணிக்கையை மேலும் உயர்த்தினர். இது வில் யங்கின் 4 ஆவது சதமாகும். டொம் லதாம் அவரின் 8 ஆவது சதத்தை பூர்த்தி செய்தார்.

பாகிஸ்தான் அணியின் பந்துவீச்சில் நசீம் ஷா, ஹரிஸ் ரவுப் ஆகியோர் தலா 2 விக்கெட்களை கைப்பற்றினர்.

பதிலுக்கு துடுப்பாடிய பாகிஸ்தான் அணி 47.2 ஓவர்களில் சகல விக்கெட்களையும் இழந்து 260 ஓட்டங்களை பெற்றது. இதில் குஷ்தில் ஷா 69(49) ஓட்டங்களையும், பாபர் அசாம் 64(90) ஓட்டங்களையும், சல்மான் அகா 42(28) ஓட்டங்களையும் பெற்றனர்.

நியூசிலாந்து அணியின் பந்துவீச்சில் வில்லியம் O’ ரூக், மிச்சல் சன்டனர் ஆகியோர் தலா 3 விக்கெட்களையும், மட் ஹென்றி 2 விக்கெட்களையும், மிச்சல் பிரேஸ்வல், நேதன் ஸ்மித் ஆகியோர் தலா ஒவ்வொரு விக்கெட்களையும் கைப்பற்றினர்.

இந்த போட்டியின் நாயகனாக டொம் லதாம் தெரிவு செய்யப்பட்டார்.